މިސީޒަނަށް ފަހު، ބާސެލޯނާގެ ކޯޗްކަން ދޫކޮށްލާ، ލުއިސް އެންރީކޭގެ ބަދަލުގައި އަންނަ ސީޒަންގައި ބާސާގެ ކޯޗަކަށް ވުމުގެ އުންމިދުގައި، ފްރާންސްގެ ގައުމީ ޓީމާއި، ޕީއެސްޖީގެ ކުރީގެ ކޯޗް ލޯރެންޓް ބްލެންކް ސްޕޭންގެ ތިން ކުލަބަކުން ހުށަހެޅި ވަރުގަދަ އެއްބަސްވުންތަކަކަށް ނޫނެކޭ ބުނެފި އެވެ.
ފްރާންސްގެ ކުޅިވަރު ނޫހެއް ކަމަށްވާ، ލަ ޕެރީސިއަންއިން ބުނެފައި ވަނީ، ސެވިއްޔާ އާއި ރެއާލް ބެޓިސް އަދި ލަސްޕަލަމްސްއިން ހުށަހެޅި ހުށަހެޅުންތަކަކަށް ބްލެންކް ނޫނެކޭ ބުނެފައިވާ ކަމަށެވެ.
ޕީއެސްޖީއާ އެކު ހެދި އެއްބަސްވުން މިދިޔަ ސީޒަންގައި ހަމަވުމުން، މިސީޒަނަށް ބްލެންކް ހުރީ ބްރޭކެއް ނަގައިގެން ނެވެ.
ބްލެންކާ އެންމެ ފުރަތަމަ މުއާމަލާތް ކުރީ ލަސްޕަލަމްސްއިން ނެވެ. އޭނާ އަށް ދެ އަހަރު ދުވަހުގެ އެއްބަސްވުމެއް ހުށަހަޅަން، ލަސްޕަލްމްސްއިން އޮތީ ތައްޔާރަށެވެ. އަދި އޭނާ މަސައްކަތް ކުރަން އޮފީހެއް ދޭ ގޮތަށްވެސް އެ ކުލަބުން، މިދިޔަ މަހު ކުރީ ކޮޅު ހުށަހެޅި ހުށަހެޅުމުގައި ވެއެވެ. ނަމަވެސް ބްލެންކް ވަނީ އެ ހުށަހެޅުމަށް ނޫނެކޭ ބުނެފަ އެވެ.
ބެޓިސްއިން ހުށަހެޅީ، ކޮންމެ ސީޒަނެއްގައި މޫސާރައިގެ ގޮތުގައި އޭނާ 1.7 މިލިއަން ޔޫރޯ ދޭނެ ކަމަށާއި، އަދި ޓްރާންސްފާ ޕީރިއަޑްގައި އޭނާ ބޭނުންވާ ހަތް ކުޅުންތެރިޔަކު އެޓީމަށް ގެނައުމުގެ ފުރުސަތު ދޭނެ ކަމަށެވެ.
ބެޓިސްގެ ހުށަހެޅުން، އަހަރަކު ދެ މިލިއަން ޔޫރޯއަށް އިތުރުކޮށް ދިނުމަށް ހުށަހަޅައި ބްލެންކް ވަނީ ކޮންޓްރެކްޓާ ބެހޭގޮތުން އިތުރަށް މަޝަވަރާ ކުރުމަށް ބޭނުންވާކަން ޝައުގުވެރިކަން ފާޅު ކޮށްފަ އެވެ.
ނަމަވެސް، މިދިޔަ މަހުގެ މެދު ތެރޭގައި، ބްލެންކް ވަނީ ބެޓިސްގެ ހުށަހެޅުމަށްވެސް ނޫނެކޭ ބުނެފަ އެވެ. ލަ ޕެރީސިއަންއިން ބުނެފައިވަނީ، އިތުރަށް މަޝްވަރާ ކުރުމަށް ޝައުގުވެރިކަން ފާޅު ކުރުމަށްފަހު، އޭގެފަހުން ބްލެންކް ނޫނެކޭ ބުނީ އެއަށްވުރެ މަތީ ފަންތީގެ ކުލަބެއް ހުށަހެޅުން ލިބޭނެ ކަމުގެ އުންމީދުގައި ކަމަށެވެ. އޭނާ ބޭނުން ވަނީ ޗެމްޕިއަންސް ލީގްގައި ކުޅޭނެ ޓީމެކެވެ.
