ވިހި މިލިއަނަށް ވުރެ ގިނަ ލަވަ ހިމެނޭ ލަވަ އެޕްލިކޭޝަން ނެޓްވޯކް "ޔޮންޑާ މިއުޒިކް" އާ ގުޅިގެން ދިރާގުން ޒީރޯ ޑިގްރީ އަހުމަދު ނާޝިދު ނުވަތަ ފްލޫ ނާޝިދަށް ހާއްސަ ޓްރިބިއުޓެއް ހަދައިފި އެވެ. ނާޝިދަށް ހާއްސަކޮށް މީގެކުރިން ދެ ޓްރިބިއުޓެއް ވަނީ ދީފަ އެވެ. މޯލްޑިވިއަން އައިޑޮލްގެ ދެ ވަނަ ސީޒަންގެ ގްރޭންޑް ފިނާލޭގައިވެސް ވަނީ ނާޝިދަށް ހާއްސަ ސަޅި ޓްރިބިއުޓެއް ދީފަ އެވެ.
ޒީރޯ ޑިގްރީގެ ލަވަ "މަރުފަލި" ވަރަށް ހާއްސަކޮށް ހުށަހަޅައިދއިން އިރު، އެ ލަވަ ހުށަހަޅައިދީފައިވަނީ ނާޝިދުގެ ދަރިފުޅު ނިޝް، މޯލްޑިވިއަން އައިޑޮލްގެ ދެ ޖަޖުން ކަމަށްވާ އިސްމާއިލް އައްފާން އަދި އިބްރާހީމް އަލީ (ކުޑަ އިއްބެ) އަދި އައިޑޮލްގެ މި ސީޒަންގެ ގަދަ ތިނެއް ކަމަށްވާ މުހައްމަދު ތަސްނީމް (ބޮބް)، ހަމޫދު އަހްމަދު އަދި ޝަމްވީލް މުހައްމަދު އެވެ. ބޮބް ލަވަ ހުށަހަޅައިދިން އިރު ވަނީ ނާޝިދު ބޮލުގައި އެޅުމަށް ބޭނުންކުރާ ފޮތިކޮޅު ބޭނުންކޮށްފަ އެވެ.
ޔޮންޑާ މިއުޒިކާ ގުޅިގެން ދިރާގުން ޓްރިބިއުޓް ހަދާފައިވަނީ ޒީރޯ ޑިގްރީގެ "ތަކުރައް ބަހެއް" އެ ލަވަ އެވެ. އެ ލަވަ ކިޔާދީފައިވަނީ ރާއްޖޭގެ އެންމެ މަޝްހޫރު އަދި އެންމެ އުހުގައި ފިޔަޖަމުންދާ ލަވަ ކިޔުންތެރިންނެވެ. އެ ލަވަ އެކޭ އެއްގޮތަށް ލަވަކިޔުންތެރިންގެ ލިސްޓޔ ފަށާނީ ނާޝިދުގެ ދަރިފުޅު ނިޝްފާ ނާޝިދު އިންނެވެ. ނިޝްފާ އާ އެކު އައްފާން، އަދްލީ، އަހްމަދު އިބްރާހީމް (އައްމަޑޭ)، މަރިޔަމް އުނޫޝާ، ލައިޝާ ޖުނައިދު، އީމާން، ފެޒޫ، ފޫޖީ، ޒާރާ އަދި ހައިޝަމް އެވެ.
އެ ޓްރިބިއުޓްގައި ލަވަޔާއި ގުޅޭ ހާއްސަ ވީޑިއޯއެއްވެސް ހިމަނާފައިވެ އެވެ.
ނާޝިދު ނިޔާވުމުގެ ކުރިން ގާތްގަނޑަކަށް މަސައްކަތް ނިންމާލާފައިވާ ސޯލޯ އާ އަލްބަމް "ޖާނީ" ރިލީޒްކުރާނެ ކަމަށްވަނީ އިއުލާނުކޮށްފަ އެވެ.
ނާޝިދަކީ ދިވެހި މިއުޒިކަށް އިންގިލާބެއް ގެނެސްދިން ފަރާތެކެވެ. ނާޝިދު ނިޔާވެފައިވަނީ ކެންސަރަށް ފަރުވާ ހޯއްދަވަމުން ގެންދަވަނިކޮށް މިދިޔަ އަހަރުގެ އޮކްޓޫބަރު މަހުގެ 10 ވަނަ ދުވަހު އުމުރުން 55 އަހަރުގަ އެވެ.
ކުޑައިރުގެ ގާތްއެކުވެރިޔާ މޮހޯޖު އާއި އަހުމަދުއާ އެކު ނާޝިދު ޒީރޯ ޑިގްރީ އެޓޯލް އުފެއްދީ 1987 ވަނަ އަހަރު އެވެ. އެއަށް ފަހު "ދޯނި" އަލްބަމްގެ މަސައްކަތް 80ގެ ފަހުކޮޅު ފަށައިގެން ގޮސް އަލްބަމް ނެރުނީ 1991 ވަނަ އަހަރު އެވެ. މާސްޓަރިން ހަދައި ކެސެޓަށް ޕްރިންޓްކޮށްގެން ގާތްގަނޑަކަށް 5000 އެއްހާ ކޮޕީސް މާލެ ގެނެސް ވިއްކި އެވެ.
ބޭންޑްގެ އާ އަލްބަމެއް އުފެއްދިފައި ނެތް ނަމަވެސް 1993 ވަނަ އަހަރު ނާޝިދުގެ ބްލޫސް ސޯލޯ އަލްބަމެއް ވެސް ނެރެފައިވެ އެވެ. އެއީ ބައިނަލްއަގުވާމީ ސްޓޭޖުގައި ވެސް ތައުރީފު އޮހުނު "ބާޑް އިން ފްލައިޓް" އެވެ.