ޝަރީއަތަކާ ނުލައި ދެ އަަހަރު ދުވަހުގެ މުއްދަތަކަށް ކުށުގެ ތުހުމަށް މީހުން ހައްޔަރުކޮށްފައި ބެއިތިއްބުމުގެ ބާރު ލިބިދޭ ޓެރަރިޒަމާ ބެހޭ ހަރުކަށި ބިލެއް މެލޭޝިއާގެ ގާނޫނު ހަދާ މަޖިލީހުން ފާސްކޮށްފި އެވެ.
މި ބިލް ފާސްކޮށްފައި މި ވަނީ މެލޭޝިއާގެ ކުއާލަ ލަމްޕޫރުގައި ޓެރަރިސްޓް ހަމަލާތަކެއް ދޭން އުޅޭ ކަމުގެ ތުހުމަތަށް 17 މީހަކު ހައްޔަރުކުރިތާ ދެ ދުވަސް ފަހުންނެވެ. ހޯމް މިނިސްޓަރު ޒާހިދް ހާމިދީ ވިދާޅުވީ ހައްޔަރުކުރި މީހުންގެ ތެރޭގައި 14 އަހަރުގެ ކުއްޖަކު ވެސް ހިމެނޭ ކަމަށެވެ. އެ މީހުން ރާވަމުން ދިޔައީ ސިފައިންނާއި ފުލުހުންގެ މަރުކަޒުތަކަށް ހަމަލާދީ އެ ތަންތަނުން ހަތިޔާރު ހޯދަން ކަމަށް ވެސް މިނިސްޓަރު ވިދާޅުވެފައިވެ އެވެ.
ޓެރަރިޒަމްގެ ތުހުމަތުގައި ހައްޔަރުކުރާ މީހުން ދެ އަހަރު މުއްދަތަށް މި ގާނޫނުގެ ދަށުން ހައްޔަރުކޮށްފައި ބެހެއްޓުމުގެ ބާރު ލިބޭއިރު، ބަންދުކޮށްފައި ބެހެއްޓުމުގެ މުއްދަތު ކަނޑައަޅާނީ، ކޯޓުގެ ބަދަލުގައި ޓެރަރިޒަމާ ބެހޭ ބޯޑުންނެވެ. އަދި ޓެރަރިޒަމްގެ ހަރަކާތްތަކުގައި ބައިވެރިވާން އެހެން ގައުމުތަކަށް ދަތުރުކުރާ މެލޭޝިއާ މީހުންނާއި ބިދޭސީންގެ ޓްރެވަލް ޑޮކިއުމަންޓް ހިފަހައްޓައި ބާތިލް ކުރުމުގެ ބާރު ވެސް މި ގާނޫނުގެ ދަށުން ލިބޭނެ އެވެ.
މި ބިލަށް އަމަލު ކުރެވޭނީ ސެނެޓުން ފާސްކުރުމުންނެވެ. ސެނެޓްގެ ކޮންޓްރޯލް އޮތީ ވެރިކަންކުރާ ކޯލިޝަނަށް ކަމަށް ވާތީ ބިލް ފާސްވާނެ ކަމަށް ބެލެވެ އެވެ.
މި ބިލް އެކުލަވާލާފައި ވަނީ މިހާރު އަމަލުކުރަމުންދާ އިންޓާނަލް ސެކިއުރިޓީ އެކްޓްގެ ބަދަލުގަ އެވެ.
އިންސާނީ ހައްގުތަކަށް ވަކާލާތުކުރާ ޖަމާއަތްތަކުން ވަނީ މި ބިލާ މެދު ކަންބޮޑުވުން ފާޅުކޮށްފަ އެވެ. އަދި މެލޭޝިއާގެ އިދިކޮޅު ޕާޓީތަކުން ވެސް ބުނަމުން ދަނީ މިއީ ބާރުގެ ބޭނުން ނަހަމަ ގޮތުގައި ހިފައި މީހުންނަށް ނުހައްގުން އަނިޔާ ލިބިދޭނެ ގާނޫނަކަށް ވެދާނެ ކަމަށެވެ. --ބީބީސީ