ސުޕްރީމް ކޯޓުން ނިންމި ނިންމުމާއި ނެރުއްވި ހުކުމާ ވެސް ހިލާފަށް އިލެކްޝަން ކޮމިޝަން (އީސީ) އިން ބޭނުންވާ ގޮތަކަށް މާނަ ކޮށްގެން ބާއްވަނީ ޣައިރު ގާނޫނީ ބައި އިލެކްޝަން ތަކެއް ކަމަށާއި އެއަށް ފުރުުސަތު ނުދިނުމަށާއި ސަލާމަތީ ބާރުތަކުން އެކަން ހުއްޓުވަން އިދިކޮޅު ފަރާތްތަކުން ގޮވާލައިފި އެވެ.
އިލެކްޝަން ކޮމިޝަނުން ގޮނޑި ގެއްލިފައިވާ މެންބަރުން ކަމަށް ނިންމާފައިވާ އިދިކޮޅު މެންބަރުން ޖުމްހޫރީ ޕާޓީގެ އޮފީސް، ކުނޫޒުގައި މިއަދު ބޭއްވި ނޫސްވެރިންގެ ބައްދަލުވުމުގައި މަޑުއްވަރީ ދާއިރާގެ މެންބަރު މުހައްމަދު އަމީތު ވިދާޅުވީ އީސީން މަސައްކަތް ކުރަނީ ސިޔާސީ ބޭފުޅުންގެ އަތުގައި ހިފައިގެން ސިޔާސީ ބައެއް ބޭފުޅުން ބޭނުންވާ ސިޔާސީ ކަންކަން ހާސިލް ކުރުމަށް ކަމަށެވެ. އަދި ގޮނޑި ގެއްލުނު ކަމާމެދު ހިލާފެެއް ނެއް ކަމަށް ސުޕްރީމް ކޯޓުގެ ހުކުމުގައިވާ ކަމަށާއި އޭގެ ފަހުން އީސީން ބާއްވަން އިއުލާން ކޮށްފައިވާ އިލެކްޝަނަަކީ ގައިރު ގާނޫނީ އިލެކްޝަންތަކެއް ކަމަށާއި އެކަން ސަލާމަތީ ބާރުން ހުއްޓުވަން ޖެހޭ ކަމަށެވެ.
އަމީތު ވިދާޅުވީ ސުޕްރީމް ކޯޓުން ނިންމި ނިންމުމާއި ނެރުއްވި ހުކުމާ ހިލާފަށް އިލެކްޝަން ކޮމިޝަނުން މާނަ ކޮށްގެން ބޭނުންވާ ގޮތަށް ކަންކަން ނިންމައިގެން އަމަލު ކުރުމުގެ ފުރުސަތު ގާނޫނީ ގޮތުން ލިބިފައިނުވާ ކަމަށެވެ. އަދި ގޮނޑި ގެއްލިއްޖެ ކަމަށް ނިންމާ، ބަޔަކު އިންތިހާބު ކުރަން ބާއްވާ އެއްވެސް އިންތިހާބަކީ ގާނޫނީ ހަމަތަކުގެ ތެރެއިން ބޭއްވޭ އިންތިހާބަކަށް ނުވާނެ ކަމަށެވެ.
