ދިވެހި ދައުލަތް ނުވަތަ މި ގައުމު މިހާރު އޮތީ ހުއްޓުމެއްގެ ތެރޭގައި ކަމަށް އެމްޑީޕީގެ ޕީޖީ ގުރޫޕްގެ ލީޑަރު އިބްރާހިމް މުހައްމަދު ސޯލިހު (އިބޫ) މިރޭ ވަރަށް ބޮޑަށް ފާޅުވިދާޅުވެއްޖެ އެވެ. އިބޫ ވިދާޅުވީ ދައުލަތުގެ ތިން ބާރު މަސައްކަތް ނުކުރާނަމަ ދައުލަތެއް ނުހިނގާނެ ކަމަށެވެ.
ކުނޫޒުގައި މިރޭ ބޭއްވި ޖަލްސާގައި ވާހަކަ ދައްކަވަމުން އިބޫ ވިދާޅުވީ، ރައްޔިތުންގެ މަޖިލީހުގެ ބާރުތައް ވީދައި، ކަނޑައި ވަނީ އެކި ތަންތަނަށް ގެންގޮސްފައި ކަމަށެވެ. ރައްޔިތުންގެ މަޖިލިސް މިހާރު އޮތީ ސަލާމަތީ ބާރުތަކުން ހިސޯރުކޮށްފަ ކަމަށެވެ. މަޖިލިސް މިހާރު ފަންކްޝަން ނުކުރާ ކަމަށެވެ.
"މި ދައުލަތް އެބަ ހިނގާތޯ، މި ގައުމު އެބަ ހިނގާތޯ، ގައުމެއް ހިނގާ ކަމަށްވާނަމަ ދައުލަތް ހިނގާ ކަމަށްވާނަމަ ސަރުކާރުގަ މި އޮތް ތިން ބާރު ފަންކްޝަން ކުރަންޖެހޭ، އެކަމަކު މަޖިލީހެއް ފަންކްޝަނެއް ނުކުރޭ، މާނައަކީ މިއަދަކު މި ދައުލަތެއް ނުހިނގައޭ، މިއޮތީ ޑެޑްލޮކަކަށް އައިސްފައޭ، ނޫނީ ހުއްޓިފައޭ،" އިބޫ ވިދާޅުވި އެވެ.
މިނިވަންދުވަހު ރައީސް ޔާމީން ދެއްކެވި ވާހަކަފުޅަށް ފާޑުވިދާޅުވެ އިބޫ ވިދާޅުވީ އެ ވާހަކަފުޅުން ދޭހަވީ އެމަނިކުފާނަށް ގާނޫނު އަސާސީއާ އެއްގޮތަށް ވެރިކަން ކުރައްވަން އެނގިވަޑައިނުގަންނަވާކަން ކަމަށެވެ. އަދި އެކަން ކުރައްވަން ވެސް ނޫޅުއްވާ ކަމަށެވެ.
"މި ގާނޫނު އަސާސީ ޑްރާފްޓް ކުރެވި ތަންފީޒުކުރެވިގެން މިދަނީ އެއްވެސް މީހަކު ބޭނުންހާ ކަމެއް ބޭނުންހާ ގޮތަކަށް ބޭނުންވާ ވަގުތަކު ކުރެވޭ ގޮތަކަށް ނޫން، މި ގާނޫނު އަސާސީގައި އިންތަކެއް އެބަހުރި، ރައިސުލްޖުމްހޫރިއްޔާއަކަށް ހުންނަ ބޭފުޅަކަށް ކަންތައްތައް ކުރެވޭނެ ގޮތް އެބަހުރި، ރައްޔިތުންގެ މަޖިލީހަށާއި މެންބަރުންނަށް ކުރެވޭނެ ކަންކަން ކަނޑައަޅާފަ އެބަހުރި، ޝަރުއީ ދާއިރާއަށް ކުރެވޭނެ ކަންތައްތައް އެބަހުރި، މި ގާނޫނު އަސާސީ ތަނެއް ނުދޭ ޑިކްޓޭޝަޝިޕެއް ހިންގާކަށް، މި ގާނޫނު އަސާސީގެ އިމުގެ ތެރެއަކު އެމަނިކުފާނަކަށް ވެރިކަމެއް ނުކުރެއްވޭނެ،" އިބޫ ވިދާޅުވި އެވެ.
