ގިނަ ދުވަސްތަކެއް ވަންދެން ރާއްޖެއިން ބޭރުގައި އުޅުއްވުމަށްފަހު ކުރީގެ ރައީސް މައުމޫން އަބްދުލް ގައްޔޫމް މި ހަފުތާގެ ތެރޭގައި އަނެއްކާވެސް ބޭރަށް ވަޑައިގެންނެވުމަށް ނިންމަވައިފި އެވެ.
އެމަނިކުފާނު އަންނަ ހޮނިހިރު ދުވަހު ފުރާވަޑައިގަތުމަށް ވަނީ ހަމަޖެހިފަ އެވެ. މައުލޫމާތު ލިބޭ ގޮތުގައި ރައީސް މައުމޫން ވަޑައިގަންނަވަނީ އާއިލީ ސަބަބެއްގައި ސިންގަޕޫރަށެވެ.
ސިންގަޕޫރުގައި މީގެ ކުރިން ރައީސް މައުމޫން ހުންނެވީ، އަނބިކަނބަލުންގެ ކޮއްކޯފުޅުގެ ހާލު ދެރަވެގެންނެވެ. އެމަނިކުފާނު ރާއްޖެ ވަޑައިގަތީ އާލާސްކަންފުޅާ އުޅުއްވި އާއިލީ މެންބަރު އަވަހާރަވުމާ ގުޅިގެންނެވެ. ރާއްޖެ ވަޑައިގެން އިދިކޮޅު ފަރާތްތަކުގެ ޖަލްސާގައި ބައިވެރިވެވަޑައިގެންފައިވެ އެވެ.
ރައީސް މައުމޫން ބޭރަށް ވަޑައިގަންނަވަނީ އެންޓި ކޮރަޕްޝަން ކޮމިޝަން (އޭސީސީ)އިން އެމަނިކުފާނުގެ ބަޔާނެއް ނެގުމަށް މަސައްކަތް ކުރަމުންދާ ދަނޑިވަޅެއްގަ އެވެ. ނަމަވެސް، އޭސީސީއިން އެމަނިކުފާނު ބަޔާން ދެއްވަންވީ ގޮތެއް، ދެއްވަންވީ ދުވަހެއް އަންގަވާފައެއް ނުވެ އެވެ. ރައީސް މައުމޫން ވަނީ އޭސީސީއަށް ސިޓީއަކުން އެމަނިކުފާނުގެ ދަތުރުފުޅުގެ މައުލޫމާތު ހިއްސާކުރައްވާފަ އެވެ. އަދި އެ ދަތުރުފުޅަށްފަހު ބަޔާން ދެއްވާނެ ކަމަށް ވެސް ސިޓީގައި ވިދާޅުވެފައިވެ އެވެ.
ސިޓީގައި ރައީސް މައުމޫން ވިދާޅުވެފައިވާ ގޮތުން ރާއްޖެއިން ބޭރުގައި އެމަނިކުފާނު ހޭދަކުރައްވަނީ 10 ވަރަކަށް ދުވަހެވެ.