ރޯދަމަހަށް ހާއްސަކޮށްގެން، "އަވަސް" އާއި "ޗެނަލް 13" ގުޅިގެން ގެނެސްދޭ، "ރިދަމް" ޝޯގެ ތިން ވަނަ އެޕިސޯޑް މިރޭ އޮންނާނެ އެވެ. މިރޭގެ ޝޯ ހާއްސަކޮށްލާނީ މޯލްޑިވިއަން އައިޑޮލް އިން މިއުޒިކީ ދުނިޔެއަށް ނޭވާލި ދެބެންނަށެވެ. ހަސަން އިރުފާން (ޒަކިއްޓޭ) އަދި އިބްރާޙީމް އަމާންގެ ރީތިހޮވުންތަކެއް މިރޭ އިވިގެންދާނެ އެވެ. މިރޭ ވެސް ޝޯ ދައްކާނީ، 10:00 ގައި ޗެނަލް 13 އިން އަދި ހަމަ އެގަޑީގައި އަވަސްގެ ފޭސްބުކް ޕޭޖުންނާއި އަދި އަވަސްގެ ޔޫޓިއުބް ޗެނަލް އިން މި ޝޯ ބަލައިލެވޭނެ އެވެ.
މިއީ ޒަކިއްޓެ އާ އަމާން މިފަދަ ޕްލެޓްފޯމެއްގައި ޕާފޯމްކުރާ ފުރަތަމަ ފަހަރެވެ. މިރޭގެ ޝޯގައި ފެނިގެންދާނީ ޒަކިއްޓެ އަދި އަމާންގެ ހުށަހެޅުންތަކެއް ނޫނެވެ. ޒަކިއްޓެ އާ އެކު މުޅިން އާ ހުނަރުވެރިއެއްގެ ޕާފޯމަންސްވެސް ފެނިގެންދާނެ އެވެ. އެއީ މުޅިން އަލަށް މިއުޒިކް އިންޑަސްޓްރީއަށް ނުކުންނަ ކުއްޖެއް ކަމަށްވާ ޝާޔާ އެވެ. ޝާޔާ އާ އެކު ޒަކިއްޓެ ހުށަހަޅާނީ އެއް ލަވައެއް ނޫނެވެ. "ބިންދާލީ ރާޅެއް ހެން" އަދި "ވިހަ" އެއް ލަވައެއްގެ ގޮތުގަ އެވެ. ދެ މީހުންނަށްވެސް ވަރަށް ރީތި ދެ ލަވަ އެވެ.
ޒަކިއްޓެ އާއި އަމާން އެކުގައި މިރޭ ހުށަހަޅައިދޭނީ "ލޯބި ލޯބިން" އަދި "ދޮން ކަމަނަ" އެވެ. ހައްތަހާވެސް ކިޔާލަން އެ ފަންނާނުން ކިޔާލަން ބޭނުންވެފައި ހުރި ލަވަ އެވެ. ޒަކިއްޓެ އާ އަމާން އަދި ޝާޔާވެސް ބުނަނީ މިރޭގެ ހުށަހެޅުންތައް ވަރަށް ފުރިހަމަވާނެ ކަމަށާއި އަދި ބެލުންތެރިންނަށް ކަމުދާނެ ކަމަށް އުންމީދު ކުރާ ކަމަށެވެ. އެ ލަވަތައް މިރޭ 10:00 ގައި ޗެނަލް13 އިން ދައްކާނެ އެވެ. ނޫނީ އަވަސްއަށް ވަދެ ޝޯ ބަލައިލެވޭނެ އެވެ.
މިހާރު ޝޯގެ ޓްރެއިލާވަނީ އާންމުކޮށް ފޭނުންނަށް މި ވަނީ ދޫކޮށްލާފަ އެވެ. ޒަކިއްޓެ ބުނަނީ އެ ލަވައަށް އޭނާ ޝާޔާ ހޯދީ ކީއްވެގެންކަން ލަވަ ބަލައިލީމަ އެނގޭނެ ކަމަށެވެ. އެހެން ވީމާ މިހާރު ޓްރެއިލާ ބަލައިލާށެވެ.