އިދިކޮޅު ފަރާތްތަކުން މިރޭ ބާއްވަން މަސައްކަތް ކުރި ޖަލްސާއެއްގެ ލައިވް ކަވަރޭޖް ހަދަން މަސައްކަތް ކުރި ސަންގު ޓީވީ އަދި ރާއްޖެ ޓީވީގެ ނޫސްވެރިންތަކެއް ހައްޔަރުކުރުމަށް ފަހު ދޫކޮށްލައިފި އެވެ. އެ ނޫސްވެރިން ހައްޔަރުކޮށްފައިވަނީ އެމްޑީޕީ ހަރުގެ ކައިރިންނެވެ. ވީޑިއޯ ޖާނަލިސްޓުން ހިމެނޭ ގޮތަށް ހަތް ނޫސްވެރިއަކު ހައްޔަރު ކުރި އެވެ.
ސަންގް ޓީވީއިން ބުނި ގޮތުގައި މިރޭ އިދިކޮޅު ފަރާތްތަކުން މާލޭގައި ހިންގާ ހަރަކާތްތައް ކަވަރުކުރުމަށް މަސައްކަތް ކުރަމުން ދިޔަ އެ ސްޓޭޝަންގެ ވީޑިއޯ ޖާނަލިސްޓުން ކަމަށްވާ ޔާމީން އާއި ޝަނޫން އާއި ޖަނާހު އަދި ރިއްފަތު ހައްޔަރުކޮށްފައިވާ ކަމަށެވެ. ރާއްޖެޓީވީއިން ބުނި ގޮތުގައި މިރޭ ހައްޔަރުކޮށްފައިވަނީ އެ ސްޓޭޝަންގެ ތިން ނޫސްވެރިޔެކެވެ. އެއީ ނޫސްވެރިޔާ ވިސާމާއި މުރުޝިދު އަދި ކެމެރާމަން މަމްދޫހެވެ.
ހަތް ނޫސްވެރިން ހައްޔަރުކޮށް ފުލުހުންގެ ބެލުމުގެ ދަށަށް ގެންގޮސްފައިވަނީ ބިޑި އަޅުވައިގެން ކަމަށް މައުލޫމާތު ލިބެ އެވެ. އެ ނޫސްވެރިން ގެންގުޅުނު އިކްއިޕްމެންޓްތައް ވެސް ވަނީ ފުލުހުންގެ ބެލުމުގެ ދަށުގަ އެވެ. ނޫސްވެރިން ދޫކޮށްލީ މިރޭ 1:00 އެހާކަންހާއިރު އެވެ.
ނޫސްވެރިން ހައްޔަރުކޮށްފައިވާ ސަބަބަކާ ގުޅޭ ގޮތުން ފުލުހުން ބުނީ، ރާއްޖެ ޓީވީ އާއި ސަންގު ޓީވީގެ ނޫސްވެރިން ފުލުހުންގެ ބެލުމުގެ ދަށަށް ގެންގޮސްފައިވަނީ ފުލުހުންގެ ދައުރަށް ހުރަސްއަޅާފައިވާތީ ކަމަށެވެ.
ހަތް ނޫސްވެރިޔަކު ހައްޔަރުކުރި އިރު ސަންގް ޓީވީގެ ވީޑިއޯ ޖަނަލިސްޓް މާދުއަށް އަނިޔާވެފައިވާ ކަމަށް ވެސް މައުލޫމާތު ވަނީ ލިބިފަ އެވެ. އޭގެ އިތުރުން ރާއްޖެޓީވީގެ ނޫސްވެރިޔާ ނަސީރަށް ފުލުހުންގެ ފަރާތުން ލިބުނު އަނިޔާތަކަށް ހޮސްޕިޓަލްގައި ގެންދަނީ ފަރުވާ ހޯދަމުންނެވެ.
ރާއްޖެ ޓީވީ އާއި ސަންގް ޓީވީއިން މިރޭ އިދިކޮޅުގެ ހަރަކާތްތައް ކަވަރުކުރަމުން ދިޔަ ނަމަވެސް މިރޭ އިދިކޮޅު ފަރާތްތަކުން އިއުލާން ކޮށްފައިވާ ގޮތަށް މަގު މައްޗަށް މީހުން އެއްވެ ހަރަކާތްތަކެއް ކުރިއަށް ގެންގޮސްފައެއް ނުވެ އެވެ. ނޫސްވެރިން ހައްޔަރުކުރި ސަރަހައްދަކީ ވެސް މީހުން އެއްވެފައި އޮތް ސަރަހައްދެއް ނޫނެވެ.