މޯލްޑިވިއަން އައިޑޮލްގެ ފުރަތަމަ ސީޒަނުގެ ތިން ވަނަ އަދި އެންމެ "ސަޅި" މީހާގެ ގޮތުގައި މަޝްހޫރުވި މުހައްމަދު އިޝާން އަމިއްލަ އަލްބަމެއްގެ މަސައްކަތް ފަށައިގެން އުޅޭތާ ދުވަސްތަކެއް ވެއްޖެ އެވެ. އެ އަލްބަމް ފޭނުންނަށް ދޫކޮށްލާެނެ ތަރީހެއް އިޝާން އަދި އޮތީ ސަޕްރައިޒެއްގެ ގޮތުގައި ބާއްވާލާފަ އެވެ. މީގެކުރިން އިޝާން ބުނީ ތާރީހެއް ބުނަން ނޭނގޭ ކަމަށެވެ.
މަހެއްހާ ދުވަސް ފަހުން މި އަލްބަމް ރިލީޒް ކުރަން އިޝާން މިވަނީ ނިންމާފަ އެވެ. ފޭނުންނަށް ހަދިޔާއެއްގެ ގޮތުގައި ފުރަތަމަ ލަވަ ދޫކޮށްލާނީ ވީޑިއޯ އާވެސް އެކުގަ އެވެ.
އަމިއްލަ ރާގުގެ ލަވަތައް ހިމެނޭ އެ އަލްބަމްގެ މަސައްކަތް އިޝާން ފަށާފައިވަނީ މޯލްޑިވިއަން އައިޑޮލްގެ ފުރަތަމަ ސީޒަން ނިންމާލި ގޮތަށެވެ. އޭގެ ފަހުން އަލްބަމްގެ ހުރިހާ މަސައްކަތެއް ކުރަމުން އިޝާން އަންނަނީ އޭނާގެ ބޭންޑާއެކު ޝޯތައްވެސް ދެމުންނެވެ. ޑިވައިން ބޭންޑާއެކު އިޝާން އަންނަނީ ރިސޯޓު މިއުޒިކްގައި ފިޔަ ޖަހަމުންނެވެ. މިދިޔަ ރޯދަމަހު ޓީވީއެމް އިން ގެނެސްދިން އެހަނދާނުގައި ޝޯގައިވެސް އިޝާންގެ ރީތި ލަވައެއް ވަނީ އިވިގެން ގޮސްފަ އެވެ.
"އިޝާން ބޭނުމެއް ނޫން އެއްޗެއް ނެރެންށޭ ކިޔާފައި އަވަސް އަރުވާލައިގެން އުޅޭކަށް. ރީތި އަދި ކޮލިޓީ އެއްޗެއް ގެންނަން ބޭނުންވަނީ. ދުވަސް ނަގަނީ އެހެންވެގެން." އިޝާން ބުންޏެވެ.
އިޝާންގެ އާ މި ސޯލޯ އަލްބަމްގެ ހުރިހާ ލަވައެއް މިހާރު ރެކޯޑުކޮށްވެސް ނިންމާލައިފި އެވެ. ފުރަތަމަ ލަވައިގެ ވީޑިއޯ ހެދުމުގެ މަސައްކަތް ފެށުމަށް މިހާރު ދަނީ ތައްޔާރުވަމުންނެވެ. މި އަލްބަމްގައި އިޝާންގެ ސޯލޯ ހަތް ލަވަ ހިމެނޭނެ އެވެ.