އަންނަ ހުކުރު ދުވަހާ ހަމަޔަށް ޖުމްހޫރީ ޕާޓީގެ ހަރުގެ، މ. ކުނޫޒް ބަލާ ފާސް ކުރުމުގެ އޮޕަރޭޝަން ކުރިޔަށް ދާނެ ކަމަށް ފުލުހުން ބުނެފި އެވެ. ފުލުހުން ކުނޫޒް ފާސް ކުރަން ފެށީ ރޭގެ ވަގުތެއްގަ އެވެ. އަދި ފަސް ގަޑި އިރު ބަލާ ފާސް ކުރުމަށް ފަހު ހެއްކެއް ފެންނަން ނެތް ކަމުގެ ލިޔުން ފުލުހުން ވަނީ ހަވާލުކޮށްފަ އެވެ.
ނަމަވެސް ފުލުހުން މިއަދު ބުނީ ކުނޫޒްގައި ބަލާ ފާސް ކުރަން ކަނޑައަޅާފައިވަ ތަންތަނާއި ތަކެތި ކޯޓު އަމުރުގައި ދީފައިވާ ވަގުތާ ހަމަޔަށް ބަލާ ފާސް ކުރުމުގެ އޮޕަރޭޝަން ކުރިޔަށް ދާނެ ކަމަށެވެ. އަދި ރޭ ބަލާ ފާސް ކުރުމަށް ފަހު ދޫކޮށްފައިވާ ލިޔުމަކީ ރޭގަ ފާސް ކުރެވުނު ތަކެއްޗާ ބެހޭ ގޮތުން ދެވުނު ލިޔުމެއް ކަމަށެވެ.
"ރޭ ދިނެ ލިޔުނަކީ އެއްވެސް ހާލެއްގައި ކުނޫޒް އެއްކޮށް ބަލާ ފާސް ކުރުމަށް ފަހު ދޫކޮށްފައިވާ ލިޔުމެއް ނޫން،" ފުލުހުން ބުންޏެވެ.
ކޯޓު އަމުރުގައި ބުނެފައިވާ ގޮތުން 72 ގަޑިއިރު ވަންދެއް ފުލުހުންނަށް ކުނޫޒް ފާސް ކުރެވޭނެ އެވެ. އެއީ އަންނަ ހުކުރު ދުވަހުގެ 6:00 އާ ހަމަޔަށެވެ. އެ އަމުރުގައި ބުނެފައި ވަނީ ކުނޫޒު ބަލާ ފާސް ކުރަނީ އެތަނުގައި ޖޭޕީއާ، އެމްޑީޕީއާ އަދާލަތު ޕާޓީ އަދި އެހެނިހެން ފަރާތްތައް އިސްކޮށްތިބެ ސަރުކާރު ހިންގުމަށް ދަތިތައް ސަރުކާރު ވައްޓާލުމަށް ސައްލާކޮށް ރާވަމުންދާތީ ކަމަށެވެ. އަދި މަޖިލީހުން ކުރަން ޖެހޭ ރަސްމީ މަސައްކަތްތަކަށް ހުރަސް އެުމަށް މަސައްކަތް ކުރަމުންދާ ކަމަށް ތުހުމަތު ކުރެވޭ މައްސަލައަކާ ގުޅިގެން ކަމަށް ވެސް އެ އަމުރުގައި ބުނެފައިވެ އެވެ.
އެގޮތުން ސަރުކާރު ބަދުނާމުވާ ގޮތަށް ލިޔެފައި ހުރި ލިޔެކިޔުންތަކާއި ބެނާތަކާއި ފޮތިތަކާއި ސީސީޓީވީ ފުޓޭޖް ބަލާ ފާސް ކުރުމަށް ބޭނުންވާ ކަމަށް ކޯޓު އަމުރުގައި ބުނެފައިވެ އެވެ.