މި ސަރުކާރު ފުރިހަމަ ބާރާ އެކު ވެރިކަމަށް އައީ ކޯލިޝަނެއްގެ ތެރެއިން އެވެ. ދުވަސްކޮޅެއް ނުވެ ޖުމްހޫރޫ ޕާޓީ އާއި އަދާލަތު ޕާޓީ ސަރުކާރާ ފެޔަށް ޖެހި، އެންމެ ފަހުން ކޯލިޝަން ރޫޅުނެވެ. އެކަމަކު ސަރުކާރުގެ ބާރު ފެނުނީ ވަރުގަދަ ކޮށެވެ. ރައީސް އަބްދުﷲ ޔާމީން އަވަހަރާކޮށްލަން އުޅުނު ހާދިސާއިން ވެސް އެމަނިކުފާނު ސަލާމަތްވެ މި ސަރުކާރު ހިންދެމިލި އެވެ. މީގެ އެއްވެސް ފަހަރަކު ސަރުކާރު "ބައްޔެއް" ނުވި އެވެ. ސިޔާސީ ގޮތުން އެތައް ބައިވަރު ހަލަބޮލި ކަމެއްގެ ތެރެއިން ވެސް ސަރުކާރު އޮތީ ވަރަށް ބަދަހިކޮށެވެ. ސަބަބަކީ ސަރުކާރަށް މަޖިލީހުގައި އޮތް ބޮޑު އަގުލަބިއްޔަތެވެ. މަޖިލިސް ތެރޭގައި އޮތް ސުޕަ މެޖޯރިޓީ އެވެ. އެކަމަކު މިހާރު އޮތީ ސުޕަ މެޖޯރިޓީ ގެއްލިފަ އެވެ. ސަރުކާރަށް ހަގީގަތުގައި މިއީ ބައްޔެކެވެ. ރައީސް އަބްދުﷲ ޔާމީންގެ ސަރުކާރަށްބައްދަލުކުރި އެންމެ ބޮޑު އަޑިގަނޑެވެ.
ސަރުކާރަށް ކުރިމަތިވެފައިވާ މި "ބޮޑު ތޫފާނުން" ސަރުކާރު ސަލާމަތް ކުރުމަށް ބައެއް ބޭފުޅުން އަތުކުރި އޮޅާއިލައިގެން ނުހަނު ބުރަކޮށް އެބަ މަސައްކަތް ކުރެ އެވެ. އެންމެ ބޮޑަށް އިސްސަފުގައި ފެންނަނީ ވަޒީރުން އެވެ. ދެން ޕީޕީއެމްގެ ނައިބު ރައީސް އަބްދުލް ރަހީމާއި ޕީޖީ ލީޑަރު އަހުމަދު ނިހާން ހުސެއިން މަނިކު އަދި ޑެޕިއުޓީ ލީޑަރު އިބްރާހިމް ފަލާހު ވެސް "ފަހު ނޭވާ"އާ ހަމައަށް ސަރުކާރުގެ ދިފާއުގައި މަސައްކަތް ކުރައްވަނީ އެވެ. މި ލިސްޓްގައި ފިޝަރީޒް މިނިސްޓަރު މުހައްމަދު ޝައިނީ އާއި އިކޮނޮމިކް މިނިސްޓަރު މުހައްމަދު ސައީދާއި ހައުސިން މިނިސްޓަރު މުހައްމަދު މުއިއްޒާއި ނިލަންދޫ ދާއިރާގެ މެންބަރު އަބްދުﷲ ހަލީލު ހިމެނިވަޑައިގަންވަ އެވެ. އެކަމަކު މި ލިސްޓަށް ދެން އިތުރުކުރާނެ އެހާ ވަރުގަދަ ނަމެއް ނުފެނުނެވެ.
