ޒުވާން އަންހެނަކަށް ކަޓަރުން ބިރު ދައްކައިގެން ރޭ ފޭރިގެންފި އެވެ. ފޭރިގަންފައިވަނީ މާލޭ ގެސްޓް ހައުސްއެއްގައި ދިރިއުޅޭ އަންހެނެއްގެ އަތުންނެވެ.
މާފަންނުގައި ހުންނަ އެ ގެސްޓްހައުސްއަށް މޫނު ނިވާކޮށްގެން ތިބި ދެ ފިރިހެނުން ވަދެފައިވަނީ ދޮރުގައި ވަރަށް ބާރަށް ތަޅައި، ބިރު ދައްކައިގެންނެވެ.
ދޮރު ނުހުޅުވައިފިނަމަ މަރާލާނެ ކަމަށް ބުނެ ބިރު ދެއްކުމުން އެ އަންހެނާ ދޮރު ހުޅުވާފައިވާއިރު، ކޮޓަރި ތެރެއަށް ވަދެ އޭނާގެ ފޯނާއި ލެޕްޓޮޕް ވަނީ ފޭރިގަންފަ އެވެ. އޭގެ އިތުރުން އެ ކޮޓަރިއަށް އެ މީހުން ގަދަކަމުން ވަންނަން މަސައްކަތްކުރާތީ އެކަން ހުއްޓުވަން އައި ފިރިހެނެއްގެ ފޯނު ވެސް ވަނީ ފޭރިގަންފަ އެވެ.
މޫނު ނިވާކޮށްގެން ތިބި މީހުން ވަނީ އަންހެނާގެ ކަރުގައި ކަޓަރު ޖައްސައިގެން ވެސް ބިރު ދައްކާފަ އެވެ.
ފުލުހުންގެ މީޑިއާ އޮފިޝަލް ވިދާޅުވީ، މިދިޔަ ފަތިހު އެ މައްސަލަ ހުށަހަޅާފައިވާ ކަމަށެވެ. މައްސަލަ މިހާރު ތަހުގީގު ކުރަމުންދާ ކަމަށެވެ.
ޓެކްސީއަށް އަރާ މީހުންނަށް ބިރު ދައްކާ ޓެކްސީ ޑްރައިވަރެއް ފުލުހުން ވަނީ އިއްޔެ ހައްޔަރުކޮށްފަ އެވެ. އަދި މަގުމަތިން ބިރު ދައްކައިގެން ފޭރޭ ބައެއްގެ މައްސަލަ ވެސް ފުލުހުން ދަނީ ތަހުގީގުކުރަމުންނެވެ.