އެމްއެމްޕީއާރުސީގެ އެއް ބިލިއަން ރުފިޔާގެ ހިޔާނާތުގައި ހިމެނޭ، އެސްއޯއެފް ކުންފުނީގެ އަތުން 160 މިލިއަން ރުފިޔާ ހޯދުމަށް އެމްއެމްޕީއާރްސީއިން ސިވިލް ކޯޓަށް ވެއްދި މައްސަލަ، އެސްއޯއެފްގެ ޣައިރު ހާޒިރުގައި ކުރިއަށް ގެންދިޔުމަށް ނިންމައިފި އެވެ.
ޣައިރު ހާޒިރުގައި މައްސަލަ ކުރިއަށް ގެންދިޔުމަށް ނިންމާފައިވަނީ، މިއަދު ބޭއްވި އެ މައްސަލާގެ އަޑުއެހުމަށް ޗިޓާ ހަވާލުވުމަށްފަހު ވެސް އެސްއޯއެފް ކުންފުނިން ހާޒިރުވެފައިނުވާތީ އެވެ.
މި މައްސަލާގެ ޝަރީއަތް ފެށި މިއީ ދެވަނަ ފަހަރަށްވާއިރު، މީގެ ކުރިން މި މައްސަލަ ކޯޓުން ބޭރުކޮށްލީ، އެމްއެމްޕީއާރްސީގެ ވަކީލް ކޯޓުގައި އޮތް އަޑުއެހުމަށް ހާޒިރުނުވާތީ އެވެ. އޭގެފަހުން އެމްއެމްޕީއާރްސީއިން ވަނީ މައްސަލަ އަނެއްކާވެސް ހުށަހަޅާފަ އެވެ.
އެ މައްސަލާގައި އެމްއެމްޕީއާރްސީއިން އެދިފައިވަނީ އެސްއޯއެފްއާއެކު އެމްއެމްޕީއާރްސީއިން ވެފައިވާ އެއްބަސްވުމުގެ ދަށުން އެމްއެމްޕީއާރްސީއަށް ލިބެންޖެހޭ 158 މިލިއަން ރުފިޔާ އާއި އެމްއެމްޕީއާރުސީން އެސްއޯއެފަށް ދޫކުރި 6.1 މިލިއަން ރުފިޔާ އެކީ އެއްފަހަރާ ހޯދުމަށެވެ.
މީގެއިތުރުން ޑޮލަރުގެ މުއާމަލާތް ކުރުމަށް އެސްއޯއެފްއާއެކު އެމްއެމްޕީއާރުސީ އިން ވެފައިވާ އެއްބަސްވުން އުވާލަން ވެސް ދައުވާގައި އެމްއެމްޕީއާރުސީން ވަނީ އެދިފަ އެވެ.
އެމްއެމްޕީއާރްސީގެ އޮޑިޓް ރިޕޯޓުން ދައްކާ ގޮތުގައި، އެމްއެމްޕީއާރްސީން އެސްއޯއެފްގެ އެކައުންޓަށް އެއް ބިލިއަން ރުފިޔާ ޖަމާކޮށްފައިވެ އެވެ. އެސްއޯފް އަކީ، ކުރީގެ ނައިބު ރައީސް އަހުމަދު އަދީބާ ގާތް ގުޅުމެއް އޮންނަ މުހައްމަދު އައްލާމް ލަތީފް (މޮހޯ) ގެ ހިއްސާ އޮންނަ ކުންފުންޏެކެވެ. އޭނާ މިހާރު އުޅެނީ ރާއްޖެއިން ބޭރުގައި ފިލައިގެންނެވެ. އޭނާ ހައްޔަރު ކުރަން އިންޓަޕޯލް ރެޑްނޯޓިސް ވެސް ނެރެފައިވެ އެވެ.
އެމްއެމްޕީއާރްސީ ހިޔާނާތުގެ މައްސަލާގައި އަދީބާއި އެ ކުންފުނީގެ ކުރީގެ އެމްޑީ އަބްދުﷲ ޒިޔަތުގެ މައްޗަށް ކުށް ސާބިތުވެ، ޖަލު ހުކުމް ވަނީ އިއްވާފަ އެވެ.