އެމެރިކާގެ ޑްރީމް ހޮޓެލް އިން ރާއްޖޭގައި ދެ ރިސޯޓެއް ތަރައްގީ ކުރަން މަސައްކަތް ކުރަމުންދާ ކަމަށް އެ ކުންފުނިން ބުނެފި އެވެ.
ޓޫރިޒަމް ހަބަރުތައް ގެނެސްދޭ އޮންލައިން ނޫސްތަކަށް ދީފައިވާ އިންޓަވިއުއެއްގައި ސެއިންޓް ސިންގް ޗެޓްވަލް ވިދާޅުވީ އެ ކުންފުނިން ޓޫރިޒަމް ވިޔަފާރީގައިއާ ގިނަ މަޝްރޫއުތަކެއް ފެށުމަށް ނިންމާފައިވާ ކަމަށެވެ. މިގޮތުން ރާއްޖޭގައި ދެ ރިސޯޓެއް ހިންގަން ފަށަން މަސައްކަތް ކުރާ ކަމަށް އޭނާ ފާހަގަ ކުރެއްވި އެވެ.
ޑްރީމް ހޮޓެލްއިން ރާއްޖޭގައި ތަރައްގީކުރާ އެއް ރިސޯޓަކީ "މާގާ މޯލްޑިވްސް" އާއި "ގަސްވެލި މޯލްޑިވްސް" އެވެ. މިދެ ރިސޯޓު ހުޅުވަން ތައްޔާރުވަމުންދަނީ 2019 ވަނަ އަހަރާއި 2020 ވަނަ އަހަރު އެވެ.
އެ ކުންފުނިން ތަރައްގީ ކުރާ މާގާ މޯލްޑިވްސްގައި 80 އަލްޓްރާ ލަގްޒަރީ ވިލާ އާއި ހަ ބީޗު ވިލާ އަދި ދެ ފްރެސިޑެންޓް ވިލާ ހުންނާނެ އެވެ. މީގެ އިތުރުން މ. ގަސްވެލި މޯލްޑިވްސްއަކީ 500 ވިލާގެ ރިސޯޓެކެވެ. މި ރިސޯޓުގައި ހިތްގައިމު ވެލްނަސް ސެންޓަރެއް ވެސް ހުންނާނެ އެވެ.
އެމެރިކާގެ ޑްރީމް ހޮޓެލްއިން ރާއްޖޭގައި އިންވެސްޓް ކުރަން ނިންމިއިރު، ސަރުކާރުން ދަނީ ގިނަ ރިސޯޓުތަކެއް މާކެޓަށް ނެރެން މަސައްކަތް ކުރަމުންނެވެ.