ދެން ތިއްބެވި "ބޮޑެތި ބޭފުޅުން" ކޮބައި ހެއްޔެވެ؟ އަޑެއް ބަޑެއް ނީވެނީ ކީއްވެ ހެއްޔެވެ؟
ސަރުކާރު ދިފާއުގައި ކުރެއްވުމުގައި އަބަދުވެސް އެމްޑީޕީގެ ސޯޝަލް މީޑިއާގެ ބޮޑު ލަޝްކަރާ "ހަނގުރާމަ" ކުރައްވާ ވިލިފުށި ދާއިރާގެ މެންބަރު ރިޔާޒު ރަޝީދު ކޮބައިތޯ އެވެ؟ ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލަ 45 މެންބަރުންގެ ސޮޔާއެކު ހުށަހެޅުމަށްފަހު މިހާތަނަށް ރިޔާޒުގެ އެއްވެސް ބަހެއް ނުލިބެ އެވެ. ޓްވީޓެއް ނުކުރައްވަ އެވެ. ގުޅިއަސް ފޯނެއް ނުނަންގަވަ އެވެ. ޕީޕީއެމް ޕީޖީ ގުރޫޕްގެ އިސް މެންބަރެއްގެ ގޮތުގައި ވެސް ރިޔާޒު ހުންނެވިއިރު އަވަށްޓެރި ލަންކާއަށް ވަޑައިގެން އިސް މެންބަރުންގެ ވަފުދުގައި ވެސް ރިޔާޒު ހިމެނިވަޑައިނުގަންނަވަ އެވެ. ކޮންމެ މައުލޫއަކަށް ވެސް، ސަރުކާރަށް ކިޔާ ކޮންމެ ފާޑުކިޔުމަކަށް ވެސް އެންމެ ފުޅާކޮށް ޖަވާބު ދެއްވާ ރިޔާޒު، "ގެއްލިފައިވާއިރު" އޭނާގެ ބަހެއް ހޯދުމަށް ކުރި މަސައްކަތް ވެސް ކާމިޔާބެއް ނުވި އެވެ.
ރިޔާޒަށްވުރެ ވެސް ބޮޑު ނަމެއް އަދިވެސް އެބައޮތެވެ. އެމްޑީއޭގެ ލީޑަރު އަދި ރައީސް ޔާމީންއާއެކު އަބަދުވެސް ހުންނަވާ ކޯލިޝަން ޕާޓްނަރު މީދޫ ދާއިރާގެ މެންބަރު އަހުމަދު ސިޔާމް މުހައްމަދެވެ. މީގެކުރިން މަސީހުގެ އިތުބާރު ނެތް ކަމުގެ މައްސަލަ ވެއްދުމުން އެކަން ނާކާމިޔާބުކޮށްލާނެ ކަމަށް ބުނެ އެމްޑީއޭ ވެސް ހިމެނޭ ގޮތަށް ޕީޕީއެމްގެ ޕީޖީ ގުރޫޕުން ބޮޑު ނޫސްވެރިންގެ ބައްދަލުވުމެއް ބޭއްވި އެވެ. އެތާ ނެތް މެންބަރަކު ނެތެވެ. ސިޔާމް ވެސް އިންނެވި އެވެ. ވިދާޅުވި ގޮތަށް މަސީހުގެ މައްސަލަ ސަރުކާރުން ކާމިޔާބު ވެސް ކުރި އެވެ.
ނަމަވެސް މިފަހަރު މައްސަލަ ވެއްދިފަހުން ސިޔާމް އެއްޗެއް ވިދާޅެއް ނުވެ އެވެ. ބަޔާނެއް ވެސް ނުނެރުއްވަ އެވެ. ސިޔާމްގެ އެންމެ ގާތް މެންބަރުންގެ މާބޮޑު އަޑެއް ވެސް ނީވެ އެވެ. މިކަމުގައި ކުޑަހުވަދޫ ދާއިރާގެ މެންބަރު އަހުމަދު އާމިރާއި ކެނދިކުޅުދޫ ދާއިރާގެ މެންބަރު އަލީ މައުރޫފްގެ ބަހެއް ހޯދުމަށް ވެސް މަސައްކަތް ކުރީމެވެ. ނަމަވެސް އެ ބޭފުޅުންގެ ބަހެއް ލިބޭ ގޮތެއް ނުވި އެވެ. އެމްޑީއޭގެ ފަރާތުން ސަރުކާރުގެ ދިފާއުގައި ބުރަ މަސައްކަތެއް ކުރައްވާތަން ފެންނަނީ ހޯރަފުށީ ދާއިރާގެ މެންބަރު މުހައްމަދު އިސްމާއިލް އެކަންޏެވެ.
އެމްޑީއޭގެ ބަހެއް އަޑުނީވި ވަނީ، ޕީޕީއެމްގެ އެސްޖީ އަބްދުﷲ ހަލީލު ވިދާޅުވި ގޮތުގައި، އެމްޑީއޭގެ ބަހަކީ ވެސް އަދި ހިޔާލަކީ ވެސް ޕީޕީއެމްއިން ހާމަކުރާ ކަންކަމަށްވުމުންނެވެ. އެ ދެ ޕާޓީ އޮތީ ވަރަށް ބަދަހިކޮށް ކަމަށާއި މަސައްކަތް ކުރަމުންދަނީ މަޝްވަރާކުރުމަށްފަހު ކަމަށެވެ.
