މެޑަމް ފާތިމަތު އިބްރާހިމް ހިންގަވާ ރައީސް އަބްދުﷲ ޔާމީންގެ ކެމްޕެއިން އޮފީސް އެފްއޭއެމްގެ އިމާރާތަށް ބަދަލުކޮށްފި އެވެ.
މެޑަމް އޮފީހުގެ ފަރާތުން މިއަދު ނޫސްވެރިންގެ ބައްދަލުވުމެއް ވެސް އެ އޮފީހުގައި ވަނީ ބާއްވާފަ އެވެ. މެޑަމް އޮފީހުގެ އެހެން ހަރަކާތްތައް ވެސް އެ އޮފީހުގައި ކުރިއަށްދެ އެވެ. އެ އޮފީސް ހުންނަނީ އެފްއޭއެމްގެ ގްރައުންޑް ފްލޯގަ އެވެ.
މެޑަމް އޮފީހުގެ ފަރާތުން އިބްރާހިމް މުއާޒު އަލީ (މުއާ) ވިދާޅުވީ، ޖަނަވަރީ މަގުގައި ހިންގި މެޑަމް އޮފީހުގެ ބަދަލުގައި މިހާރު އޮފީސް ހިންގަމުން ދަނީ އެފްއޭއެމް އިމާރާތުގަ ކަމަށެވެ. ޖަނަވަރީ މަގުގައި ހުރި އޮފީސް މިހާރު ވަނީ ބަންދު ކޮށްފަ އެވެ.
މުއާ ވިދާޅުވީ، އެ އޮފީސް ހިންގަން އެ އިމާރާތް ކުއްޔަށް ހިފާފައިވާ ކަމަށާއި އޮފީސް ހިންގަނީ އެތަނުގެ މިލްކްވެރި ފަރާތަށް ކުލި ދައްކާފަ ކަމަށެވެ.
އެނގިފައިވާ އޮތުގައި އެ އޮފީސް މިދިޔަ ރޯދަ މަހުން ފެށިގެން ހިންގަމުން ދަނީ އެ އިމާރާތުގަ އެވެ. މެޑަމް އޮފީސް ހިންގަމުން ދަނީ މައުލޫމާތު ލިބޭ ގޮތުގައި އެޕްއޭއެމްއިން އަމިއްލަ ކުންފުންޏަކަށް ކުއްޔަށް ދީފައިވާ ބައެއްގަ އެވެ.
މެޑަމް އޮފީހަކީ ރައީސް ޔާމީން 2018 ވަނަ އަހަރުގެ ރިޔާސީ އިންތިހާބު ކާމިޔާބުކުރުމަށް ތާއިދު ހޯދައި އެކި ހަރަކާތްތައް ހިންގާ އޮފީހެކެވެ. އެގޮތުން އަންނަ މަހުގެ ފަސްވަނަ ދުވަހު ވެސް އެ އޮފީހުން އިސްނަގައިގެން ބޮޑު ހަރަކާތެއް ބޭއްވުމަށް ވަނީ ނިންމާފަ އެވެ.