ޕްރޮޑިއުސަރު / ޑައިރެކްޓަރު އަބްދުލްފައްތާހު އަދި ބަތަލާ ނިއުމާ މުހައްމަދު ޕްރޮޑިއުސްކުރި ދިވެހި ފިލްމު "ހައްދު" ރިލީޒް ކުރިތާ ފުރަތަމަ ހަތަރު ދުވަހުގެ ތެރޭގައި ހައުސްފުލް 15 ޝޯ ދައްކައިފި އެވެ. އެއީ އޮލިމްޕަސް އަދި ޝްވެކް މާލެ އާއި ހުޅުމާލެ ސިނަމާގަ އެވެ. ހައްދު ރިލީޒް ކޮށްފައިވަނީ މި މަހުގެ ހަވަނަ ދުވަހު އެވެ.
ހައްދު އަޅުވަން ހަމަޖެހިފައިވަނީ މި މަހުގެ 22 ވަނަ ދުވަހާއި ހަމައަށް ކޮންމެ ސިނަމާއެއްގައި 18 ޝޯ އެވެ. އެ ފިލްމު މިހާރުވަނީ އައްޑު އަތޮޅުގައި ވެސް ޕްރިމިއާކޮށްފަ އެވެ. އަދި މިމަހުގެ 14 ވަނަ ދުވަހު ހދ. ކުޅުދުއްފުށީގައި "ހައްދު" ޕްރިމިއާ ކުރާނެ އެވެ. މީގެ އިތުރުން ރާއްޖޭގެ ހުރިހާ ހިސާބެއްގައި ފިލްމު އެޅުވުމުގެ މަސައްކަތް އަންނަނީ ކުރަމުންނެވެ.
މަރިޔަމް އައްޒަ، އައިމިނަތު ރިޝްފާ އަދި އަހްމަދު ޝިބާން ލީޑު ރޯލުން ފެނިގެންދާ އެ ފިލްމަކީ ވަކި ހައްދެއްގެ ތެރޭގައި އުޅެން ޖެހުމުން ދިމާވާ މައްސަލަތަކެއް ދައްކުވައިދޭ ފިލްމެކެވެ. ސަޕޯޓިން ތަރިންގެ ގޮތުގައި އަލީ އާޒިމް (ދޮން އައްޔަ) މުހައްމަދު ރަޝީދު (ދަރާ)، މަރިޔަމް ޝަކީލާ، ފައުޒިއްޔާ ހަސަން ފެނިގެންދެ އެވެ. އަދި ހާއްސަ ފެނިލުމެއްގައި ނުޒުހަތު ޝުއައިބު (ނުޒޫ) އަދި ނޫސްވެރިޔާ އަހްމަދު ފައިރޫޒް ފެނިގެންދެ އެވެ.
ހައްދުގެ ސްކްރީންޕްލޭ ހަދާފައިވަނީ މަހުދީ އަހްމަދު އެވެ. ފިލްމުގައި ހަ ލަވައެއް ހިމެނޭއިރު ލަވަތައް ކިޔާފައިވަނީ މުހައްމަދު އަބްދުލް ގަނީ (ތޭރަވާ) އާއި އަންހެނުން މަރިޔަމް އަޝްފާ އަދި އެ ދެ މީހުންގެ ދަރިފުޅު ޔޫސުފް އަލްސަން އެވެ. ފިލްމުގެ ކޮންމެ ލަވައެއްގެ މަސައްކަތް ކޮށްފައިވަނީ ވަކި މިއުޒީޝަނެއް ކަމަށް ފައްތާހު ކުރިން ބުނެފައިވެ އެވެ.
ހައްދު ޕްރޮމޯޓުކޮށްފައިވަނީ ސިނަމާގައި ރިކޯޑުތައް މުގުރާލާނެ ފިލްމެއްގެ ގޮތުގަ އެވެ. އަދި ފައްތާހު ވެސް ވަނީ އެ ފިލްމަކީ ދިވެހި ފިލްމު އިންޑަސްޓްރީގައި ބެންޗްމާކަކަށް ވާނެ ކަމަށެވެ. އެ ފިލްމުގެ މަންޒަރުތައް ނަގާފައިވަނީ ހއ. ކެލާ، ރ. ވާދޫ އަދި މާލޭގަ އާއި ބައެއް ރިސޯޓުތަކުގަ އެވެ. ހައްދަކީ ފައްތާހުގެ 12 ވަނަ ފީޗާ ފިލްމެވެ.