"އެމްޑީއޭ އާއި އަޅުގަނޑުމެން ޕީޕީއެމްއަކީ އެއް ބައެއް، އަޅުގަނޑުމެން ބުނާ ވާހަކަތަކަކީ އެމްޑީއޭގެ ބޭފުޅުންގެ ހިޔާލާއެކު ބުނާ ވާހަކަތައް، އެހެންވީމަ އެ ބޭފުޅުން ވަކި އެއްޗެކޭ ވިދާޅުނުވަނީ، އެ ބޭފުޅުން އެއްޗެއް ވިދާޅުވަނީ ވެސް އަޅުގަނޑުމެންނާ މަޝްވަރާކޮށްފަ، އަޅުގަނޑުމެންނަކީ ވަރަށް ވަރުގަދަ ކޯލިޝަނެއް، އެގޮތަށް އަޅުގަނޑުމެން ކުރިއަށް ދާނީ ވެސް،" ހަލީލު ވިދާޅުވި އެވެ.
ހަލީލުގެ މި ވާހަކައާ މަޑުއްވަރީ ދާއިރާގެ މެންބަރު މުހައްމަދު އަމީތު އެއްބަސްވެވަޑައިނުގަންނަވަ އެވެ. އަމީތު ވިދާޅުވީ، އެމްޑީއޭގެ ބައެއް މެންބަރުންނާ ދެކެވިފައިވާ ވާހަކަތަކަށް ބަލާއިރު ސަރުކާރު ޕޮލިސީ ލެވެލްގައި ކަން ހިނގަމުންދާ ގޮތުން ބައެއް މެންބަރުން ތިއްބެވީ ހިތްހަމަނުޖެހިފަ އެވެ. ޕީޕީއެމް-އެމްޑީއޭ ކޯލިޝަން އޮތީ ބަދަހި ކަމުގެ ތެރޭގައި ނޫން ކަމަށް އަމީތު ވިދާޅުވެ އެވެ.
"އެއްވެސް ހައްގަކާ ނުލާ ސިޔާސީ ފަރާތްތައް ޖަލަށްލުމާއި މިދެވޭ އަނިޔާ އާއި ސަރުކާރުގެ މައްޗަށް މިކުރެވޭ ކޮރަޕްޝަންގެ ތުހުމަތުތަކާމެދު، އަދި މިނިސްޓަރުންނާ ބައްދަލުކުރުމާއި ދާއިރާގައި ކަންކަން ކުރުމުގައި ދިމާވާ ދަތިތައް އެމްޑީއޭގެ މެންބަރުންގެ ހިތްހަމަނުޖެހުން އެބަހުރި، އެ ހިތްހަމަ ނުޖެހުން އެ ބޭފުޅުންގެ ތެރޭގައި އޮންނާނެ، ނަމަވެސް ރައީސް ޔާމީންއާއި ސިޔާމްއާ ދެމެދު އޮތީ ކިހާ ވަރެއްގެ ހިތްހަމަނުޖެހުމެއް ކަމެއް އަޅުގަނޑަކަށް ދަންނަވާކަށް ނޭނގެ، ފާހަގަވާ ކަމަކީ މިއޮތް ބޮޑު ކަންތައް ގަނޑު ހިނގަމުންދާއިރު ވެސް އެމްޑީއޭގެ ލީޑަރުގެ އެއްވެސް ބަސްފުޅެއް ނީވުން،" އަމީތު ވިދާޅުވި އެވެ.
އަމީތު ވިދާޅުވި ގޮތުގައި އެމްޑީއޭގެ މެންބަރުންނާ ވަކިވަކިން ބައްދަލުކުރެވިފައިނުވި ނަމަވެސް ޕީޕީއެމްގެ ޕީޖީ ގުރޫޕްގެ ވަކިވަކި މެންބަރުންނާ މިހާރު ވެސް ވާހަކަ ދެކެވެމުންދާ ކަމަށެވެ. ޕީޖީ ގުރޫޕްގެ ވަރަށް އިސް މެންބަރުން ވެސް ތިއްބެވީ މަސީހާ ދެކޮޅަށް ވޯޓު ދޭން ތައްޔާރަށް ކަމަށާއި، ފާޅުގައި ސަރުކާރާ ދެކޮޅު ނުވި ނަމަވެސް ގިނަ މެންބަރުންތަކެއް ތިއްބެވީ ހިތްހަމަނުޖެހިފައި ކަމަށެވެ.
