ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލަ ބާތިލުކުރީ އެ މައްސަލަ މަޖިލީހުގެ ޖަލްސާއަށް ހުށަހެޅޭ މިންވަރަށް ސައްހަ ސޮއި ނެތީމަ ކަމަށް މަޖިލީހުގެ ނައިބު ރައީސް ރީކޯ މޫސާ މަނިކު ވިދާޅުވެއްޖެ އެވެ.
ޓީވީއެމްއަށް މިއަދު ދެއްވި އިންޓަވިއުއެއްގައި މޫސަ ވިދާޅުވީ، މަޖިލީހުގެ ގަވައިދުގެ 175 ވަނަ މާއްދާގެ (ހ) ގައި ވަނީ މަޖިލީހުގެ ރައީސްގެ އިތުބާރު ނެތް ކަމަށް 42 މެންބަރުންނަށްވުރެ މަދު ނޫން މެންބަރުންގެ ސޮޔާއެކު ސަބަބު ބަޔާންކޮށް ހުށަހެޅިދާނެ ކަމަށެވެ. އަދި އެ މާއްދާގެ (ށ)ގައި ވަނީ އެ އަދަދު މެންބަރުންގެ ސޮޔާއެކު މައްސަލަ މަޖިލީހަށް ފޮނުވިދާނެ ކަމަށެވެ. މައްސަލަ މަޖިލީހުގެ އިދާރާއަށް 45 މެންބަރުން ސޮޔާއެކު ފޮނުވުމުން މައްސަލަ އެޖެންޑާކޮށް އެކަން މެންބަރުންނަށް އަމީނާމު އެންގެވި ކަމަށް މޫސަ ވިދާޅުވި އެވެ.
ނަމަވެސް މޫސަ ވިދާޅުވީ ގަވާއިދުގައިވާ ގޮތުން މަޖިލީހުގެ ޖަލްސާއަކަށް މައްސަލަ ހުށަހެޅޭނީ 42 މެންބަރުންގެ ސޮއި އޮވެގެން ކަމަށާއި، މިހާރު ހަތަރު މެންބަރެއްގެ ގޮނޑި ގެއްލިފައިވާތީ، 42 މެންބަރުންގެ ސޮޔާއެކު މަޖިލީހުގެ ޖަލްސާއަށް އެ މައްސަލަ ހުށަހެޅެން ނެތް ކަމަށެވެ. މައްސަލަ ބާތިލުކުރީ އެކަމަށް ބަލާފައި ކަމަށެވެ. މައްސަލައެއް މަޖިލީހަށް ހުށަހެޅުން ކަމަށްވާނީ ތަޅުމަށް ފޮނުވުމުން ކަމަށެވެ. މައްސަލަ ހުށަހެޅުމާއި ފޮނުވުމަކީ ދެ ކަމެއް ކަމަށެވެ.
ހަތަރު މެންބަރުންގެ ގޮނޑި ގެއްލިފައިވާ ކަމަށް ނިންމާފައިވަނީ އިލެކްޝަން ކޮމިޝަނުން ސުޕްރީމް ކޯޓުގެ ހުކުމަށް ރިޔާއަތްކޮށް މަޖިލީހަށް ފޮނުވާފައިވާ ސިޓީއަށް ބެލުމަށްފަހު ކަމަށް ވެސް މޫސަ ވިދާޅުވި އެވެ.
"އެ ހުކުމަށް ރިޔާއަތްކޮށް އިލެކްޝަން ކޮމިޝަނުން އަންގާފައިވަނީ އެ ހަތަރު މެންބަރުން ވަކިވެއްޖެކަން، މަޖިލީހަށް މައްސަލައެއް ހުށަހަޅާއިރު މަޖިލީހުގައި ކަނޑައަޅާފައިވާ އަދަދުތައް ހަމަވާން އެބަޖެހޭ، މައްސަލާގައި ސޮއިކުރައްވާފައިވާ އިސްދޫ ދާއިރާގެ މެންބަރު ވަނީ ސޮއި އަނބުރާ ގެންދަވާފަ، އެހެންވީމަ 45 މެންބަރުންގެ ތެރެއިން މިއަދާ ހަމައަށް އައިރު ފަސް މެންބަރެއްގެ ސޮއި މިވަނީ އުނިވެފަ، އެހެންކަމުން 42 މެންބަރުންގެ ސައްހަ ސޮއި މިހާރު ހަމައެއް ނުވޭ، ނައިބު ރައީސްގެ ހައިސިއްޔަތުން އަޅުގަނޑު މި ސިޓީ ފޮނުވީ މައްސަލަ ބާތިލުވެއްޖެ ކަމަށް،" މޫސަ ވިދާޅުވި އެވެ.
