ފަނޑިޔާރު ގެއިން މިއަދު ލިބިގެން މިދިޔައީ މައްސަލަތައް އަދުލު އިންސާފުން ގެންދާނެ ކަމުގެ އުއްމީދެއް ކަމަށް ކިނބިދޫ ދާއިރާގެ މެންބަރު އަބްދުﷲ ރިޔާޒު ވިދާޅުވެއްޖެ އެވެ. އޭނާގެ މައްޗަށް ދައުލަތުން ކުރި ދައުވާ ސާބިތުނުވާ ކަމަށް މިއަދު ކުރިމިނަލް ކޯޓުން ވަނީ ހުކުމްކޮށްފަ އެވެ.
"ޝަރީއަތުގެ މަޖިލީހުގައި ކަންކަން ހިނގައިދިޔައީ ވަރަށް އަދުލުވެރިކަމާއެކު، އަޅުގަނޑުމެންނަށް ހަމަ އެކަށީގެންވާ ފުރުސަތު ދެއްވި، ދައްކާ ބޭނުންވާ ހުރިހާ ވާހަކަތަކެއް ދައްކަން ވެސް، މިއީ އަޅުގަނޑުމެންނަށް ލިބުނު ވަރަށް ބޮޑު އުއްމީދެއް، އަދުލުވެރިކަމާއެކު ޝަރީއަތްތައް ހިނގާނެ ކަމުގެ އުއްމީދު މި ލިބިގެން ދިޔައީ، ވަރަށް ގިނަ ބަޔަކު ތުހުމަތުކުރަމުންދިޔަ ސަރުކާރުގެ އަތެއް އޮވެގެން ސިޔާސީ މީހުން ފިކްސް ކުރުމުގެ މަސައްކަތް ކުރާކަން، އެފަދަ ތުހުމަތުތައް ބައެއް ޝަރީއަތްތަކުގަ ހިނގާފައި ވެސް އެބަހުރި،" ކުރިމިނަލް ކޯޓުގެ ބޭރުގައި ހުންނަވާ ނޫސްވެރިންނާ ވާހަކަ ދައްކަވަމުން ރިޔާޒު ވިދާޅުވި އެވެ.
ރިޔާޒު ވިދާޅުވީ، އަދިވެސް އެކިކަހަލަ ތުހުމަތުތައް ސަރުކާރުން ސިޔާސީ މީހުންނަށް ކުރުން އެކަށީގެންވާ ކަމަށާއި އެކަމަށް ހުޝިޔާރުވެ ތިބެންޖެހޭ ކަމަށެވެ. ސަރުކާރަށް ވެސް ގޮވާލަނީ ސިޔާސީ ހަރަކާތްތައްތައް ހިންގުމަށް ޖާގަ ދިނުމަށް ކަމަށެވެ.
"މިއަދު ވެސް ސިޔާސީ އެކިއެކި ބޭފުޅުންގެ މައްސަލަތައް ކޯޓުގައި އާއި އެންޓި ކޮރަޕްޝަން ކޮމިޝަނުގަ އެބަހުރި، ވަކިން ހާއްސަކޮށް ސަރުކާރަށް ފާޅުގަ ފާޑުކިޔާ މެންބަރުންގެ މައްސަލަތައް ބާރު ސްޕީޑްގައި ގެންދާކަން ފާހަގަކޮށްލެވޭ، ރައީސްއަށް ވެސް އިލްތިމާސްކުރަން ބޭނުން ވަނީ ގާނޫނުގައިވާ ގޮތުގެ މަތިން ކަންކަން ކުރެއްވުމަށް، އަދި މިނިވަން މުއައްސަސާތަކަށް ވެސް ފުލުހުންނަށް ވެސް އޭސީސީއަށް ވެސް ފަނޑިޔާރު ގެއަށް ވެސް އަޅުގަނޑު އިލްތިމާސްކުރަން ބޭނުން ވަނީ ގައުމު އިސް ކުރައްވައިގެން އަދުލް އިންސާފާ އެއްގޮތަށް ކަންތައްތައް ކޮށްދިނުމަށް، ގައުމުގަ ހަމަޖެހުން އޮންނާނީ އޭރަށް،" ރިޔާޒު ވިދާޅުވި އެވެ.
ރިޔާޒު ވިދާޅުވީ، ގައުމުގައި ވަރަށް ބޮޑެތި މައްސަލަތައް އެބަހުރި ކަމަށާއި ކޮރަޕްޝަނާއި އަނިޔާވެރިކަން ވަނީ އިންތިހާއަށް ގޮސްފައި ކަމަށެވެ. ސަރުކާރުގެ ކަންކަން ގޯހުން ގޮސްފައިވާތީ، ރައީސް ޔާމީން މިހާރު ހުންނެވީ ގިނިކަންޏާ ކަމަށާއި އެމަނިކުފާނާއެކު ތިއްބެވި ލީޑަރުންނާއި މަޖިލިސް މެންބަރުން ވެސް ދުރަށް ވަޑައިގެންފައިވާ ކަމަށެވެ.
"ޝަރީއަތަށް މައްސަލައެއް ވައްދައިގެން ކުރިއަށް ގެންގޮސްދާނެ ކަމަށް ބެލެވޭ މެންބަރުންނަށް ވެސް ލިބުނު މިއީ ނަސްރެއް، އެ ބޭފުޅުން ޔަގީން ކުރައްވާ ފަނޑިޔާރު ގެއިން ވެސް އަޅުގަނޑުމެންނަށް މިއަދު މި ލިބުނީ އުއްމީދެކޭ، އެހެންވީމަ އެއްވެސް ހާލެއްގަ ކަމެއް ނުކުރަނީސް ކަމެއް ކުރި ކަމަށް ބުނެ ހުކުމްތަކެއް ނުވަތަ އަދަބުތަކެއް ދެވިގެން ނުވާނެ،" ރިޔާޒު ވިދާޅުވި އެވެ.