ދިވެހި ސިނަމާގައި ބިޒީ އަހަރަކަށްފަހު އަހަރުގެ އެންމެ ފަހު ފިލްމުތަކާއި ދިމާއަށް މިސްރާބު ޖަހާފަ އެވެ. ޕްރޮޑިއުސަރު އަބްދުލް ފައްތާހުގެ "ހައްދު" ރިލީޒްކުރުމާއެކު މި އަހަރު އަޅުވަން ދެން އޮތީ އެންމެ ފިލްމެކެވެ. އެއީ މިދިޔަ އަހަރުގެ އެންމެ ކާމިޔާބު އެއް ފިލްމު ކަމަށްވާ "4426"ގެ ޕްރޮޑިއުސަރު ފާތިމަތު ނަހުލާގެ "ބޮސް" އެވެ.
ނަހުލާގެ އެންމެ ކާމިޔާބު ދެ ފިލްމު ކަމަށްވާ "ކަލާޔާނުލާ"ގެ ލޯބީގެ ރަހަގަނޑާއި ފިލްމު "ޒުލޭހާ" އިން ފެނިގެން ދިޔަ ހިތާމަވެރި އަސަރު "ބޮސް"ގައި ހުންނާނެ ކަމަށް ނަހުލާ ބުނެ އެވެ. "ބޮސް"ގައި ލޯތްބާއި، ގުރުބާނީ، ވޭން އަދި ކެކުޅުން ފެނިގެންދާނެ އެވެ. އެހެން ކަމަށްވާނަމަ ޝޫޓިންގައި ޑައިރެކްޓަރު އައިޝަތު ރިޝްމީ ޓިޝޫ ފޮއްޓެއް ހުސްކޮށްލި ކަމަށް އެ ބުނާ ވާހަކައަކީ ދޮގަކަށް ނުވާނެ އެވެ.
ފިލްމު އަޅުވަން މަދު ދުވަސްތަކަކަށްވެފައި ވަނިކޮށް ފިލްމުގެ އޯޑިއޯ ލަވަތަކާއި ފުރަތަމަ ޓްރެއިލާ ރޭ މިވަނީ ލޯންޗުކޮށްފަ އެވެ. މިއަދުން ފެށިގެން ސައުންޑްކްލައުޑް އަދި މައިޓޯންސް އިން ލަވަތައް އަޑުއަހާލެވޭނެ އެވެ.
ފިލްމުގެ ހަތް ލަވަ ހިމެނޭއިރު އެ ލަވަަތައް ކިޔާފައިވަނީ ރާފިޔަތު ރަމީޒާ، މަރިޔަމް އަޝްފާ، އައިޝަތު މާއިން ރަޝީދު، ޝަލަބީ އިބްރާހިމް، މުހައްމަދު އަބްދުލް ގަނީ (ތޭރަވާ)، އިބްރާހިމް އަލީ (ކުޑަ އިއްބެ) އަދި މޯލްޑިވިއަން އައިޑޮލްގެ ދެވަނަ ސީޒަނުން ވިދާލި ހަމޫދު އަހްމަދާއި އަހްމަދު ނަބީލް އެވެ. "ބޮސް"ގެ ބައެއްް ލަވަތަކަކީ "މިހިތް އެދޭގޮތް ނުވަނީ"، "ބޮސްދޭ ހާ ލޯބިވޭ"، "ދުނިޔޭގައި ދައުރުވާ" އަދި "ތި ލޯތްބަށް އެދިގެން ދާ ހިތްވޭ" އެވެ.
ރޭ ދޫކޮށްލި ޓްރެއިލާއިން ފެނިގެންދަނީ ނަހުލާ ބުނާހެން ހިތާމަޔާއި އަސަރެވެ. ލޯބީގެ ރަހަގަނޑުވެސް ފެނިގެންދެ އެވެ. ލީޑް ރޯލުން މަރިޔަމް އައްޒަ އާއި މުޅިން އަލަށް ނުކުންނަ އަހްމަދު ޔުނާނު ފެނިގެންދާއިރު ޓްރެއިލާއިން ފެންނަ މަންޒަރުތަކުގައި ޔުނާންގެ އެކްޓިން ވަރަށް މޮޅެވެ. އާ ތަރިއެކޭ ހީވާ ވަރެއް ނުވެ އެވެ. ފިލްމުގައި އައްޒަ އަކީ ނަފްސާނީ ބަލިމަޑުކަމެއް ކޮންމެވެސް އިރެއްގައި ތަހައްމަލް ކުރި މީހެއް ކަމަށް ބެލެވެ އެވެ. އަދި ޔުނާނަށް ފުރާނައަށް ނުރައްކާވާ ވަރުގެ ބައްޔެއް ޖެހޭހެން ހީވެ އެވެ. އެއީ ޓްރެއިލާއިން ފެންނަ މަންޒަރުތަކަށް ބަލާފަ އެވެ.
ބޮސްގެ ޓިކެޓު މި މަހުގެ 26 އިން ފެށިގެން ވިއްކާނެ އެވެ. ޓިކެޓް ބުކް ކުރަން ބޭނުންވާ ފަރާތްތަކަށް 7974426 އަދި 9964426 އަށް ގުޅާލައިގެން ޓިކެޓް ބުކް ކުރެވޭނެ އެވެ.
އައްޒަ އަދި ޔުނާނާއެކު މި ފިލްމުން ދެން ފެނިގެންދާނީ ވެސް ކުޅަދާނަ އަދި އެންމެ އުހުގައި މިހާރު ފިޔަޖަހަމުންދާ ތަރިންނެވެ. ފާތިމަތު އާޒިފާ (އަޒޫ)، އަލީ އާޒިމް (ދޮން އައްޔަ)، އިބްރާހިމް ޖިހާދު (ޖިމީ) އަދި އަލީ ޝަމީލް އެވެ.
ސިނެމްސްޓޯން އިން ސިނެމެޓޮގްރަފީ ހަދައިދޭ އެ ފިލްމަކީ ފޯކޭ ކޮލިޓީގައި އުފައްދާ ފިލްމެކެވެ. މި ފިލްމުގައި ބޮސް ސިފަ ކުރަނީ ބޮސް ދިނުމުގެ ގޮތުގަ އެވެ. "ބޮސް"ރިލީޒް ކުރާނީ އަންނަ މަހުގެ 24 ވަނަ ދުވަހު އެވެ.