ފްރެންޗް ކަޕްގެ ފައިނަލްގެ އިތުރު ވަގުތުގެ ތެރޭގައި އެންޖާސްގެ ކުޅުންތެރިއެއް އަތުން ބައިކޮޅަށް ވަން ލަނޑާއެކު، 1-0 އިން އެންޖާސް އަތުން މޮޅުވެ، ޕީއެސްޖީ ފްރެންޗް ކަޕްގެ ތަށި ރޭ އުފުަލާލައިފި އެވެ.
ދެ ޓީމު ލަނޑެއް ނުޖެހި އެއްވަރުވެ، އިތުރު ވަގުތަށް މެޗު ދާނެ ކަމަށް ބެލެވިފައި ވަނިކޮށް، ޕީއެސްޖީގެ ކުޅުންތެރިއެއް ކޯނަރަކުން ހުރަސްކޮށްލި ބޯޅަ އެންޖާސްގެ އީސާ ސިސޯކޯ އަށް ބޮލުން އަމާޒު ކޮށްލެވުނީ އަމިއްލަ ގޯލުގެ ތެރެއަށެވެ.
މިއީ ޕީއެސްޖީ މި މުބާރާތުގެ ތަށި ކާމިޔާބުކުރި 11 ވަނަ ފަހަރެވެ. ޕީއެސްޖީ އަކީ ފްރެންޗް ކަޕްގެ ތާރީހުގައި އެންމެ ގިނަ ފަހަރު އެ ތަށި އުފުލާލި ކްލަބެވެ.
ފްރެންޗް ކަޕް ކާމިޔާބު ކުރުމަކީ ޕީއެސްޖީގެ ކޯޗު އުނާއީ އެމްރޭ އަށް ލިބުނު ފިނި ކަމެކެވެ. ޕީއެސްޖީއަށް މި ސީޒަންގައި ފްރާންސް ލީގު ތަށި ނުލިބުމާއި ޗެމްޕިއަންސް ލީގުން ކެޓުމާ ގުޅިގެން، އެމްރޭ އަށް އޮތީ ޕްރެޝަރު ބޮޑުވެފަ އެވެ.
ޕީއެސްޖީ މި ސީޒަން ނިންމާލީ ދެ ތައްޓާއެކު އެވެ. އެ ޓީމުން ވަނީ މީގެ ކުރިން މޮނާކޯ ބަލިކޮށް ފްރެންޗް ލީގު ކަޕް ކާމިޔާބުކޮށްފަ އެވެ.
އަންނަ ސީޒަންގައި އެމްރޭ ޕީއެސްޖީގެ ކޯޗުގެ މަގާމުގައި ހުންނާނެތޯ ސުވާލު އުފެދުނު ނަމަވެސް، ރޭގެ މެޗަށް ފަހު ޕީއެސްޖީގެ ސީއީއޯ ނާސިރު އަލް ހެލާފީ ވިދާޅުވީ އަންނަ ސީޒަންގައި އެމްރޭ ކޯޗަކަށް ހުންނާނެ ކަމުގެ "200 ޕަސެންޓް ޔަގީންކަން ދެން" ކަމަށެވެ.
"އަހަރެން އަބަދު ވެސް ބުނަން ޓީމުގެ ކޯޗަކަށް އެމްރޭ ދެމިހުންނާނެ ވާހަކަ. މި ކްލަބުގައި އެނާ އެ ހުރީ ހިތްހަމަޖެހިގެން އަދި އޭނާގެ މަސައްކަތާމެދު އަހަރެމެން ހިތްހަމަޖެހޭ،" ހެލާފީ ވިދާޅުވި އެވެ.
ޕީއެސްޖީގެ ކުޅުންތެރިން ތައްޓާއެކު އުފާފާޅުކުރަނީ. -- ފޮޓޯ: ޑެއިލީ މެއިލް