އައްޑޫ ސިޓީގެ ހިތަދޫއަށް ރޭ އެރި ނަގޫ ރޯޅީގެ ސަބަބުން ގެއްލުން ލިބުން ގެތަށް މަރާމާތު ކުރުމުގެ މަސައްކަތް އެމްއެންޑީއެފްގެ ސިފައިން ފަށައިފި އެވެ.
އެމްއެންޑީއެފް އިން މިރޭ ބުނި ގޮތުގައި އައްޑޫ ސިޓީއަށް އައި ކޮޅިގަނޑުގައި ގެއްލުން ލިބުނު ގެތަތަކުގެ ފުރާޅު މަރާމާތު ކުރުމުގެ މަސައްކަތް ފަށާއިގެން މިހާރު ކުރިޔަށް އެބަދެ އެވެ.
ރޭގެ އެ ހާދިސާގައި ހިތަދޫގެ 19 ގެއަކަށް ގެއްލުންވެފައިވާ އިރު އޭގެ ތެރެއިން 13 ގެއެއްގެ ފުރާޅު އެއްލާލުމާއި، ސީލިންގު ވަނީ ހަލާކުވެފަ އެވެ. އަދި އެތަށް ބައެއްގެ ހިފާގެންގުޅޭ ތަކެއްޗައް ވަނީ ބޮޑެތި ގެއްލުން ލިބި ބޭނުން ނުކުރެވޭ ވަރުވެފަ އެވެ.
ހިތަދޫގައި ގެއްލުންވި ގެތައް މަރާމާތު ކުރުމުގެ މަސައްކަތް ސިފައިން ފަށާފައިވާ އިރު ޑިފެންސް މިނިސްޓަރު އަދަމް ޝަރީފް އިސްކޮށް ހުންނަވައިގެން ރައީސް ޔާމީންގެ ހާއްސަ ވަފުދެއް އެ ރަށުގައި އަންނަނީ ހަރަކާތްތެރިވަމުންނެވެ. އެގޮތުން ގެތަކަށް ގެއްލުން ލިބުނު މީހުންނަށް ބޯހިޔާވެހި ކަމާއި ކާބޯތަކެތި ވަނީ ފޯރުކޮށްދީފަ އެވެ. އަދި ރައީސް ވަނީ އެއާއިލާތަކަށް އެހީއެއް ވުމަށް ވެސް ނިންމަވާފަ އެވެ.