އިދިކޮޅު ފަރާތްތަކުން ބޭނުން ވަނީ ފަހަރަކު ބޭފުޅެއްގެ އިތުބާރު ނެތްކަމުގެ ވޯޓު ނަގައިގެން ރައީސް އަބްދުﷲ ޔާމީނު ކުރިއަށް ގެންދަވާ ތަރައްގީގެ މަސައްކަތް ހުއްޓުވުމަކަށް ގެންދަން ކަމަށް އެނާޖީ މިނިސްޓަރު ތޯރިގު އިބްރާހިމް ވިދާޅުވެއްޖެ އެވެ. އޭނާ އެހެން ވިދާޅުވި އިރު އިދިކޮޅު ފަރާތްތަކުން މިހާރު ވެސް ވަނީ ބަންޑާރަ ނައިބު މުހައްމަދު އަނިލްގެ އިތުބާރު ނެތް ކަމަށް ބުނެ މައްސަލައެއް މަޖިލީހަށް ވައްދާފަ އެވެ.
ޗެނަލް 13 އިގެ ޕްރޮގްރާމެއްގައި ރޭ ވާހަކަފުޅު ދައްކަވަމުން އެނާޖީ މިނިސްޓަރު ވިދާޅުވީ ސަރުކާރުގެ މިނިސްޓަރުންގެ އިތުބާރު ނެތްކަމުގެ ވޯޓު ނަގަން މަސައްކަތް ކުރަނީ ސަރުކާރުގެ ތަރައްގީގެ ދުވެލި މަޑުކުރުވައި ރައީސް ޔާމީން ކުރައްވަމުން ގެންދަވާ ތަރައްގީގެ މަސައްކަތްތަކަށް ޖެއްސުން ކުރުމުގެ ނިޔަތުގައި ކަމަށާއި އެހެން ނަމަވެސް ދޭ އެ ގެއްލުންތަކަކީ ސަރުކާރަކަށް ލިބޭ ގެއްލުމެއް ނޫން ކަމަށެވެ. ގެއްލުންދީ ޖެއްސުންކުރެވެނީ ރައްޔިތުންނަށް ކަމަށެވެ.
"މިހާރު އެބޭފުޅުންނަށް [އިދިކޮޅު ފަރާތްތަކަށް] އެބަ އެނގޭ މިފަދަ ނޭދެވޭ ކަންތައްތައް ކޮށްގެންނޫނީ ރައީސް ޔާމީނުގެ ސަރުކާރާ އަރާ ހަމަނުކުރެވޭ ނެކަން. އެބޭފުޅުންގެ ސަރުކާރުގައި [ރައީސް މުހައްމަދު ނަޝީދުގެ ސަރުކާރުގައި] ރައީސް ޔާމީނުގެ ވެރިކަމުގައި ކަންތައްތައް ކުރިއަށް ގެންދެވޭ މިންވަރަކަށް ކުރިއަކަށް ނުގެންދެވުނު." ތޯރިގު ވިދާޅުވި އެވެ.
ތޯރިގު ވިދާޅުވީ އިދިކޮޅު ފަރާތްތަކުން ރައްޔިތުންނަށް ގޯނާ ކުރަން ނުކުތަސް ރައީސް ޔާމީން އިދިކޮޅުފަރާތްތަކާ ތަޅައި ފޮޅަން ބޭނުންފުޅުވެވަޑައި ނުގަންނަވާ ކަމަށާއި އެ މަނިކުފާނު ބޭނުންފުޅުވަނީ ރާއްޖެއަށް ތަރައްގީ ގެންނަން ކަމަށެވެ.
"ރާއްޖޭގެ ކޮންމެ ދިމާލަކަށް ބަލާލިޔަސް ފެންނަނީ ރައްޔިތުންނަށް ބޭނުންވާ ގިނަ ކަންތައްތަކެއް ބާރު ސްޕީޑުގައި ކުރިއަށްދާތަން. އިދިކޮޅު ފަރާތްތައް ކުރަމުންދާ މަސައްކަތް ވަނީ ފަހުނޭވާއަށް އެޅިފައި. ފުރަތަމަ އުޅުނީ މަޖިލީހުގެ ރައީސް ގެ އިތުބާރު ނެތްކަމުގެ ވޯޓު ނަގަން. މަސީހު ރައްޔިތުންގެ މަޖިލީހުގެ ރައީސް ކަމުން ވަކިކުރުމަށް އިދިކޮޅު ފަރާތްތަކުން މިހާތަނަށް ކުރި ހުރިހާ މަސައްކަތެއް ވަނީ ނާކާމިޔާބުވެފައި. އެކަންތައް ކާމިޔާބު ނުވުމުން މިހާރު އެމީހުން މަސައްކަތް ކުރަމުން ދަނީ އެޓާނީ ޖެނެރަލްގެ އިތުބާރު ނެތްކަމުގެ ވޯޯޓަކަށް ދާން،"