އިބޫ ވަނީ ގާނޫނު އަސާސީގެ އިމުގެ ތެރެއިން ވެރިކަން ކުރައްވަން ރައީސް ޔާމީނަށް އެނގިވަޑައިނުގަންނަވާނަމަ އަވަހަށް މަގާމުން ދުރަށް ވަޑައިގެންނެވުމަށް ދަންނަވާފަ އެވެ.
އިބޫ ވިދާޅުވީ، ރައްޔިތުންގެ މަޖިލީހުގެ އަގުލަބިއްޔަތު ރައީސް ޔާމީނަށް ގެއްލުނު ހިސާބުން އެ އަގުލަބިއްޔަތު އަލުން ހޯދުމަށް ފަހަރަކު މެންބަރަކު ހައްޔަރުކުރަމުންދާ ކަމަށެވެ. ރިޔާސީ ނިޒާމް ޑެޑްލޮކެއްގައި އޮތް ކަމަށް ވިދާޅުވެ އެމަނިކުފާނު ކުރެއްވި ކަމަކީ ރައްޔިތުން މަޖިލީހުގައި ޑެޑްލޮކެއް އެޅުވުން ކަމަށް އިބޫ ވިދާޅުވި އެވެ.
އިބޫ ވިދާޅުވީ، ބޮޑެތި މަޝްރޫއުތައް ބޮޑެތި އިމާރާތްތައް އަޅުއްވާ ވާހަކަ މިނިވަން ދުވަހު ރައީސް ވިދާޅުވި ކަމަށާއި އެއީ ރަނގަޅު ކަންކަން ކަމަށެވެ. ނަމަވެސް އެކަންކަން ކުރާ ގޮތުގެ ތަފްސީލު ރައްޔިތުންނަށް އެނގެން ޖެހޭނެ ކަމަށް އިބޫ ވިދާޅުވި އެވެ. އިބޫ ވިދާޅުވީ، އައިޖީއެމްއެޗްގެ 25 ބުރީގެ އިމާރާތް 142 މިލިއަން ޑޮލަރަށް އަޅާކަމުގެ މައުލޫމާތު ސަރުކާރުން ދީފައިވާއިރު މާލިއްޔަތު ކޮމެޓީއަށް ލިބިފައިވާ މައުލޫމާތަށް ބަލާއިރު 53 މިލިއަން ޑޮލަރަށް އައިޖީއެމްއެޗްގެ އިމާރާތް އަޅައިދޭން ބަޔަކު ޕްރޮޕޯސަލް ހުށަހަޅާފައިވާކަން އެނގެން އެބަ އޮތް ކަމަށެވެ.
"އަޅުގަނޑުގެ ސުވާލަކީ އެއަށް ބެލުމެއް ނެތި 142 މިލިއަން ޑޮލަރަށް އިމާރަތް ކުރާ ފަރާތަކަށް އެ ހަވާލުކުރީ ކީއްވެގެންތޯ އެވެ؟ ޑިޒައިން ކުރުމާއި ކުރެހުމުގެ ކަންކަމަށް 27 މިލިއަން ޑޮލަރު ހަރަދުކުރާނެ ކަމަށް ބުނެފަ އޮތް ބަޔަކަށް އެ އޮތީ ދީފަ، ކުރިން ދެންނެވި ޕްރޮޕޯސަލްގަ 1.2 މިލިއަން ޑޮލަރަށް ޑިޒައިންކުރުމާއި ކުރެހުމުގެ ކަންތައްތައް ނިމައިދޭނެ ކަމަށް ބުނެފައިވޭ، އަޅުގަނޑު މި ދަންނަވަނީ މިކަންތައްތައް އެބަޖެހެއޭ ބެލެން،" އިބޫ ވިދާޅުވި އެވެ.
އިބޫ ވިދާޅުވީ، ދަރަނި އަދާކޮށް ހަލާސްކުރައްވާނެ ކަމަށް ވިދާޅުވަމުން ރައީސް ޔާމީން ކުރިއަށް ވަޑައިގަންނަވާއިރު ރައީސް ޔާމީންގެ ދައުރު ނިމޭއިރު ރާއްޖޭގެ ދަރަނި 42 ބިލިއަން ރުފިޔާއަށް އަރާނެ ކަމަށެވެ. ބޭރުގެ ދަރަނީގެ ގޮތުގައި 14 ބިލިއަން ރުފިޔާ އޮތްއިރު އޭގެ ތެރެއިން 11 ބިލިއަން ރުފިޔާއަކީ ޗައިނާއަށް ދައްކަންޖެހޭ ރުފިޔާ ކަމަށް އިބޫ ވިދާޅުވި އެވެ.