"ޕީޕީއެމް ޕީޖީ ގުރޫޕްގެ ވަރަށް އިސް މެންބަރުން އެ ތިއްބެވި އަޅުގަނޑުމެންނާ ބައިއަތު ހިއްޕަވައިގެން ތިއްބެވި ބޭފުޅުން، ފެނިވަޑައިގަންނަވާނެ ޓީވީތަކަށް ވެސް ޕީޕީއެމް ޕީޖީ ގުރޫޕް މެންބަރުންގެ ތެރެއިން މި ވަޑައިގަންނަވަނީ ވަރަށް ޖޫނިއާ ދެތިން މެންބަރަކު، ސީނިއާ މެންބަރުން އެ ތިއްބެވީ، އެހެންވީމަ މީގެ ތެރެއިން ފާޅުގައި ނިކުމެވަޑައިގެން ނުތިއްބެވި ވަރަށް ގިނަ މެންބަރުން އެތިބި މަސީހުގެ އިތުބާރު ނެތް މައްސަލާގައި ވޯޓު ލެވޭ ދުވަހު މަޖިލީހުގައި މަސީހާ ދެކޮޅަށް ވޯޓު ދެއްވަން،" އަމީތު ވިދާޅުވި އެވެ.
ނަމަވެސް ހަލީލު ވިދާޅުވީ، ޕީޕީއެމްގެ ޕީޖީ ގުރޫޕްގައި މިހާރު ތިއްބެވި މެންބަރުންގެ އެއްވެސް ހިޔާލު ތަފާތުވުމެއް ނެތް ކަމަށެވެ. ހިޔާލު ތަފާތުވެފައި ތިއްބެވި މެންބަރުން އެތިއްބެވީ ބޭރަށް ފެންނަން ކަމަށެވެ.
"އެހެން މެންބަރުންގެ ތެރޭގައި ހިޔާލު ތަފާތުވުންތަކެއް ނެތް، ހަމަ ވަރަށް ބަދަހިކޮށް އޮތީ ޕީޖީ ގުރޫޕް، މަޖިލީހުގައި ނެގޭ ވޯޓު ނިމިގެންދާނީ މަސީހާ އެއްކޮޅަށް، އަޅުގަނޑުމެންގެ ހުރިހާ މެންބަރުންނަކީ ވެސް ތަރައްގީއަށް ލޯބިކުރާ މެންބަރުން، ރައީސް އަބްދުﷲ ޔާމީން ސިޔާސަތުތަކަށް ތާއިދުކުރައްވާ ބޭފުުޅުން، މިހެން ދިމާވާ ކަމެއްގަ އަދި ހިޔާލު ތަފާތުވި ނަމަވެސް،" ހަލީލު ވިދާޅުވި އެވެ.
ދަރުބާރުގޭގައި ހުރިހާ މެންބަރުން އެއްކުރައްވައި ބޮޑު ނޫސްވެރިންގެ ބައްދަލުވުމެއް މިފަހަރު ނުބާއްވަ އެވެ. ބޭއްވީ ވަރަށް ކުޑަ ނޫސްވެރިންގެ ބައްދަލުވުމެކެވެ. މީޑިއާއަށް ދައުވަތު ދޭން ވެސް ހަނދާން ނެތެވެ. އެ ބައްދަލުވުމުގައި ދެއްކީ ވެސް ސޮއި ފޯޖުކުރި ވާހަކައެކެވެ. މިހާރު އެ ވާހަކަ ވެސް ވަނީ އޮބިފަ އެވެ. އެ ވާހަކަ ދެއްކެވި ބޭފުޅުން ވެސް މިހާރު އެ ވާހަކަ ދައްކަވާ ތަނެއް ނުފެނެ އެވެ. އެ ބައްދަލުވުމުގައި ޓޫރިޒަމް މިނިސްޓަރު މޫސާ ޒަމީރު ބައިވެރިވެވަޑައިގަތެވެ. އެކަމަކު މިހާރު މޫސާ ޒަމީރު ކޮބައިތޯ އެވެ. އޭގެ ފަހުން ފެނިވެސް ނުލައްވަ އެވެ. ވެގެން މި އުޅެނީ ކީއް ހެއްޔެވެ؟
އެއް އިރެއްގައި ސަރުކާރުގައި ދިފާއުކުރެއްވުމުގައި ވަރަށް ބޮޑު މަސައްކަތްތަކެއް ކުރެއްވި އަމީތު ވިދާޅުވީ، މިހާރު ޕީޕީއެމްގެ ތެރެއިން ފެނިގެންދަނީ މަޖިލިސް މެންބަރުންނާ "ބީރައްޓެހި" ބޭފުޅުން ޕާޓީގެ ލީޑަޝިޕަށް ގެނައުމުގެ ނަތީޖާ ކަމަށެވެ. ޕީޕީއެމްގެ މަޖިލިސް މެންބަރުންގެ ހިތްހަމަނުޖެހުންތައް އިތުރުވެގެން ދިޔުމުގެ ޒިންމާ ނަގަންޖެހޭނީ ޕާޓީގެ ދެ ނައިބު ރައީސުން ކަމަށްވާ މޫސާ ޒަމީރާއި އަބްދުލްރަހީމް އަބްދުﷲ ކަމަށް އަމީތު ވިދާޅުވި އެވެ.
