ދިވެހި ފިލްމް، ވިޝްކާގެ މިލްކްވެރި ފަރާތަކީ އެ ފިލްމްގެ ޕްރޮޑިއުސާ އަދި ބަތަލާ އައިޝަތު ރިޝްމީ ކަމަށް ސިވިލް ކޯޓުން މިއަދު ހުކުމްކޮށްފި އެވެ.
އެ މައްސަލާގައި ފިލްމްގެ ޕްރޮޑިއުސާ އަދި ބަތަލާ އައިޝަތު ރިޝްމީއާ ދެކޮޅަށް ސިވިލް ކޯޓަށް މައްސަލަ ވެއްދީ ފިލްމީ ދާއިރާގައި ގިނަ އަހަރުތަކެއް ވަންދެން މަސައްކަތްކޮށްފައިވާ ހަސަން ހަލީމް (ކޮކޯ ހަސަން) އެވެ. މައްސަލާގައި ކޮކޯ ހަސަން ރިޝްމީގެ މައްޗަށް ދައުވާކޮށްފައި ވަނީ "ވިޝްކާ" އަކީ އޭނާގެ މިލްކުވެރިކަމުގެ ދަށުގައި އޮތްވައި ހުއްދަ ހޯދުމެއް ނެތި ރިޝްމީ ޕްރޮޑިއުސްކޮށްފައިވާ ފިލްމެއް ކަމަށް ބުނެ އެވެ. ނަމަވެސް ކޯޓަށް ކޮކޯ ހަސަން ހާޒިރުވެފައިނުވާތީ މައްސަލަ ވަނީ ބޭރުކޮށްލާފަ އެވެ.
މައްސަލަ ބޭރުކޮށްލުން ރިޝްމީ ވަނީ އަލުން އެ މައްސަލަ ކޯޓަށް ހުށަހަޅާފަ އެވެ. ރިޝްމީ ދައުވާކުރީ، "ވިޝްކާ"ގެ ވާހަކަ ލިޔުނު އަބްދުﷲ ވިޝާމް އާއި ސްކްރީންޕްލޭ ތައްޔާރުކުރި މަހުދީ އަހުމަދާ ދެކޮޅަށެވެ. ރިޝްމީ ދައުވާކުރީ، "ވިޝްކާ"އަކީ އޭނާ ގަނެފައިވާ އެއްޗެއް ކަމަށް ބުނެ އެވެ.
މައްސަލާގައި މިއަދު އިއްވި ހުކުމުގައި ބުނެފައިވަނީ، "ވިޝްކާ"ގެ ވާހަކަ ލިޔުނު ވިޝާމް އާއި ސްކްރީންޕްލޭމަހުދީއަށް ދައްކަންޖެހޭ ފައިސާތައް ރިޝްމީ ދައްކާފައިވާ ކަމަށެވެ. ވާހަކަ ވިއްކުމަށް ރިޝްމީއާއެކު ވިޝާމް އެއްބަސްވެފައިވާ ކަމަށާއި ފިލްމްގެ ހުރިހާ ރައިޓްސްއެއް ވިއްކުމަށް މަހުދީ، ރިޝްމީއާއެކު އެއްބަސްވުމެއް ހަދާފައިވާ ކަމަށް ވެސް ހުކުމުގައިވެ އެވެ. ވާހަކަ ވިއްކާފައިވަނީ އެއްބަސްވުމުގައިވާ ގޮތުން 5،000 ރުފިޔާއަށެވެ. ހުރިހާ ރައިޓްސްއެއް ރިޝްމީއަށް މަހުދީ ވިއްކާފައިވަނީ 14،000 ރުފިޔާއަށެވެ.
އެއްބަސްވުމުގައިވާ ގޮރަށް ވިޝާމާއި މަހުދީއަށް ދައްކަންޖެހޭ ހުރިހާ ފައިސާއެއް ރިޝްމީ ދައްކާފައިވާތީ، އެ ވާހަކައާއި ސްކްރިޕްޓްގެ މިލްކްވެރި ފަރާތަކީ ރިޝްމީ ކަމަށް ހުކުމުގައި ވަނީ ކަނޑައަޅާފަ އެވެ.
ކޮކޯ ހަސަން މީގެކުރިން ބުނެފައިވަނީ "ވިޝްކާ" ގެ އޮރިޖިނަލް ވާހަކަ ލިޔުނު ފަރާތުން އެ ވާހަކައިގެ ހުރިހާ ރައިޓްސްއެއް އޭނާ އަށް ސިޓީއަކުން ދީފައިވާއިރު ފިލްމުގެ ސްކްރިޕްޓްގެ މިލްކުވެރިކަން ވެސް އޭނާ އަށް ލިބިފައިވާ ކަމަށެވެ. ނަމަވެސް ރިޝްމީ ބުނަނީ "ވިޝްކާ" އަކީ އޭނާގެ އަމިއްލަ މިލްކެއް ކަމަށެވެ.
މި މައްސަލާގައި ކޯޓުން ނިންމާ ގޮތަކަށް އިހްތިރާމްކުރާނެ ކަމަށް ކޮކޯ ހަސަން ބުނެފައިވާއިރު ބަލިވެއްޖެ ނަމަ ރިޝްމީގެ ކިބައިން މައާފަށް އެދޭނެ ކަމަށް ވެސް އޭނާ ބުނެފައިވެ އެވެ.