ކައުންސިލަރުން ހުވާކުރުމުގެ ރަސްމިއްޔާތުތައް ބޭއްވުމަށް ސްކޫލްތަކުގެ ހޯލް ހަމަޖައްސައިދެއްވުމަށް އެޑިއުކޭޝަން މިނިސްޓްރީގައި އެދިފައިވާނެ ކަމަށް ލޯކަލް ގަވަރުމެންޓް އޮތޯރިޓީ (އެލްޖީއޭ)އިން މިއަދު ބުނެފި އެވެ.
އެލްޖީއޭގެ އޮފިޝަލަކު މިއަދު ވިދާޅުވީ، ކައުންސިލަރުން ހުވާކުރުމަށް ބާއްވާ ރަސްމިއްޔާތަކީ އެލްޖީއޭއިން އިންތިޒާމްކުރާ ރަސްމިއްޔާތެއް ނޫން ކަމަށާއި އެ ރަސްމިއްޔާތު އިންތިޒާމްކުރާނީ އެ ކައުންސިލަކުން ކަމަށެވެ. ނަމަވެސް ރަސްމިއްޔާތު ބޭއްވުމަށް އެލްޖީއޭއިން މަގުފަހިކޮށްދެމުން އަންނަ ކަމަށެވެ.
އެގޮތުން އެ ރަސްމިއްޔާތުތައް ސްކޫލްތަކުގެ ހޯލުގައި ބޭއްވުމުގެ އިންތިޒާމް ހަމަޖައްސައިދެއްވުމަށް އެޑިއުކޭޝަން މިނިސްޓްރީގައި އެދިފައިވާނެ ކަމަށް އޮފިޝަލް ވިދާޅުވި އެވެ. އޮފިޝަލް ވިދާޅުވީ، ރަސްމިއްޔާތު ސްކޫލްތަކުގައި ބޭއްވުމުގެ ހުއްދަ ދިނުމަށް މިނިސްޓްރީން މިހާރު ސްކޫލްތަކަށް ވެސް އަންގާފައިވާ ކަމަށެވެ.
އެލްޖީއޭއިން މިހެން ބުނެފައިމިވަނީ މާލޭ ސިޓީ ކައުންސިލަރުން ހުވާކުރުމުގެ ރަސްމިއްޔާތު ބާއްވާނެ ތަނެއް ނުލިބި މައްސަލަ ހޫނުވެފައިވަނިކޮށެވެ. ފުރަތަމަ އެކަމަށް ދަރުބޭރުގެ ދީފައިވީ ނަމަވެސް ފަހުން ވަނީ އެ ހުއްދަ ނަގާފަ އެވެ.
މާލޭ ސިޓީ ކައުންސިލަރުންގެ ހުވާކުރުމުގެ ރަސްމިއްޔާތު ބޭއްވުމަށް މިހާރު ސްކޫލެއް ހަމަޖެއްސުމަށް މަސައްކަތްކުރަމުންދާ ކަމަށާއި ނަމަވެސް އަދި އެކަން ހަމަޖެހިފައިނުވާ ކަމަށް އެ ކައުންސިލުން ވަނީ ބުނެފަ އެވެ. މީގެއިތުރުން އައްޑޫ ސިޓީ ކައުންސިލަރުން ހުވާކުރުމަށް ވެސް ތަނެއް ވަނީ ހަމަނުޖެހި އެވެ. އެ ދެ ކައުންސިލްގެ މެޖޯރިޓީ ނަގާފައިވަނީ އިދިކޮޅު އެމްޑީޕީއިންނެވެ.
އެލްޖީއޭއިން ބުނީ، ހުވާކުރުމުގެ ރަސްމިއްޔާތަށް މެޖިސްޓްރޭޓުން ހަމަޖެއްސުމަށް ވެސް އެލްޖީއޭއިން ސުޕްރީމް ކޯޓާ ގުޅިގެން މަސައްކަތް ކުރަމުންދާ ކަމަށެވެ. ސުޕްރީމް ކޯޓުން މެޖިސްޓްރޭޓުން ކަނޑައަޅާއިރު އެ މެޖިސްޓްރޭޓުން ރަށްތަކަށް ފޮނުވުމުގެ ހަރަދުކުރަނީ އެލްޖީއޭއިންނެވެ.