ޕެޓްރޯލާއި ޑީސަލްގެ އަގު ހެޔޮކޮށްފި

ތެލުގެ ޑިއުޓީ ކުޑަ ކުރުމާއެކު، އެސްޓީއޯ އިން ވިއްކާ ޑީސަލް ލިޓަރަކުން 51ލ. ހެޔޮކޮށް ޕެޓްރޯލް ލިޓަރަކުން 30ލ. ހެޔޮކޮށްފި އެވެ.

ސަރުކާރުގެ ވިޔަފާރި ކުންފުނިން މިއަދު ބޭއްވި ނިއުސް ކޮންފަރެންސެއްގައި ތެލުގެ އަގަށް ބަދަލު ގެނެސް އިއުލާން ކުރައްވަމުން މެނޭޖިން ޑިރެކްޓަރު އަހުމަދު ޝަހީރު ވިދާޅުވީ ތެލުގެ އަގު ހެޔޮކުރީ ތެލުގެ ޑިއުޓީ ކުޑަ ކުރުމާ ގުޅިގެން ކަމަށެވެ.

"ސަރުކާރުން ދަނީ ރައްޔިތުންނަށްދޭ އަސާސީ ހިދުމަތްތަކުގެ އަގު ހެޔޮކުރުމަށް މަސައްކަތް ކުރަމުން. މިގޮތުން ތެލުގެ ޑިއުޓީ ވަނީ މިދިޔަ ހަފުތާގައި 10 ޕަސެންޓުން ފަސް ޕަސެންޓަށް ކުޑަކޮށްފަ. ހަމަމިއާއެކު މެއި މަހުން ފެށިގެން ވަނީ ރާއްޖޭގެ ހުރިހާ ޔޫޓިލިޓީ ހާއްސަކޮށް ފެނަކައިގެ ހުރިހާ ތަންތަނަށް ތެޔޮ އެޅުމުގެ ކަންކަން އެސްޓީއޯއާ ހަވާލުކޮށް. އެހެންވެ މި ބަދަލު ގެނައީ،" ޝަހީރު ވިދާޅުވި އެވެ.

އެސްޓީއޯ އިން ތެލުގެ އަގަށް ބަދަލު ގެނައުމާއެކު މިހާރު 8.95 ރުފިޔާ އަށް ވިއްކަމުން ގެންދާ ޑީސަލް ލިޓަރެއް ދެން ވިއްކާނީ 8.44 ރުފިޔާ އަށެވެ. އަދި މިހާރު 8.95 ރުފިޔާ އަށް ވިއްކާ ޕެޓްރޯލް ލިޓަރެއްގެ އަގު 8.65ރ. އަށް ހެޔޮ ވެގެންދާނެ އެވެ.

އެސްޓީއޯއިން ތެލުގެ އަގަށް ބަދަލު ގެނައިއިރު، ރޯދަ މަސް ފެށެން ކައިރިވެފައި ވަނިކޮށް ވެސް ތެލުގެ އަގު ހެޔޮކޮށްފައިވެ އެވެ. މި ބަދަލާއެކު އެފަހަރު ވަނީ ޕެޓްރޯލް ލިޓަރަކުން 20 ލާރި އަދި ޑީސަލް ލިޓަރަކުން 10ލާރި ހެޔޮކޮށްފަ އެވެ.

ސަރުކާރާއި ރައްޔިތުން ހިއްސާވާ ކުންފުނީގައި މިއަދު ބޭއްވި ނިއުސް ކޮންފަރެންސުގައި "އަވަސް" އިން ކުރި ސުވާލަކަށް ޖަވާބު ދެއްވަމުން އެމްޑީ ޝަހީރު ވިދާޅުވީ އަގު ހެޔޮކުރި އެންމެ ބޮޑު ސަބަބަކީ ޑިއުޓީ ކުޑަ ކުރުން ކަމަށެވެ. އަދި ވަރަށް ހާއްސަ އަގުތަކެއް ސްޓެލްކޯ އާއި މިފްކޯ އަދި ފެނަކައަށް ދޭން ނިންމާފައިވާ ކަމަށް ޝަހީރު ވިދާޅުވި އެވެ.

"ވަރަށް ހާއްސަ އަގެއް ދޭނަން. މި އަގުތަކަކީ ޕަބްލިޝް ކުރާ ރޭޓްތަކެއް ނޫން. ނަމަވެސް ހާއްސަ އަގެއް ދޭނެ،" ޝަހީރު ވިދާޅުވި އެވެ.

އެސްޓީއޯއިން ތެލުގެ އަގު ހެޔޮ ކުރިއިރު ދުނިޔޭގެ ބާޒާރުގައި ސާފު ނުކުރާ ތެޔޮ ފީފާއެއް ލިބެން ހުރީ 44.74 ޑޮލަރަށެވެ.