ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލާގައި ސޮއި ކުރެއްވި އެއްވެސް މެންބަރަކަށް ނާޖައިޒު ފައިދާއެއް ލިބިފައިނުވާނެ ކަމަށާއި، އެ މެންބަރުން އެ މައްސަލާގައި ސޮއި ކުރެއްވީ ގައުމީ ލޯބީގަ ކަމަށް މިހާރު އިދިކޮޅުގައި ހުންނެވި މަޑުއްވަރީ ދާއިރާގެ މަޖިލިސް މެންބަރު މުހައްމަދު އަމީތު މިރޭ ވިދާޅުވެއްޖެ އެވެ.
ޓީވީއެމްގެ ރާއްޖެމިއަދު ޕްރޮގްރާމްގައި ވާހަކަ ދައްކަވަމުން އަމީތު ވިދާޅުވީ، މަސީހުގެ އިތުބާރު ނެތް ކަމުގެ މައްސަލާގައި ސޮއި ކުރެއްވުމުގައި އެއްވެސް މަޖުބޫރު ކަމެއް ނޯންނާނެ ކަމަށާއި ޕީޕީއެމްއިން އެ މައްސަލާގައި ސޮއި ކުރެއްވި މެންބަރުން ވެސް ސޮއި ކުރައްވާފައިވަނީ އަމިއްލައަށް ކަމަށެވެ. ސޮއި އޮޅުވާލާފައިވާ މެންބަރަކު ވިދާޅުވާ ކަމަށާއި އެ މައްސަލަ ބަލާނެ ގޮތްތައް ވެސް ހުންނާނެ ކަމަށް އަމީތު ވިދާޅުވި އެވެ.
އިސްދޫ ދާއިރާގެ މެންބަރު އަހުމަދު ރަޝީދު ވަނީ އޭނާގެ ސޮއި ފޯޖްކޮށްފައިވާ ކަމަށް ތުހުމަތު ކުރައްވާފަ އެވެ. ނަމަވެސް އޭނާ ސޮއި ކުރައްވަނިކޮށް ނަގާފައިވާ ފޮޓޯއެއް ވަނީ އާންމުވެފަ އެވެ. އަމީތު ވިދާޅުވީ، އިތުރު އެހެން މެންބަރަކު އޭގައި ސޮއި ނުކުރައްވާ ކަމަށް ނުވަތަ އޮޅުވާލާފައިވާ ކަަމަށް ވިދާޅުނުވާ ކަމަށެވެ. އަދި އެ ވޯޓާ ދިމާކޮށް މެންބަރުން ރިޝްވަތު ނެންގެވި މައްސަލަތަކެއް ފުލުހުން އަންނަނީ ތަހުގީގު ވެސް ކުރަމުން އެވެ.
އަމީތު އެހެން ވިދާޅުވިއިރު އިއްޔެ ޕީޕީއެމް ޕީޖީ ގުރޫޕްގެ ޑެޕިއުޓީ ލީޑަރު އިބްރާހިމް ފަލާހު ވިދާޅުވީ، ފަސް މެންބަރެއްގެ ސޮއި އޮޅުވާލާފައިވާ ކަމަށެވެ. އެގޮތުން އެ ލިޔުމުގައި ސޮއި ކުރެއްވި އިސްދޫ ދާއިރާގެ މެންބަރު އަހުމަދު ރަޝީދު ވަނީ އޭނާ ސޮއި ނުކުރައްވާ ކަމަށާއި އެއީ ވަގު ސޮއެއް ކަމަށް ބުނެފަ އެވެ. އެހެން ނަމަވެސް އޭނާ ސޮއި ކުރައްވާ ކަމަށް ބުނާ ފޮޓޯއެއް އާންމުކުރި އެވެ. ސޮއި ކުރެއްވި ޕީޕީއެމްގެ ބައެއް މެންބަރުން ވަނީ އޭގައި ވާނީ ސައްހަ ސޮއި ކަމަށް ވެސް ވިދާޅުވެފަ އެވެ.
އަމީތު ވިދާޅުވީ، މެންބަރުން ސޮއި ކުރެއްވީ ގައުމީ ލޯބީގައި ގައުމަށްޓަކައި މަސައްކަތް ކުރެއްވުމަށް ކަމަށެވެ. މަޖިލީހުގެ ރިޔާސަތަށް ހެޔޮ ބަދަލެއް ގެންނަން އެއީ އެ ބޭފުޅުން ނިންމެވި ވަރަށް މުހިންމު ނިންމުމެއް ކަމަށެވެ. އޭގެ ހެޔޮ ނަތީޖާ އިދިކޮޅު ފަރާތްތަކުން ކުރަމުންދާ މަސައްކަތުގެ ތެރެއިން ފެނިފެންދާނެ ކަމަށް އަމީތު ވިދާޅުވި އެވެ.
"ސޮއި ކުރުމުގައި އެއްވެސް މަޖުބޫރު ކަމެއް ނޯންނާނެ، އެއްވެސް ނާޖައިޒު މަންފާއެއް މެންބަރަކަށް ދީފައެއް ނޯންނާނެ، އެބޭފުޅުން އަމިއްލަ އިހުތިޔާރުގަ ގައުމީ ލޯބީގަ ސޮއިކުރެއްވީ، އެ މައްސަލަ ކާމިޔާބުވާނެ ކަމުގެ ޔަގީންކަން ލިބިގެން މައްސަލަ ވައްދާފައި އެ އޮތީ،" އަމީތު ވިދާޅުވި އެވެ.
އަމީތު ވިދާޅުވީ، މަޖިލީހުގެ ރިޔާސަތު ބަދަލުކުރަން ޖެހިފައިވަނީ މަސީހު ވަރަށް ބޮޑަށް ހުދުމުހުތާރުކޮށް މަޝްވަރާގެ އުސޫލާ ނުލާ ކަންކަން ކުރިއަށް ގެންދަވާތީ ކަމަށެވެ. މަޖިލީހުގެ ތަޅުމަކީ ގަދަބާރުން ކަންކަން ކުރެވޭނެ ތަނެއް ނޫން ކަމަށާއި އެއީ ބަހުސް ކުރެވި މަޝްވަރާގެ މަތިން ކަންކަން ނިމިގެންދާނެ ތަނަކަށް ވާންޖެހޭ ކަމަށެވެ.
މެންބަރުންނަށް އެއްވެސް މަންފާއެއް ލިބިފައިނުވާނެ ކަމަށް އަމީތު މިރޭ ވިދާޅުވެފައިވަނީ މަސީހުގެ އިތުބާރު ނެތް ކަމުގެ މައްސަލައާ ގުޅިގެން މެންބަރުންނަށް ރިޝްވަތު ދެއްވަން މަސައްކަތްތައް ކުރަމުންދާ ކަމަށް ފުލުހުން ބުނެފައިވަނިކޮށެވެ. ފުލުހުން ބުނީ، ރޭ ވެސް ރިޝްވަތުގެ މައްސަލައެއް ހުށަހަޅާފައިވާ ކަމަށެވެ. އެ މައްސަލައާ ގުޅިގެން ޖުމްހޫރީ ޕާޓީގެ އެކްޓިވިސްޓެއް ވަނީ ހައްޔަރުކޮށްފަ އެވެ.