މާލޭ، ސިނާއީ އަވަށުގެ ނެރުގެ ވާހަކައިގެ އަޑު ވަރަށް ގަދަވެއްޖެ އެވެ. ނެރު ކެނޑިތާ އަހަރެއްހާ ދުވަސްވާން ކައިރިވެފައިވާއިރު މި ނެރުމަތީގައި ގިނަ ހާދިސާ ތަކެއް ވެސް ހިނގައިފި އެވެ. އަޑު ގަދަވާން ޖެހުނީ މިހެނެވެ އެވެ. މި ވީޑިއޯ އިން އެ ފެންނަނީ އެފަދަ އެއް މަންޒަރެކެވެ.
ފޭސްބުކްގައި މީހަކު ހިއްސާކޮށްފައިވާ މި ވީޑިއޯ އިން ފެންނަނީ މި ނެރުމަތީގައި އުފެދޭ ރާޅު ތަކެވެ. ވީޑިއޯ އިން ފެންނަ ގޮތުގައި މާލެ ފަޅުތެރެ އަށް ވަންނަން އަންނަ ދޯނި ނެރަށް ދިމާކޮށްލުމާއެކު އޮޑީގެ ފަހަރުން ނަގާ ރާޅުން ދޯނީގެ ކޮންޓްރޯލް ކެޕްޓަނަށް ގެއްލެ އެވެ. އަދި އެއާއެކު އައި ބާރު މިނުގައި ދޯނި ގޮސް ނެރުމައްޗަށް އެއްލައިލަ އެވެ. ނަމަވެސް ދެވަނަ ރާޅެއް ނެގުމުގެ ކުރީގައި ކެޕްޓަން ހުށިޔާރު ކަމާއެކު ދޯނި ސަލާމަތް ކުރެ އެވެ. ބެލެވޭ ގޮތުގައި މި ހާދިސާގައި އޮޑީގެ ކުރީކޮޅަށް ގެއްލުންތަކެއް ވާނެ އެވެ.
މާލެ ދެކުނު ފަރާތުގެ ނެރު ކަނޑާފައިވަނީ މި ސަރަހައްދަށް ވަންނަ އޮޑި ފަހަރަށް ފަސޭހަ އަކަށެވެ. ނަމަވެސް އަދި އެ ނެރު އެއްކޮށް ފުރިހަމަވެފަ އެއް ނުވެ އެވެ. އެހެންވެ، މި ނެރުގެ ފައިކައްޓަށް ދަނީ އޮޑި ފަހަރު އުރެމުންނެވެ. މިފަދަ ހާދިސާއެއް އެންމެ ފަހުން ހިނގާފައިވަނީ ރޭގެ ވަގުތެއްގަ އެވެ. "ސައުތު 5" ނަމަކަށް ކިޔާ 60 ފޫޓުގެ މަސް ދޯންޏެއް ވަނީ ނެރު މައްޗަށް އަރާފަ އެވެ. މި ނެރަށް ކޮންމެވެސް ގޮތެއް ހަދައި އަޑު ކަނޑުވާލަން ވެއްޖެ ނޫން ހެއްޔެވެ؟