"އަސްލުތައް އޮޅުވާލަން ޕީޕީއެމުން ކުރި މުއާމަލާތްތަކަށް އީސީން ޖަވާބު ދިނީ، އީސީން މަސައްކަތް ކުރަނީ ސިޔާސީ ބޭފުޅުންގެ އަތުގައި ހިފައިގެން ސިޔާސީ ބައެއް ބޭފުޅުން ބޭނުންވާ ސިޔާސީ ކަންކަމެއް ހާސިލް ކުރުމަށް" އަމީތު ވިދާޅުވި އެވެ. "އީސީން ސިޔާސީ ބޭނުންތަކަށް ހިންގާ ޖަރީމާއަކަށް ޖަވާބުދާރީވާން ޖެހޭނެ، އިލެކްޝަން ކޮމިޝަނުގެ މެންބަރުންނަށް ވޯޓް ދީފައިވަނީ އެއްވެސް ބަޔަކަށް އަނިޔާވެރި ވާކަށް ނޫން، ނަމަވެސް މަގާމުތަކަށް އާދެވުނީމަ އަނިޔާވެރިވެގެން ނުވާނެ، ގަނޫނު ތަކާއި ހިލާފަށް އެއްވެސް ކަމެއް ނުކުރެވޭނެ، ގާނޫނީ އިމުގެ ތެރެއަށް އީސީން އަންނަން ޖެހޭ، ގާނޫނީ އަސާސީއާ ހިލާފަށް އެސްސީ ގެ ހުކުމާ ހިލާފު ނުވާށޭ، ފަހުން ވެސް މިހާރު ވެސް އެކަންކަޖން ބެލޭނެ"
ނޫސްވެރިންގެ ބައްދަލުވުމުގައި ވިލިނގިލި ދާއިރާގެ މެންބަރު ސައުދު ހުސައިން ވިދާޅުވީ އެ ބޭފުޅުންގެ ގޮނޑި ގެއްލިއްޖެ ކަމަށް ކަނޑައެޅުއްވީ އީސީ އާއި ރައްޔިތުން މަޖިލީހާއި ޕީޕީއެމާއި ގުޅިގެން އަމިއްލަ އަށް ކަމަށެވެ. ނަމަވެސް އީސީ އަދި މަޖިލީހުން އެބޭފުުޅުންގެ ހައިސިއްޔަތު ގެއްލިއްޖެ ކަމަށް ނުވަތަ މަސްއޫލިއްޔަތުތައް ގެއްލިއްޖެ ކަމަށް ވިދާޅުވެ ރަސްމީކޮށް ސިޓީ އަކުން ވެސް އަންގާފަ އެއް ނުވާ ކަމަށް ސައުދު ވިދާޅުވި އެވެ.
ސައުދު ވިދާޅުވީ އިލެކްޝަން ކޮމިޝަނުން އެސްސީގެ ނިންމި ނިންމުމަށް ބަލައި ހުކުމުގެ ކުރިން ޕާޓީން ވަކިވެފައިވާ މެންބަރުންބަލައި ދަފުތަރުން އުނިކުރަން އެދުނު ތާރީހަށް ބަލައި އެ ހުރިހާކަމަކަށް ރިއާޔަތްކޮށް ކަންކަން ނިންމުމަކީ އީސީގެ މެންބަރުންގެ ބޮލުގައި އެޅިފައިވާ މަސްއޫލިއްޔަތެއް ކަމަށެވެ. އަދި އީސީން މިހާރު އަމަލު ކުރަމުންދަނީ ގާނޫނީ އަމުރުތަކާއި ހިލާފަށް ކަމަށާއި ގާނޫނީ އިމުގެ ތެރެއިން ކަންކަން ނިންމަން ޖެހޭ ކަމަށް ސައުދު ވިދާޅުވި އެވެ.
"ސުޕްރީމް ކޯޓް ހުކުމުގައި ވަނީ 13 ޖުލައިގެ ފަހުން ހިންގާ ކަންކަމަށް ކަމަށް އަމަލު ކުރެވިގެން ދާނީ، އެހެން ކަމުން ޕާޓީ ތަކުގެ އަސާސީ ގާނޫނުގައި ވެސް ވަރަށް ސަރީހަކަށް ކޮށް ބަޔާން ކޮށްފައިވޭ އެއްވެސް ޕާޓީއަކަށް އެ ޕާޓިގެ މެންބަރުކަން ގެއްލުވާލުމުގެ އެއްވެސް ބާރެއް ލިބިފައިނުވާ ކަން" ސައުދު ވިދާޅުވި އެވެ. "އިލެކްޝަން ކޮމިޝަންގެ މެންބަރުންނަށް މި ދަންނަވަނީ އެސްސީގެ ނިންމުމަށް ބަލައި ހުކުމުގެ ކުރިން ޕާޓީން ވަކިވެފައިވާ މެންބަރުންނާއި ހުކުމުގެ ފަހުން ވަކި ކޮށްފައިވާ މެންބަރުން ބަލައި، ކެނޑިފައިވަނީ ކޮން ތާރީހެއްގައިތޯ ބަލައި އަދި ދަފުތަރުން އުނިކުރަން އެދުނު ތާރީހަށް ބަލައި އެ ހުރިހާކަމަކަށް ރިއާޔަތްކޮށް ކަންކަން ނިންމުމަށް ގޮވާލަން، އެބޭފުޅުންގެ ބޮލުގައި އެޅިފައިވާ މަސްއޫލިއްޔަތެއް މިއީ"