ބާޒާރާ އެއް އަގެއްގައި އެސްޓީއޯއިން ފިޔާ، އަލުވި، ބިސް ވިއްކަން ފަށައިފި

ބާޒާރާ އެއް އަގެއްގައި އެސްޓީއޯ އިން ފިޔާ، އަލުވި، ބިސް ރާއްޖެ ގެނެސް ވިއްކަން ފަށައިފި އެވެ.

ސަރުކާރާއި ރައްޔިތުން ހިއްސާވާ ކުންފުނި، އެސްޓީއޯއިން ރޯދައަށް ފިޔާ، އަލުވި އަދި ބިސް ގެނެސް މިއަދު މެންދުރުފަހުން ފެށިގެން ދަނީ ވިއްކަމުންނެވެ. ފިޔާ ބަސްތާއެއް އެ ކުންފުނިން ވިއްކަނީ 170ރ. އަށް ވިއްކާއިރު ވަކިން ފިޔާ ކިލޯއެއް ވިއްކަނީ އަށް ރުފިޔާ އަށެވެ. އަދި ބިސް ކޭހެއް ވިއްކަނީ 270ރ. އަށެވެ. ވަކިން ވިއްކަނީ 1.50ރ. އަށެވެ. މީގެ އިތުރުން އަލުވި ބަސްތާއެއް 220ރ. އަށެވެ.

އެސްޓީއޯއިން މި ފިޔާ، އަލުވި އަދި ބިސް ވިއްކަން ފެށިއިރު، މިއަދު ބާޒާރުގައި މި ބާވަތްތައް ލިބެން ހުރީ ވެސް ގާތްގަނޑަކަށް މި އަގުގަ އެވެ.

ފިޔާ ބަސްތާއެއްގެ އަގު ހުރީ 160-170ރ. އާ ދެމެދުގެ އަގުތަކެއްގަ އެވެ. އެއީ ފިޔާ ކިލޯއެއް ގާތްގަނޑަކަށް 9ރ. އާއި 10ރ. އަށެވެ. އަދި އަލުވި ބަސްތާއެއްގެ އަގު ހުރީ 220-250ރ. ގަ އެވެ. އަދި ބިސް ކޭހެއް ލިބެން ހުރީ 270ރ. އަށެވެ.

ރޯދަ މަހަށް ހާއްސަކޮށްގެން އެސްޓީއޯ އިން މި ބާވަތްތައް ގެނެސްފައިވާއިރު، މި އަގުތަކަކީ މިދިޔަ އަހަރާ ގާތްގަނޑަކަށް އެއް އަގެކެވެ. މިދިޔަ އަހަރުގެ ރޯދަ މަހު އެސްޓީއޯއިން ފިޔާ ބަސްތާއެއް ވިއްކީ 160ރ. އަށެވެ. އަދި ބިސް ކޭހެއް ބިސް ކޭހެއް: 275ރ. އަށް ވިއްކިއިރު އަލުވި ބަސްތާއެއް ވިއްކާފައިވަނީ 250ރ. އަށެވެ. ނަމަވެސް މިދިޔަ އަހަރު ބާޒާރުގައި މި ބާވަތްތައް އަގު އުފުލުނެވެ. އެސްޓީއޯއިން މިދިޔަ އަހަރު މި ބާވަތްތައް ގެނައިއިރު ފިޔާ ބަސްތާއެއް ހުރީ 260ރ. ގަ އެވެ. އަދި އަލުވި ބސްތާއެއް ހުރީ 290ރ. އަށެވެ. އަދި ބިސް ކޭހެއް ހުރީ 450ރ. އަށެވެ.

އެސްޓީއޯއިން ވަނީ މި އަހަރު ބާޒާރު ހަމައަށް އަޅުވަން މުޅިރާއްޖެއަށް ބަހާލައިގެން މި ބާވަތްތައް ގެންނަން ހާއްސަ ޕްލޭނެއް ކޮށްފަ އެވެ.