ރޯދަ މަސް މެދެހާ ހަމައަށް އައިސްފައިވާއިރު، ގިނަ ބާވަތްތަކުގެ އަގުތައް ދަށަށް ދާން ފަށައިފި އެވެ. މާރުކޭޓުގެ އަގުތަކަށް ބަލާއިރު، ކަރާ ފިޔަވައި ގިނަ ބާވަތްތަކުގެ އަގުތައް ހުރީ ދަށުގަ އެވެ.
އެހެން ރޯދަ މަސްތަކުގައި ވެސް ޑިމާންޑް ބޮޑުވާ ކަރާ ކިލޯއެއްގެ އަގު އުޅެނީ 20ރ. އިން މަތީގަ އެވެ. ރޯދަ މަސް ފެށުނުއިރު އަގުތައް އެންމެ މަތިވި އެއް ބާވަތް ކަމަށްވާ މިރުހުގެ އަގުވެސް ވަނީ ދަށަށް ގޮސްފަ އެވެ. މިހާރު 100ރ. މިރުސް ހުރީ 10ރ. އާއި 40ރ. އާ ދެމެދުގެ އަގު ތަކެއްގަ އެވެ.
ރޯދަ މަހު ފަނި ގިރައިން ބޭނުންކުރާ އެހެން ބާވަތްތައް ކަމަށްވާ ދޮންއަނބު ކިލޯއެއްގެ އަގު އުޅެނީ 30ރ. އާއި 50ރ. އަށެވެ. އަދި ބަނބުކޭލެއްގެ އަގު އުޅެނީ 20ރ. އަށެވެ. މިއީ ރޯދަ މަސް ފެށުނުއިރު، 40ރ. އާއި 60ރ. ވަރަށް ލިބެން ހުރި ބާވަތް ތަކެކެވެ. މީގެ އިތުރުން ކޮޕީ ފަތް ބޮނޑިއެއްގެ އަގު ހުރީ 10ރ. އާއި 15ރ.އަށެވެ.
ރޯދަ މަހު ތަކެތީގެ އަގުތައް މަހުގެ ފަހު ކޮޅަށް ދާއިރު ދަށަށް ދިއުމަކީ އާއްމު ކަމެކެވެ. މިދިޔަ އަހަރުވެސް ރޯދަ މަސް މެދު ޖެހުނުއިރު ގިނަ ބާވަތްތަކުގެ އަގުތައް ވަނީ ދަށްވާން ފަށާފަ އެވެ.