ހުޅުމާލޭ "ފެހިރެސް" ޕާކާއި "ފަހިވެނި" އިޖްތިމާއީ މަރުކަޒު މިރޭ ހުޅުވައިފި އެވެ. ހައުސިން ޑިވަލޮޕްމަންޓް ކޯޕަރޭޝަން (އެޗްޑީސި) އިން ހުޅުމާލޭގައި ބޭއްވި ރަސްމިއްޔާތުގައި ޕާކާއި ކޮމިއުނިޓީ ސެންޓަރު ހުޅުވައި ދެއްވީ ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމާއި އަނބިކަނބަލުން، ފަސްޓް ލޭޑީ މެޑަމް ފާތުމަތު އިބްރާހީމެވެ.
އެ ރަސްމިއްޔާތުގައި ވާހަކަފުޅު ދައްކަވަމުން އެޗްޑީސީގެ މެނޭޖިން ޑިރެކްޓަރު މުހައްމަދު ސައިމަން ވިދާޅުވީ އާބާދީ ގިނަ ތަންތަނުގައި އުމްރާނީ ތަރައްގީގެ އިތުރުން ހުސް ޖާގަތަކާއި ޕާކުތައް ތަރައްގީ ކުރުމަކީ ދުނިޔޭގެ އެހެން ބޮޑެތި ގައުމުތަކުން ވެސް އިސްކަމެއް ދީގެން ކުރަމުން އަންނަ ކަމެއް ކަމަށެވެ. އަދި ގާތްގަނޑަކަށް 240،000 މީހުންގެ އާބާދީއަކަށް ހުޅުމާލެ ހެދުމުގެ މަސައްކަތް ކުރަމުން އަންނަ އިރު ވޭތުވެދިޔަ ދުވަސްތަކުގެ ތެރޭގައި 50،000 އަކަމީޓަރުގެ ޖާގައިގެ ޕާކު އެކި ސަރަހައްދުތަކުގައި ތަރައްގީ ކުރެވިފައިވާ ކަމަށް ސައިމަން ވިދާޅުވި އެވެ.
"މީގެ 10 އަހަރުގެ ތެރޭގައި ވެސް ގާއިމް ކުރެވިފައި ވަނީ 9000 އަކަ މީޓަރު ހުސްޖާގަތަކާޢި ޕާކުތައް. ނަމަވެސް މިވީ ކުޑަ ދުވަސްކޮޅުގެ ތެރޭގައި ރައީސް ޔާމީންގެ ވިސްނުން ފުޅުގެ ދަށުން މި ވަނީ 50،000 އަށް އަރައިފަ،" ސައިމަން ވިދާޅުވި އެވެ.
ކޮމިއުނިޓީ ސެންޓަރާ ގުޅޭ ގޮތުން ސައިމަން ވިދާޅުވީ ކޮންމެ ނެއިބާހުޑްއެއްގައި ކޮމިއުނިޓީ ސެންޓަރެއް ގާއިމް ކުރުމަށް ރޭވިފައިވީ ނަމަވެސް މިހާާތަނަށް ވެސް އެކަން އޮތީ ނުކުރެވިފައި ކަމަށެވެ. ނަމަވެސް ރައީސް ޔާމީން ވެރިކަމާ ހަވާލުވެ ފުރަތަމަ ކޮމިއުނިޓީ ސެންޓަރު ހުޅުވި އިރު ކުރިޔަށް އޮތް އަހަރުތަކު ތެރޭގައި ދެން ހުރި ނެއިބާހުޑްތަކުގެ ތެރޭގައި ވެސް ގިނަ ސެންޓަރުތަކެއް ގާއިމް ކުރެވޭނެ ކަމަށް ސައިމަން ވިދާޅުވި އެވެ.
"ކޮމިއުނިޓީ ބިލްޑިންތަކުން އަޅުގަނޑުމެންނަށް ލިބޭނެ ހިދުމަތަކި އެޗްޑީސީއާއި ދައުލަތާއި ކޮމިއުނިޓީތަކާ އެއްކޮށް މަސައްކަތް ކުރުމުގެ ފުރުސަތު ޔަގީން ވާނެ. މިއީ ވެސް ލިބޭނެ ބޮޑު ކުރި އެރުމެއް،" ސައީދު ވިދާޅުވި އެވެ.