އިލެކްޝަން ކޮމިޝަނުން ގޮނޑި ގެއްލިފައިވާ ކަމަށް އިއުލާންކުރައްވާފައިވާ މެންބަރުންނަކީ، ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ވައްޑޭ) އާއި ވިލިނގިލީ ދާއިރާގެ މެމްބަރު ސައުދު ހުސައިނާއި މަޑުއްވަރީ ދާއިރާގެ މެމްބަރު މުހައްމަތު އަމީތު އަދި ދިއްދޫ ދާއިރާގެ މެމްބަރު އަބްދުއްލަތީފް މުހައްމަދެވެ.
މޫސަ ވިދާޅުވީ، އެ މައްސަލަ އޭނާ ބާތިލުކުރީ، މަޖިލީހުގެ ރައީސްގެ އިތުބާރު ނެތް ކަމުގެ މައްސަލާގެ ޖަލްސާއާ ގުޅޭ ކަންކަން ގާނޫނު އަސާސީ އާއި މަޖިލީހުގެ ގަވައިދުގައިވާ ގޮތުން ކުރައްވަން ޖެހޭނީ ނައިބު ރައީސް ކަމަށް ވާތީ ކަމަށެވެ.
އޭޖީ މުހައްމަދު އަނިލް ހުށަހެޅުއްވި ދުސްތޫރީ މައްސަލާގައި މިފަހުން ސުޕްރީމް ކޯޓުން އިއްވި ހުކުމުގައިވާ ގޮތުން އިލެކްޝަން ކޮމިޝަނުން މަޖިލީހަށް، މެންބަރަކު އިންތިހާބުވި ޕާޓީއިން ވަކިވެއްޖެކަން އަންގައިފިނަމަ، އެ މެންބަރެއްގެ ގޮނޑި ގެއްލޭނެ އެވެ. ނަމަވެސް، އެގޮތަށް ގޮނޑި ގެއްލިފައިވާ ކަމަށް ބުނާ ހަތަރު މެންބަރުންނަކީ ސުޕްރީމް ކޯޓުގެ ހުކުމުގެ މާކުރިން އެ ޕާޓީން ވަކިކޮށްފައިވާ މެންބަރުން ކަމަށް އެ މެންބަރުން ދަނީ ވިދާޅުވަމުންނެވެ. އެކަން އިލެކްޝަން ކޮމިޝަނަށް ވެސް ޕީޕީއެމް އަންގާފައި އޮތް ކަމަށެވެ. އިލެކްޝަން ކޮމިޝަނުން މަޖިލީހަށް އެކަން ކުރިން ނާންގައި އޮތުމަކީ އެ ކޮމިޝަނުން ޒިންމާ ނަގަންޖެހޭ ކަމެއް ކަމަށެވެ. ސުޕްރީމް ކޯޓުގެ ހުކުމް އައުމުގެ އެއް ދުވަސްކުރިން ޕީޕީއެމްއަށް މޫސާ މަނިކު ގުޅިވަޑައިގަތްކަން އިލެކްޝަން ކޮމިޝަނުން ވަނީ މަޖިލީހަށް އަންގާފަ އެވެ. އެހެންކަމުން އިލެކްޝަން ކޮމިޝަނުގެ މިނިވަންކަމާމެދު ސުވާލު އުފައްދައި، އެ މެންބަރުން ވަނީ މައްސަލަ ސުޕްރީމް ކޯޓަށް ވެސް ހުށަހަޅާފަ އެވެ. އަދި އެ މެންބަރުންގެ ގޮނޑިއާމެދު ގޮތެއް ކަނޑައަޅައިދޭން އެދިފަ އެވެ.