ދިއްގަރު ދާއިރާގެ މެންބަރު އަހުމަދު ފާރިސް މައުމޫން ރައްޔިތުންގެ މަޖިލީހަށް މިއަދު ހާޒިރުކުރުމަށް ކުރިމިނަލް ކޯޓުން ފުރުސަތުދީ، ޝަރީއަތް މެދުކަނޑާލުމުން ވެސް މޯލްޑިވްސް ކަރެކްޝަނަލް ސާވިސްއިން ފާރިސް މަޖިލީހަށް ހާޒިރުކޮށްފައިނުވާތީ ފާރިސްގެ ވަކީލް މައުމޫން ހަމީދު މިއަދު ޝަރީއަތުގެ މަޖިލީހުގައި ނުރުހުން ފާޅުކުރައްވައިފި އެވެ.
ފާރިސްގެ މައްޗަށް ދައުލަތުން އުފުލާފައިވާ ޝަހުސު އޮޅުވާލުމުގެ ދައުވާގެ މިއަދު ހަވީރު ކުރިއަށް ދިޔަ އިބްތިދާއީ އަޑުއެހުމުގައި މައުމޫން ހަމީދު ވިދާޅުވީ، ކޯޓުން ފުރުސަތު ދިނުމުން ވެސް ފާރިސް މަޖިލީހަށް ހާޒިރުނުކޮށް ކޯޓުގެ ކަރާމާތަށް އަރައިގެންފައިވާ ކަމަށެވެ. އެކަން ކޮށްފައިވަނީ ދައުލަތުގެ މުއައްސަސާތަކުން ކަމަށާއި ކޯޓުން އެ ފަރާތަކަށް ފިޔަވަޅު އަޅަން ޖެހޭނެ ކަމަށެވެ. އަދި ފާރިސް މަޖިލީހަށް ހާޒިރނުކުރުމުގައި ޒިންމާ ނަގާނެ ފަރާތެއް ވެސް ނެތް ކަމަށް މައުމޫން ވިދާޅުވި އެވެ.
"ފާރިސް މަޖިލީހަށް ހާޒިރުނުކޮށް އެ ހައްގަށް އަރައިގަތުމުގެ ޒިންމާ ވަނީ ކޮންތާކުންތޯ؟ ބާރު ބޭނުންކުރަންވީމަ މުއައްސަސާތައް އޮވޭ، ޒިންމާއެއް ނަގަންވީމަ މުއައްސަސާއެއް ނޯވޭ، ގާނޫނު އަސާސީގެ 44 ވަނަ މާއްދާގައިވަނީ އެއްވެސް މީހެއްގެ ހައްގަކަށް އުނި ކަމެއް އައިސްގެން ނުވާނެ ކަމަށް، ނަމަވެސް ފާރިސްގެ ހައްގަށް މިވަނީ އުނިކަން އައިސްފަ،" މައުމޫން ހަމީދު ވިދާޅުވި އެވެ.
މައުމޫން ހަމީދު ވިދާޅުވީ، އެކަން ހިނގާފައިވަނީ ކަރެކްޝަން ސާވިސް އާއި ޕީޖީ އޮފީހުން އެ ފަރާތްތަކުގެ ޒިންމާއަށް ގާފިލުވެފައިވާތީ ކަމަށެވެ. ކޯޓުގެ ކަރާމަތަށް އަރައިގަތުމުން އަމިއްލަ ވަކީލުންނަށް ފިޔަވަޅު އަޅާފަދައިން ޕީޖީ އޮފީހަށާއި ކަރެކްޝަނަލް ސާވިސްއަށް ފިޔަވަޅު އަޅައި ޖަވާބުދާރީކުރުވުމަށް މައުމޫން އެދިވަޑައިގަތެވެ.
އެކަމާ ގުޅިގެން މައްސަލަ ބައްލަވާ ގާޒީ އިބްރާހިމް އަލީ ވަނީ ޕީިޖީ އޮފީހަށް އެކަމުގައި ޖަވާބުދާރީވުމަށް އަންގާފަ އެވެ. ޕީޖީގެ ވަކީލް ވިދާޅުވީ، ފާރިސް މަޖިލީހަށް ހާޒިރުކުރުވުމަށް ޕީޖީއިން އިއުތިރާޒުކޮށް ހުރަސްއަޅާފައިނުވާނެ ކަމަށެވެ. ފާރިސް ހުރީ ކަރެކްޝަނަލްގެ ބެލުމުގެ ދަށުގައި ކަމުން އެކަމަކީ ކަރެކްޝަންއާ ބެހޭ ކަމެއް ކަމަށް ވެސް ވަކީލް ވިދާޅުވި އެވެ. މިއަދުގެ ޝަރީއަތުގެ އަޑުއެހުމުގައި ކަރެކްޝަންގެ ޒިންމާދާރު ބޭފުޅެއް ނެތުމުން އެކަމުގައި އެ މުއައްސަސާއެއްގެ ޖަވާބެއް ހޯދޭ ގޮތެއް ނުވި އެވެ.
ގާޒީ ވިދާޅުވީ، ކަންކަން ކުރިއަށް ގެންދެވޭނީ ކުރިމިނަލް ކޯޓަށް މުއައްސަސާތަކުން ވެސް އެއްބާރުލުންދީގެން ކަމަށެވެ. ފާރިސް މަޖިލީހަށް ހާޒިރުކުރުމަކީ ޝަރީއަތުގެ މެންޑޭޓްގެ ތެރޭގައިވާ ކަމެއް ނޫން ކަމަށާއި އެކަން ކުރެވޭނީ ކަރެކްޝަނަލް ސާވިސްއަށް ކަމަށެވެ.
މިއަދު ބޭއްވި ޕެޓިޝަން ކޮމެޓީގައި ފާރިސް ހިމެނިވަޑައިގަންނަވާތީ އެ މެންބަރު ހާޒިރުކޮށްގެން ކޮމިޓީ ބައްދަލުވުން ކުރިޔަށް ގެންދިޔުމަށް އަބްދުﷲ ޝާހިދު ހުށަހެޅުއްވި ހުށަހެޅުމަށް ތާއީދު ލިބުނެވެ. އަދި އެ ހުށަހެޅުމަށް ކޮމިޓީގައި ހާޒިރުވެ ތިބި އެއްވެސް މެންބަރަކު ދެކޮޅު ނުހައްދަވާތީ ފާރިސް ހާޒިރު ކުރުމަށް ފަހުގައި ނޫނީ ޕެޓިޝަން ކޮމިޓީ ކުރިއަށް ނުގެންދިޔުމަށް ވަނީ ނިންމާފަ އެވެ. މައުމޫން ހަމީދު ވިދާޅުވީ، ފާރިސް ކޯޓަށް ހާޒިރުނުކުރާތީ އެ ކޮމެޓީގެ މަސައްކަތް ހުއްޓި، އެތައް ރައްޔިތުންގެ ހައްގުތަކަަށް އުނިކަން އައިސްފައިވާ ކަމަށެވެ.