ޒުވާނުންނަށް ހާއްސަކޮށްގެން ބާއްވާ ހަރަކާތެއް މެޑަމް ފާތިމަތު އިބްރާހިމް އިސްވެ، ހިންގަވާ ރައީސް އަބްދުﷲ ޔާމީންގެ ކެމްޕެއިން އޮފީހުން ބާއްވަން ނިންމައިފި އެވެ. މިއީ ރައީސް އަބްދުﷲ ޔާމީންއަށް ތާއިދު ހޯދުމުގެ ގޮތުން ބާއްވާ ކެމްޕޭން ހަރަކާތެކެވެ. ހަރަކާތް ކުރިއަށް ގެންދަނީ "ރައީސް ޔާމީން 2018" ޝިއާރުގެ ދަށުންނެވެ.
މެޑަމް އޮފީހުން އިންތިޒާމުކުރާ މި ހަރަކާތަކީ ރާއްޖޭގައި މިފަދަ ހަރަކާތެއް ބާއްވާ ފުރަތަމަ ފަހަރެވެ. އެ އޮފީހުން މިފަހަރު ބާއްވަނީ ޕެރަމޯޓާ ހަރަކާތެކެވެ. ޕެރަމޯޓާއަކީ ފަހަތުގައި ބުރަފައްޗެއް ހަރުކޮށްގެން ޕައިލެޓަކާއިއެކު އުދުހުމުގެ ފުރުސަތު ލިބޭ ހަރަކާތެކެވެ. މިކަމުގެ ބޭނުމަކީ ތަފާތު ކަމެއް ތަޖުރިބާކޮށްލުމުގެ ފުރުސަތު ޒުވާނުންނަށް ދިނުމެވެ.
މި ހަރަކާތް ބޭއްވުމަށް ނިންމާފައިވަނީ އަންނަ މަހުގެ ފަސްވަނަ ދުވަހުގެ ހަވީރު ޓުރެކް ދަނޑު ހިމެނޭ ސަރަހައްދުގަ އެވެ. ހަރަކާތަކީ މުޅިން ހިލޭ ބައިވެރިވެވޭ ހަރަކާތެކެވެ. ހަރަކާތުގައި ބައިވެރިވާ ފަރާތްތަކަށް މާލެ މަތިން ދިހަ މިނެޓު އުދުހެމުގެ ފުރުސަތު ދޭނެ އެވެ.
ޕެރަމޯޓާގެ އިތުރުން މި ހަރަކާތުގެ ތެރޭގައި ރައީސް ޔާމީނަށް ތައުރީފާއި ޝުކުރުގެ ޝުއޫރު ފާޅުކުރުން ވެސް ކުރިއަށް ދާނެ އެވެ.
ކެމްޕެއިން އޮފީހުގެ ފަރާތުން ނޫސްވެރިންނަށް މައުލޫމާތު ދެއްވަމުން އިބްރާހިމް މުއާޒު (މުއާ) ވިދާޅުވީ، މި ހަރަކާތުގައި ތަފާތު ތަޖުރިބާތަކެއް ކޮށްލެވޭނެ ކަމަށާއި އެހެންކަމުން މި ހަރަކާތުގައި ބައިވެރިވުމަކީ ވަރަށް މުހިންމު ކަމެއް ކަމަށެވެ. މި ހަރަކާތަކީ އާއިލާއާއެކު ބަލައިލާ ބައިވެރިވުމަށް ވެސް އެންމެ އެކަށީގެންވާ ހަރަކާތެއް ކަން މުއާ ފާހަގަކުރެއްވި އެވެ.
މުއާ ވިދާޅުވީ، ކެމްޕެއިން އޮފީހުގެ މަސައްކަތްތައް ނުހުއްޓި ވަރަށް ބާރަށް ކުރިއަށްދާ ކަމަށާއި މަސައްކަތްތައް ކުރިއަށް ދަނީ ކުރިއެކޭ ވެސް އެއް ސްޕީޑެއްގަ ކަމަށެވެ. އަތޮޅުތަކުގައި ހުރި ގޮފިތަކާ ގުޅިގެން ވެސް މަސައްކަތްތައް ކުރިއަށްދާ ކަމަށާއި ރައީސް ޔާމީނަށް ތާއިދުކުރައްވާ ބޭފުޅުން ބޭނުންވާ ކަންކަން ފުއްދައިދިނުމުގައި އަބަދުވެސް އެ އޮފީހުން މަސައްކަތްތައް ކުރަމުންދާނެ ކަމަށެވެ.
"މި ކެމްޕެއިން އޮފީހުގެ މި މަސައްކަތްތައް އަޅުގަނޑުމެން ހުއްޓާއެއް ނުލާނަން، އަޅުގަނޑުމެން ބާރަށް ދާނީ ކުރިއަށް، އަޅުގަނޑުމެންގެ ރިޔާސީ ކެނޑިޑޭޓް، މިހާރު ރައިސުލްޖުމްހޫރިއްޔާ އަބްދުﷲ ޔާމީން، އަޅުގަނޑުމެންނަށް މި ފެންނަ ތަރައްގީގެ ބާނީ 2018 ވަނަ އަހަރުގެ އިންތިހާބު ކާމިޔާބު ކުރުން،" މުއާ ވިދާޅުވި އެވެ.