ސެއިންޓް އެޓިއަންގެ މައްޗަށް 2-0 ގެ ނަތީޖާ އަކުން ކާމިޔާބު ހޯދައި، ބާކީ އެއް މެޗު އޮއްވައި، އޭއެސް މޮނަކޯއިން ފާންސް ލީގްގެ ޗެމްޕިއަންކަން ހޯދައިފި އެވެ.
އެ ޓީމު ވެފައި މިވަނީ، މިދިޔަ ހަތަރު އަހަރު ލީގްގައި ޕީއެސްޖީ ޑޮމިނޭޓް ކުރަމުން ކުރަމުން ދިޔަ، ޕީއެސްޖީ ހުއްޓުވާލި ޓީމަށެވެ. މިއީ ދެހާސް ވަނަ އަހަރުގެ ފަހުން، މޮނަކޯ ލީގް ޗެމްޕިއަންކަން ހޯދި ފުރަތަމަ ފަހަރެވެ.
އަދި މިއީ އެޓީމުން، ލީގް ކާމިޔާބު ކުރި އަށް ވަނަ ފަހަރެވެ. ލީގް އެންމެ ގިނައިން ކާމިޔާބު ކޮށްފައި ވަނީ އެޓިއަން އެވެ. އެޓީމު ވަނީ 10 ފަހަރަށް ލީގް ކާމިޔާބު ކޮށްފަ އެވެ.
ޕޮއިންޓަކުން ފުއްދާލައިގެން ވެސް ލީގް ޗެމްޕިއަންކަން ކަށަވަރު ކުރެވެން އޮތް މޮނަކޯ އަށް، މެޗުވީ މާފަސޭހަ މެޗަކަށް ނޫނެވެ. މެޗުގެ ކުރީ ކޮޅު، އެޓިއަންގެ އެލެކްސެންޑާ ސޯޑަލުންޑް ވަނީ ބޯލުން ފޮނުވާލި ބޯޅަ އެއްގައި މޮނަކޯގެ ގޯލަށް ނުރައްކާ ކޮށްފަ އެވެ. ނަމަވެސް، މޮނަކޯގެ ކީޕަރު ޑެނިއަލް ސްބަސިޗް ވަނީ އެބޯޅަ ދިފާއު ކޮށްފަ އެވެ.
ރޭގެ މެޗުގައި މޮނަކޯގެ ތަރިއަކީ، ޒުވާން ކުޅުންތެރިޔާ ކިލިޔަން އެމްބަޕޭ އެވެ. ފަލަކާއޯ ތަނަވަސް ކޮށްދިން ފުރުސަތެއްގައި، އެމްބަޕޭ ވަނީ މެޗުގެ 19 ވަނަ މިނެޓްގައި، މޮނަކޯ އަށް ލީޑް ނަގައިދީފަ އެވެ.
މެޗުގެ އެންމެ ފަހު މިނެޓްގައި ވަލޭރް ޖަމައިން ވަނީ މޮނަކޯގެ ދެ ވަނަ ލަނޑު ކާމިޔާބު ކޮށްދީފަ އެވެ. މެޗުން މޮޅުވުމުން، މޮނަކޯ އަށް 92 ޕޮއިންޓް ލިބިފަ އެވެ. އެޓީމާ ދެ ވަނައިގައި އޮތް ޕީއެސްޖީއާ ހަ ޕޮއިންޓޤގެ ފަރަގު އެބަހުއްޓެވެ. ދެ ޓީމަށްވެސް ބާކީ އެއް މެޗު އެބައޮތެވެ.