ރާއްޖޭގެ ރަށެއްގެ 70 ޕަސެންޓް މީހުން ރޯދަ ނުހިފައި، ރޯދަ މަހު ދުވާލު ކައްކާ ކައިބޯ އުޅޭ ކަމަށް، އާންމު ދިން ދަރުސެއްގައި އިއްޔެ ޝެއިހް އަލީ ޒައިދު ވިދާޅުވި މައްސަލަ ހޫނުވެއްޖެ އެވެ.
ސައްތައިން ސައްތަ އިސްލާމީ ގައުމެއްގެ ރަށެއްގެ 70 ޕަސެންޓް މީހުން އެތައް ޒަމާނެއްސުރެ ރޯދަ ނުހިފާ ކަމަށް ޝެއިހް ވިދާޅުވީ، އިއްޔެ ވިޔަފާރިވެރިންގެ މިސްކިތުގައި ދަރުސް ދެއްވަމުންނެވެ. ޝެއިހް އެހެން ވިދާޅުވުމުން ސޯޝަލް މީޑިއާގައި ބޮޑެތި ފާޑުކިޔުންތަކެއް އޭނާއަށް އަމާޒުވެފައިވެ އެވެ.
ޝެއިހް އިއްޔެ ވިދާޅުވެފައިވަނީ، އޭނާ ދެކުނުގެ އަތޮޅަކަށް ކުރެއްވި ދަތުރެއްގައި މީހަކު އޭނާއަށް އެ މައުލޫމާތު ދީފައިވާ ކަމަށެވެ. އޭނާ ތަކުރާރުކޮށް އެމީހާ ސުވާލުކުރުމުން ވެސް އެ ރަށުގެ 70 ޕަސެންޓް މީހުން ރޯދަ ނުހިފާ ކަމަށް އެމީހާ އޭނާއަށް މައުލޫމާތު ދިން ކަމަށް ވެސް ޝޭހް ވިދާޅުވި އެވެ. އެހެން ނަމަވެސް ގިނަ ބަޔަކު މައްސަލަ ޖައްސަނީ އެ މައުލޫމާތުގެ ސައްހަކަން ކަށަވަރުނުކޮށް އެ ވާހަކަ އާންމު ކުރި ކަމަށްބުނެ އެވެ. އެއް ބަޔަކު ބުނާ ގޮތުގައި އެއީ ގަބޫލު ކުރެވޭނެ ވާހަކައެއް ނޫނެވެ.
ދެކުނުގެ އަތޮޅުގެ ރަށެއް ކަމަށް ޝެއިހް ވިދާޅުވި ނަމަވެސް، އެއީ ކޮން ރަށެއް ކަމެއް ވިދާޅުވެއް ނުވެ އެވެ. ރަށެއް ނުބުނެ އެފަދަ ބޮޑު ތުހުމަތެއް ޝެއިހް ކުރައްވާފައިވާތީ ވެސް ވަނީ ފާޑުކިޔާފަ އެވެ. އަދި އެފަދަ މައުލޫމާތެއް ޔަގީން ނުކޮށް ދަރުހެއްގައި ވިދާޅުވުމަކީ ގޯހެއް ކަމަށް ވެސް ބައެއް މީހުން ބުނެ އެވެ.
މިކަމާ ގުޅިގެން އިސްލާމިކް މިނިސްޓްރީގެ ކޯޑިނޭޓަރު މުހައްމަދު އަހުސަން ވިދާޅުވީ، އެ މައުލޫމާތު ޝެއިހް ލިބުނު ގޮތާއި އެފަދަ މައުލޫމާތެއް ދަރުހެއްގައި ވިދާޅުވީ ކޮން ގޮތަކުންތޯ ސާފުކުރުމަށް ޝެއިހްއާ މިނިސްޓްރީން ބައްދަލުކުރުމަށް ނިންމާފައިވާ ކަމަށެވެ.
އަހުސަން ވިދާޅުވީ، އެއީ މައްސަލައެއް ގޮތަށް ބަލަނީ ނޫން ކަމަށާއި ނަމަވެސް އެއީ ކޮން ރަށެއްތޯ ސާފުކުރުމަށް ޝެއިހްއާ ސުވާލުކުރާނެ ކަމަށެވެ.