ރައްޔިތުން މަޖިލީހުގެ ނަޒާހަތްތެރިކަމަށާއި ކަރާމާތައް އިހްތިރާމް ކުރުމަށް އިންޓަ ޕާލިމެންޓަރީ ގްރޫޕް (އައިޕީޔޫ) އިން ގޮވާލައިފި އެވެ.
އައިޕީޔޫ އިން މިހެން ގޮވާލީ ރައްޔިތުން މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތް މައްސަލާގެ ޖަލްސާ ބޭއްވުމަށް އިދިކޮޅު ޕާޓީތަކުގެ މަޖިލީސް މެންބަރުން މަޖިލީހުގެ އިދާރާއަށް ވަނުމަށް ފުލުހުން ހުރަސް އަޅާފައިވަނިކޮށެވެ. އަދި މަޖިލީހުގެ ތެރެއަށް ބައެއް މެންބަރުން ވަދެވަޑައިގެންފައި ވަނިކޮށް ރަޔަޓު ގިޔަރުގައި މަޖިލީހުގެ ތެރެއަށް ސިފައިން ވަދެ މެންބަރުން ގަދަކަމުން މަޖިލީހުން ބޭރު ކުރި އެވެ.
އެ މައްސަލައާ ގުޅިގެން އައިޕީޔޫއިން މިރޭ ކުރެއްވި ޓްވީޓެއްގައި ވިދާޅުވެފައި ވަނީ ރާއްޖޭގެ ސިޔާސީ މަސްރަހު ދުވަހުން ދުވަހަށް ގޯސްވަމުން ދާތީ ކަންބޮޑުވާ ކަމަށާއި މަޖިލީހުގެ ނަޒާހަތްތެރި ކަމަށް އެންމެހާ ފަރާތްތަކުން ވެސް އިހްތިރާމް ކުރުމަށް އެދޭ ކަމަށެވެ.
މަޖިލީހުގައި މިއަދު ހިނގައި ދިޔަ ކަންކަން ބައިނަލްއަގުވާމީ މީޑިއާތަކުގައި އަންނަނީ ދައުރުވަމުންނެވެ. އަދި އެކަމާ ގުޅިގެން ބޭރުގެ އެކި ފަރާތްތައް އަންނަނީ ކަންބޮޑުވުން ފާޅުކުރަމުންނެވެ.