ހަބަރު

ފަސް ގަޑިއިރު ފާސްކޮށްގެން ވެސް ކުނޫޒުން ހެއްކެއް ނުފެނުނު

Jul 26, 2017
5

ޖުމްހޫރީ ޕާޓީގެ މައި ހަރުގެ މ. ކުނޫޒަށް ރޭ ފުލުހުން ވަދެ ފަސް ގަނޑިއިރު ވަންދެން މުޅިތައް ބަލައި ފާސްކުރި ނަމަވެސް އެތަނުން އެއްވެސް ހެއްކެއް ފެނިފައި ނުވާ ކަމަށް ފުލުހުން ވެސް ބުނެފި އެވެ.

ކޯޓް އަމުރެއްގެ ދަށުން ބަލައި ފާސްކުރުމަށް ކަމަށް ބުނެ، ފުލުހުން ރޭ ކުނޫޒަށް ވަދެފައި ވަނީ ރޭ 8:30 އެހާކަން ހާއިރު އެވެ. އެ ވަގުތުން ފެށިގެން މުޅި ސަރަހައްދު ބަންދުކޮށްގެން ކުނޫޒް ބަލައި ފާސްކޮށް ނިންމާލެވުނީ ގާތްގަނޑަކަށް ރޭ ދަންވަރު 1:00 އެހާކަން ހާއިރު އެވެ.

ގާނޫނީ ސަރުކާރު ވައްޓާލަން ރޭވުމާއި ރައްޔިތުންގެ މަޖިލީހުގެ ރަސްމީ މަސައްކަތްތަކަށް ހުރަސް އަޅަން ރާވާކަމުގެ ތުހުމަތުގައި ފުލުހުން ކުނޫޒް ފާސްކުރި ނަމަވެސް، އެތަން ބަލައި ފާސްކުރުމަށް ފަހު ފުލުހުން ޖުމްހޫރީ ޕާޓީގެ އޮފިޝަލުންނާ ހަވާލު ކުރި ތަންތަން ބަލައި ފާސްކުރާ ފޯމްގައި އެތަނުން މައްސަލައިގެ ހެކީގެ ގޮތުގައި އެއްވެސް އެއްޗެއް ފެނިފައި ނުވާ ކަމަށް ވަނީ ހިމަނައިފަ އެވެ.

މިދިޔަ އަންގާރަ ދުވަހުގެ ރޭ ވެސް ފުލުހުން ކުނޫޒަށް އާންމުން ވަނުން ވަނީ މަނާކޮށްފަ އެވެ. އެތަނުގައި އިދިކޮޅު ފަރާތްތަކުން ކޮންމެ ރެއަކު ކަހަލަ ގޮތަކަށް އިދިކޮޅު އިއްތިހާދުގެ ޖަލްސާތަކެއް އަންނަނީ ބާއްވަމުން އެވެ. މިފަހަކަށް އައިސް ފުލުހުން ދޭތެރެ ދޭތެރެއިން ކުނޫޒަށް ވަދެ މީހުން ހައްޔަރުކުރުން ފަދަ ކަންކަން ކުރެ އެވެ.