މި ސީޒަނަށްފަހު، ފުޓްބޯޅަ ކުޅުން ހުއްޓާލަފާނެ ކަމުގެ އިޝާރާތެއް ޗެލްސީގެ ކެޕްޓަން ޖޯން ޓެރީ ދީފި އެވެ.
މި ސީޒަންގައި ފުރަތަމަ 11 އިން އާއްމުކޮށް ޖާގަ ނުލިބޭ ޑިފެންޑަރަށް، ރޭ، ވަޓްފޯޑާ ދެކޮޅަށް ކުޅުނު މެޗުގައި، ވަނީ ފުރުސަތު ދީފަ އެވެ.
ލީގް ޗެމްޕިއަކަން ކަށަވަރުކޮށްފައިވާ ޓީމުގެ ފުރަތަމަ 11 އިން ޓެރީ އަށް ދިން ފުރުސަތަކީ، މިދިޔަ އަހަރު ސެޕްޓެމްބަރު މަހަށްފަހު އޭނާ އަށް ފުރަތަމަ 11 އިން ފުރުސަތު ދިން ފުރަތަމަ ފަހަރެވެ. ވަޓްފޯޑް އަތުން 4-3 ން މޮޅުވި މެޗުގައި ޗެލްސީގެ ފުރަތަމަ ލަނޑު ޖަހއި ލީޑް ނަގައިދިނީވެސް ޓެރީ އެވެ.
މީގެ ކުރިން ޓެރީ ބުނެފައި ވަނީ، ޗެލްސީ ދޫކޮށް ލުމަށް ފަހުވެސް، ޕްރިމިއާ ލީގްގެ އެހެން ކުލަބަކަށް ކުޅެން ބޭނުންވާ ކަމަށެވެ. ބާވިސް އަހަރު ވަންދެން، ޗެލްސީއަށް ކުޅުނު ކުޅުންތެރިޔާ، މިހާރު ބުނަނީ އޭނާ އޭރު ގެނގުޅުނު ވިސްނުން އަލުން މުރާޖާ ކުރުމުގެ ފުރުސަތު އެބައޮތް ކަމަށެވެ.
"އަހަރެން އަމިއްލައަށް ބަދަލުކޮށްލިން ބެންޗުގައި އިދެ އަހަރެން ދެކޭ ގޮތް، ބެންޗުގައި އިދެގެން ތަފާތު ނަޒަރަކުން ބަލާލީމަ އަހަންނަށް ބެންޗުގައި އިންނަޖެހުމުން އެހީތެރިވޭ، ކުރިމަގުގައި މެނޭޖްމެންޓް ލެވަލްގައި މަސައްކަތް ކުރާއިރު، އެކަމުން އަހަންނަށް އެހީއަކަށް ވާނެ، އަހަރެން ބޭނުން ނުވާނެ ޒުވާން ކުޅުންތެރިންނަށް ލިބޭ ކުރިއެރުމަކަށް ހުރަސް އެޅޭ މީހަކަށް ވާކަށް، އެއީ އަހަރެންގެ ނިންމުން ބިނާވާނެ ކަމަކީ. " ޓެރީ ބުންޏެވެ.
ޗެލްސީގެ ކޯޗް، އެންޓޯނިއޯ ކޮންޓޭ ބުނެފައި ވަނީ، ޗެލްސީ ދޫކޮށްލަން ނިންމި ނިންމުމަކީ ޓެރީ އަމިއްލައަށް ނިންމި ނިންމުމެއް ކަމަށާއި ސަބަބަކީ އަބަދުވެސް ބަރާބަރަށް ކުޅެން އޭނާ ބޭނުންވާތީ ކަމަށެވެ.