އިދިކޮޅު ޕާޓީތަކުން ގުޅިގެން ރޭ ކުނޫޒުގައި ބޭއްވި ޖަލްސާގައި އިހަވަންދޫ ދާއިރާގެ މެންބަރު މުހައްމަދު އަބްދުﷲ (މުހަންމާ) ބައިވެރިވެވަޑައިގެންފި އެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލާގައި ސޮއިކުރެއްވި ޕީޕީއެމްގެ 10 މެންބަރުންގެ ތެރޭގައި މުހަންމާ ހިމެނިވަޑައިގަންނަވަ އެވެ.
އެ މައްސަލާގައި ސޮއިކުރެއްވި ބައެއް ޕީޕީއެމްގެ މެންބަރުން ޕާޓީން ވަކިވާން ހުށަހަޅާފައިވަނިކޮށް އެ ޕާޓީން ވަކިކޮށްފައިވާކަން އަންގާފައިވެ އެވެ. ނަމަވެސް މިހާތަނަށް އެ ޕާޓީން މުހަންމާ އެފަދަ އެންގުމެއް އަންގަވާފައެއް ނުވެ އެވެ.
ޕީޕީއެމްއިން މުހަންމާ އެ ޕާޓީގެ މެންބަރެއް ނޫން ކަމަށް އިއުލާންކޮށްފައިނުވީ ނަމަވެސް މުހަންމާ ވަނީ އެ ޕާޓީން ވަކިވުމަށް ސިޓީ ފޮނުވާފަ އެވެ. އެ ސިޓީ މުހަންމާ ފޮނުވީ، އިންތިހާބުވާ ޕާޓީ ނޫން އެހެން ޕާޓީއަކަށް ބަދަލުވެއްޖެނަމަ މެންބަރު ކަމުގެ ގޮނޑި ގެއްލޭނެ ކަމަށް ސުޕްރީމް ކޯޓުން ހުކުމް ކުރުމުގެ ކުރިންނެވެ.
މިހާރު ސަރުކާރުގެ ސިޔާސަތުތަކަށް މީޑިއާގައި މުހަންމާ ފާޑުވިދާޅުވަމުންދާއިރު މުހަންމާ އިންތިހާބުވެވަޑައިގެންނަވީ ޖުމްހޫރީ ޕާޓީގެ ޓިކެޓްގަ އެވެ. އެއަށްފަހު ޕީޕީއެމްއާ ގުޅިވަޑައިގަތީ، ޖުމްހޫރީ ޕާޓީ، ސަރުކާރު ހިންގާ ކޯލިޝަނާ ވަކިވި ފަހުންނެވެ.