ރައްޔިތުން މަޖިލީހުގެ އިދާރާ ތެރެއަށް ފުލުހުން ވަނީ މެންބަރު ކަމުގެ ގޮނޑި ގެއްލިފައި ތިބި ބައެއް މެންބަރުން ނެރުމަށް ކަމަށް ފުލުހުން ބުނެފި އެވެ.
ފުލުހުން ދާދި ދެންމެއަކު ކުރި ޓްވީޓެއްގައި ވިދާޅުވަނީ މަޖިލީސް ތެރެއަށް ފުލުހުން ވަނީ މަޖިލީސް މެންބަރުން ނޫން ގޮތުގައި މަޖިލީހުން ކަނޑައަޅާފައިވާ މެންބަރުން މަޖިލީހަށް ވަދެފައިވާތީ އެ މެންބަރުން ނެރުމަށް ސިފައިން ފުލުހުންގެ ކިބައިން އެހީތެރިކަމަށް އެދިފައިވާތީ ކަމަށެވެ.
ފުލުހުން މިހެން ބުނެފައިވާ އިރު ގިނަ އަދަދެއްގެ ސިފައިންނާ ފުލުހުން މަޖިލީހަށް ވަދެ ވަނީ އިދިކޮޅު ހުރިހާ މެންބަރުން މަޖިލީހުގެ އިދާރާއިން ނެރެފަ އެވެ. އޭގެ ތެރެއިން ގޮނޑި ގެއްލިފައިވާ ކަމަށް ކަނޑައަޅާފައިވާ މަޑުއްވަރީ ދާއިރާގެ މެންބަރު އަމީތު އާއި ތުލުސްދޫ ދާއިރާގެ މެންބަރު އިބްރާޙިމް ވަހީދު ފުލުހުންގެ ޖިޕަށް އަރުވައިގެން ވަނީ ގެންގޮސްފަ އެވެ. ސިފައިން މަޖިލީހަށް ވަދެ މެންބަރުން ނެރުމަކީ ގާނޫނީ ގޮތުން ކުރެވޭނެ ކަމެއް ނޫން ކަމަށް ބުނެ މެންބަރުން އަންނަނީ ކަންބޮޑުވުން ފާޅު ކުރަމުންނެވެ.