"އަދީބު ޖަލަށް ގެންދެވިފަހުން މެންބަރުންނާ ގުޅިގެން، އަދީބު ކުރެއްވި މަސައްކަތްތައް ކުރައްވައި މެންބަރުންގެ ހުރި ކަންބޮޑުވުންތައް ފިލުވައި ސަރުކާރުގެ ތެރެއިން ފޯރުކޮށްދޭންޖެހޭ ކަންކަން މަގު ފަހިކުރުމުގެ ޒިންމާ ވަރަށް ބޮޑަށް މޫސާ ޒަމީރާ އޮތީ ހަވާލުކުރެވިފަ، ނަމަވެސް މޫސާ ޒަމީރުވެގެން ދިޔައީ މެންބަރުންނާ ވަރަށް ބީރައްޓެހި ބޭފުޅަކަށް، އެ ބޭފުޅާއާ ފޯނުން ގުޅުއްވުމަކަށް ވެސް ފަސޭހައެއް ނޫން، ފޯނު އެ ބޭފުޅާއާ މި ގުޅެނީ ވަރަށް މަދު މެންބަރުންނަށް، އެހެންވީމަ މެންބަރުންނާ މިހާ ބީރައްޓެހި ބޭފުޅުން ޕާޓީގެ ލީޑަޝިޕަށް ވަޑައިގަތުމުން އެ ޕާޓީތަކުގަ ހިންގުންތެރި ކަމެއް ނޯންނާނެ، އެއްބައިވަންތަ ކަމެއް ނޯންނާނެ،" އަމީތު ވިދާޅުވި އެވެ. "އަނެއް ކޮޅުން އަނެއް ނައިބު ރައީސްއަކަށް ހުންނެވީ އަބްދުލް ރަހީމް އަބްދުﷲ، އެ ބޭފުޅާއަކީ ޕީޖީ ގުރޫޕްގެ މެޖޯރިޓީ މެންބަރުންގެ ހިތްހަމަ ނުޖެހުން އަމާޒުވެފައިވާ ބޭފުޅެއް، މި ދެ ބޭފުޅުންނާމެދު އޮތް ހިތްހަމަނުޖެހުމަކީ މިހާރު ޕީޖީ ގުރޫޕްގައި މިއޮތް ހިތްހަމަނުޖެހުންތަކާ ވަރަށް ބޮޑަށް ގުޅުން އޮތް ކަމެއް، އެއީ އެ ދެ ބޭފުޅުން އެކަމުގެ ޒިންމާ ނަންގަވަން ޖެހޭނެ،"
ކޮންމެއަކަސް ޕީޕީއެމްއަށް މިއީ އުނދަގޫ ދަނޑިވަޅެކެވެ. އެފަދަ ދަނޑިވަޅެއްގައި ޕީޕީއެމްގެ އެންމެ އިސް ބައެއް ބޭފުޅުންނާއި އެމްޑީއޭގެ އިސް ސަފުން އެއްވެސް އެއްޗެއް ނުބުނެ ހަނު ތިބުމަކީ ގިނަ ސުވާލުތަކެއް އުފެދި، ގިނަ ތުހުމަތުތަކެއް އުފެދޭނެ ކަމެކެވެ. މި މަހު ނެގޭ މަސީހުގެ ވޯޓު ނުވަތަ ސަރުކާރު ތާއިދު އޮތްކަން ހާމަވާ ވޯޓާމެދު އެ ބޭބޭފުޅުންގެ ސްޓޭންޑެއް އިވުން ވެސް މުހިންމެވެ.