ސްޕެއިންގެ ފުޓްބޯޅައިގައި އުފެދެމުން އަންނަ އާ ބާރެއް ކަމަށްވާ ސެވިއްޔާއިން، ބްލެންކަށް ހުށަހެޅީ، އެޓީމުގެ މިހާރުގެ ކޯޗް ހޯޖޭ ސަމްޕައޮލީ، މިސީޒަނަށް ފަހު އެޓީމު ދުޚޮށްލާނެ ކަމަށް ބެލެވިފައި ވުމުންނެވެ. ސަމްޕައޮލީ ގެންދަން، އިންޓަމިލާން އާއި އާޖެންޓީނާގެ ގައުމީ ޓީމުންވެސް ވަނީ ޝައުގުވެރިކަން ފާޅުކޮށްފަ އެވެ.
ބްލެންކް ކޯޗަކަށް ގެނައުމަށް، ސެވިއްޔާއިން އޭނާއާ ވާހަކަ ދައްކަން ބޭނުންވި ނަމަވެސް، އެކަމާ ބެހޭގޮތުން ބްލެންކްގެ ފަރާޓުން ވަކި ޖަވާބެއް ދީފަ އެއް ނުވެ އެވެ. ސަމްޕައޮލީ ގޮސްފިނަމަ، ސެވިއްޔާގެ ވިސްނުން މިހާރު ހުރީ، ސެލްޓަވީގޯގެ ކޯޗް އެޑްވާޑޯ ބެރިއްސޯ ގެނައުމުގެ ވިސްނުމެވެ. ޗެމްޕިއަންސް ލީގް ކުޅޭ ސެވިއްޔާގެ ޓީމަށްވެސް ބްލެން ނޫނެކޭ ބުނީ، ބާސާއިން އޭނާ އަށް ހުށެޅުން އަތުވެދާނެ ކަމަށް ބަލައެވެ.
ބާސާގެ ކޯޗަކަށް ގެނައުމަށް އެޓީމުން ވިސްނަނީ، ކުރިން އެޓީމަށް ކުޅުނު ކުޅުންތެރިޔެކެވެ، ބްލެންކް ބާސެލޯނާ އަށް އެއް ސީޒަންގައި ކުޅެފަ އެވެ. ނަމަވެސް، ބާސާއިން އެކުލަވާލައިފައިވާ ހަ ކޯޗުންގެ ލިސްޓްގައި ބްލެންކްގެ ނަމެއް ހިމެނިފަ އެއް ނުވެ އެވެ. އޭނާގެ ނަން އަންނަނީ ހަތް ވަނަ އަށެވެ.
ބާސާއިން ވަނީ ލިސްޓްގައި ހިމެނުނު ހަ ކޯޗުންގެ އެޖެންޓުންނާއެކު ފަރަތަމަ މަރުހަލާގެ މުއާމަލާތްތަކެއް ކޮށްފަ އެވެ. ނަމަވެސް ބްލެންކް ނުވަތަ އޭނާ އެޖެންޓާވެސް ބާސާއިން މުއާމަލާތް ކޮށްފައެއް ނުވެ އެވެ. ބާސާއިން އެކުލަވާލާފައިވާ ހަ ކޯޗުންގެ ލިސްޓްގައި އެންމެ ފުރަތަމަ ނަމަކަށް ހިމެނެނީ އެތުލެޓކް ބިލްބާއޯގެ ކޯޗް އެރުނެސްޓޭ ވަލްވެރުޑޭ އެވެ. ބެލެވޭގޮތުގައި ބާސާއިން އެއްބަސްވުމަކަށް ދާނީ އޭނާއާ އެކު އެވެ.