އިޓަލީގެ ފިއޮރެންޓީނާގެ ކޯޗްކަން އަލުން ހުށަހަޅާއިފިނަމަ، ނޫނެކޭ ނުބުނާނެ ކަމަށް، ލެސްޓާ ސިޓީގެ ކުރީގެ ކޯޗް ކްލައުޑިއޯ ރަނިއޭރީ ބުނެފި އެވެ.
ރަނިއޭރީ ވަނީ 1993 ން 1977 ށް ފިއޮރެންޓީނާއަށް ކޯޗް ކޮށްދީފަ އެވެ. އެ މުއްދަތުގައި އޭނާ ވަނީ، އެޓީމު ދެ ވަނަޑިވިޝަނުން ފުރަތަމަ ޑިވިޝަނަށް ގެންގޮސްދީފަ އެވެ. އަދި އޭނާ ވަނީ، އާޖެންޓީނާގެ ފުޓްބޯޅަ ލެޖެންޑް ގެބްރިއަލް ބަޓިސްޓޫ އާއި ޕޯޗްގަލްގެ ރުއީ ކޯސްޓާއާ އެކު، އެޓީމަށް ދެ ތަށި ހޯދައިދީފަ އެވެ.
ފިއޮރެންޓީނާގެ ކޯޗްގެ ގޮތުގައި ދެ އަހަރުގެ ކޮންޓްރެކްޓެއް ރަނިއޭރީއަށް ހުށަހެޅުމުން، އޭނާ އެކަމަށް ނުނެކޭ ބުނެފައިވާ ކަމަށް އިޓަލީގެ ފުޓްބޯޅައިގެ ޚަބަރުތައް ގެނެސްދޭ ނޫސްތަކުން ބުނި ނަމަވެސް، ރަނިއޭރީ ބުނެފައި ވަނީ އެފަދަ ހުށަހެޅުމެއް އައިސްފައި ނުވާ ކަމަށެވެ.
"އަހަރެން، އަލުން ފިއޮރެންޓީނާގެ ކޯޗަކަށް ހިނގައިދާނެ ތޯ،؟ އެ ޓީމުގެ ފަރާތުން އަހަންނަށް އެއްވެސް ހުށަހެޅުމެއް ނުލިބޭ، ނަމަވެސް މިހާލަތުގައި އެމީހުން ހުށަހަޅައިފިނަމަ އަހަރެން ނޫނެކޭ ނުބުނާނަން،" ރަނިއޭރީ ބުންޏެވެ.
"އަހަންނަށް އެނގޭ، ފިއޮރެންޓީނާގެ ކޯޗަކަށް ވުމަކީ ކިހާވަރެއްގެ ކަމެއްކަން، އެއީ މެދުކެނޑުމެއްނެތި ޖަޒުބާތުތަކެއް އެކަމުގައި ހުންނަ ކަހަލަ ޓީމެއް، ހަމަޖެހިލައިގެން ނީންދެވޭނެ ހާސް ކަން ކޮންމެ ދިމާއަކުން ކޮންމެ ކޮތަގަށްވެސް އައިސްފާނެ ނަމަވެސް އެއީ ވަރަށް ފުރިހަމަ ވަޒީފާއެއް، އަހަރެން ކޮންމެ މީހަކަށްވެސް ލަފާ ދެން ފިއޮރެންޓިނާގެ ކޯޗް ކަމާ ހަވާލުވާން."
ރަނިއޭރީ ބުނީ، އެ ޓީމުގެ ސަޕޯޓަރުންގެ ފަރާތުން އަބަދުވެސް ފިއޮރެންޓީނާގެ ކޯޗަކަށް ހުންނަ މީހަކަށް އެއްބަޜުލުން ލިބޭނެ ކަމަށާއި، ސަޕޯޓަރުން އަބަދުވެސް ކޯޗަކަށް ހުންނަ މީހެއްގެ ކިބައިން ގިނަ އުންމިދުތަކެއް ކުރާނެ ކަމަށެވެ.
ފިއޮރެންޓީނާގެ ކޯޗްގެ މަގާމުގައި މިހާރު ހުރި، ޕޯޗްގަލްގެ ޕައުލޯ ސޯޒާ، މިސީޒަނަށްފަހު އެޓީމު ދުކޮށްލާތީ، އޭނާގެ ބަދަލުގައި ފިއޮރެންޓީނާއިން ދަނީ ކޯޗަކު ހޯދަމުން ނެވެ. ފިއޮރެންޓީނާގެ ވިސްނުން ހުރީ، އިންޓަމިލާންގެ ކޯޗް ކަމުން ވަކިކޮށްފައިވާ ސްޓެފަނޯ ޕިއޯލީ އެ ޓީމުގެ ކޯޗް ކަމަށް ގެނައުމަށެވެ. ޕިއޯލީ ވަނީ، ރަނިއޭރީގެ ކޯޗް ކަމުގެ ދަށުން، ފިއޮރެންޓީނާ އަށް ކުޅެފަ އެވެ.
ރަނިއޭރީވެސް ބުނީ، ޕިއޯލީ އަކީ ފިއޮރެންޓީނާގެ ކޯޗް ކަމަށް އެކަށީގެންވާ މީހެއް ކަމަށާއި އަދި އޭނާ ފިއޮރެންޓީނާއަށް ހިތްހަމަ ޖެހުން ގެނެސްދޭނެ ކަމަށެވެ.