ފޮނި ކާ އެއްޗަކީ އެއާ ނުލައި ކެއުން ފުރިހަމަ ނުވާނެ އެއްޗެއްސެވެ. މެންދުރުގެ ކުއުން ކަމަށް ވިޔަސް، ރޭގަނޑުގެ ކެއުން ކަމަށް ވިޔަސް، އެންމެ ފަހު ކަމަކަށް ފޮނި ކާއެއްޗެއް ކާނުލައި ހިތް ހަމައެއް ނުޖެހޭނެ އެވެެ. ޕާޓިއަކަށް ދިޔަ ނަމަވެސް އެންމެ އިންތިޒާރު ކުރެވޭނީ "ޑެޒާޓް" އަށް އިންސާފުކޮށްލުމަށް ލިބޭނެ ވަގުތަކަށެވެ. މަދު އެއްޗެހީގައި ފަސޭހަ ކަމާއެކު ހަދާލެވޭ އެއްޗެއް ތައްޔާރު ކޮށްލަމާ ހިނގާށެވެ.
ބޭނުންވާ ތަކެތި
2 ބޮނޑި ގްރެހަމް ކްރެކާޒް
2 ޕެކެޓު ވެނިލާ ފުޑިން މިކްސް
3 ޖޯޑު ކިރު
2 ޖޯޑު ވިޕްޑް ކްރީމް
2 ޖޯޑު ޗޮކްލެތު ފްރޮސްޓިން
ތައްޔާރު ކުރާނެގޮތް
އެންމެ ފުރަތަމަ ޓްރޭއެއްގައި ބިސްކޯދު އަތުރާށެވެ. ދެން، ބޮޑު ވެނިލާ ޕުޑިން މިކްސް ގެ ތެރެއަށް ކިރު އަޅައި އެއްކޮށްލާށެވެ. އެއަށްފަހު ޕުޑިން މިކްސްޗގެ ތެރެއަށް ވިޕްޑް ކްރީމް އަޅައި އަލުން ވެސް އެއްކޮށްލާށެވެ. އެއަށްފަހު ޓްރޭގއި އަތުރާފައި ހުރި ބިސްކޯދުތަކުގެ މައްޗަށް ޕުޑިން ލޭޔާއެއް އަޅައި އެއްވަރު ކޮށްލާށެވެ. ދެން އަލުން ވެސް މަތީގައި ބިސްކޯދު އަތުރާލާށެވެ. އަދި ޕުޑިން މިކްސްޗާގެ ލޭޔާއެއް އަލުން ވެސް އަޅާލާށެވެ. އަނެއްކާ ވެސް މަތީގައި ބިސްކޯދު އަތުރާލާށެވެ. ދެން ޗޮކްލެޓް ފޮރޮސްޓިން ގެ ލޭޔާއެއް އަޅާލާށެވެ. ދެން ގަޑިއިރު ވަންދެން އައިސް އަލަމާރީގައި ފިނިކޮށްލަން ބަހައްޓާށެވެ.
މިއީ ޗޮކްލެޓް އެކްލެޔާ ޑެޒާޓު ތައްޔާރު ކުރާ ގޮތެވެ. މި ގޮތަށް ޕުޑިން ތައްޔާރު ކުރުމަށް ބޮސްކޯދު އަތުރާއިރު ބިސްކޯދު ކިރަށްލާ ފާ ކޮށްފައި ވެސް އެޅިދާނެ އެވެ. ނޫންނަމަ މިގޮތަށް ވެސް ހެދިދާނެ އެވެ. ސަބަބަކީ ކިރަށްލައި ފޯ ނުކުރި ނަމަވެސް ޕުޑިންގެ ސަބަބުން ބިސްކޯދުތައް ފާ ވާނެތީ އެވެ.
މީގެ އިތުރުން މިއީ ގިނަ އިރުތަކެއް ތައްޔާރު ކުރުމަށް ނުނަގާ، މަދު އެއްޗެހީގައި ތައްޔާރު ކޮށްލެވޭ އެއްޗަކަށް ވުމުން ރޯދަ މަހު ތައްޔާރު ކޮށްލަން ވަރަށް ރަނގަޅު ވާނެ އެއްޗެކެވެ. ވަގުތު ސަލާމަތް ވުމުގެ އިތުރުން އެހާމެ މީރު ވެސް އެއްޗެކެވެ.