ގދ. މަޑެވެއްޔަށް ނިސްބަތްވާ މޫމިން ޔޫސުފް އަދި އައިޝަތު ޝާހީއަށް ލިބުނު ފުރަތަމަ ދަރިފުޅު، ނީރާ ބިންތި މޫމިން ޔޫސުފަކީ އުފެދުމުގައި މަދުން ނޫނީ ނުފެންނަ ޖެނެޓިކް މައްސަލައެއް ކަމަށްވާ ހާނިއޭޝަން އޮޕް އެބްޑޮމެން ކޮންޓެންޓްސް އަދި ކޮންޖެންޓިއަލް ހާޓް ޑިސީސް ދިމާވެފައިވާ ކުއްޖެކެވެ. އަދި އެންމެ ނުވަ ދުވަސްވީ ނީރާ އުފަންވިއިރު ހިތް ހުރީ ބޭރަށް ނިކުމެފަ އެވެ. އޭނާއަށް އެހީ ހޯދުމަށް ޒުވާނުންތަކެއް ވަނީ މިދިޔަ ހަފުތާ ބަންދުގައި ކާމިޔާބު ހަރަކާތެއް ކުރިއަށް ގެންގޮސްފަ އެވެ.
އެ ޒުވާނުން ފަންޑް ފޮށި ހިފައިގެން މާލޭގެ އެކި ސަރަހައްދުތަކުގައި ކުރި މަސައްކަތުން ވަނީ ޖުމްލަ 232718 ރުފިޔާ ހޯދާފަ އެވެ. އަދި 644 ޑޮލަރާއި 4040 އިންޑިއަން ރުޕީސް އާއި 910 ސްރީލަންކާ ރުޕީސް އާއި 20 ޔޫރޯ އެއްކޮށްފަ އެވެ. އެ ފައިސާ މިހާރު ވަނީ ނީރާގެ އާއިލާއާ ހަވާލުކޮށްފަ އެވެ.
ހިލޭ ސާބަހަށް މަސައްކަތް ކުރާ މި ޒުވާނުން މީގެކުރިން ވެސް ވަނީ ސިކުނޑިއަށް ލޭ އެޅި ފުރާނަ ނުރައްކަލަކަށް ހުށަހެޅުނު ނ. ވެލިދޫ ޑިއަރެސްޓް ވިލާ، 12 އަހަރުގެ އައިމިނަތު އަނާ އިބްރާހިމަށް އެހީ ހޯދުމަށް ކާމިޔާބު ހަރަކާތެއް ކުރިއަށް ގެންގޮސްފަ އެވެ.
އެ ޒުވާނުންގެ އިތުރުން ވެސް ނީރާއަށް އެހީ ހޯދުމަށް އެކި ރަށްރަށުގައި ގިނަ ހަރަކާތްތަކެއް ދަނީ ހިނގަމުންނެވެ.
ތުއްތު ނީރާއަށް މިހާރު ވެސް ވަނީ ބޮޑެތި އޮޕަރޭޝަންތަކެއް ކުރަންޖެހިފަ އެވެ. ބޮޑެތި އޮޕަރޭޝަންތަކެއް ކުރަންޖެހިފައިވާއިރު އެކަމަށް ބޮޑެތި ހަރުތަކެއް ހިނގަ އެވެ. އެ އާއިލާގެ އެދުމަކީ ނީރާގެ ފުރާނަ ސަލާމަތް ކުރުމަށް ހެޔޮ އެދޭ ފަރާތްތަކުގެ އެހީ ދިނުމެވެ.
ނީރާއަށް އެހީތެރިވުމަށް
- ގުޅޭނެ ނަންބަރު: 9994801 \ 7864485
- އެކައުންޓް: Moomin Yusuf 7710531838101