އަބޫދާބީ ފަންޑު ފޯ ޑިވެލޮޕްމަންޓް (އޭޑީއެފްޑީ) އިން ރާއްޖެ އަށް 18.4 މިލިއަން ދިރުހަމް، ފަސް މިލިއަން ޑޮލަރު ( ގާތްގަނޑަކަށް 77 މިލިއަން ދިވެހި ރުފިޔާ) ގެ އެހީއެއް ދީފި އެވެ.
މި އެހީ ރާއްޖެއަށް ދިނުމުގެ އެއްބަސްވުމުގައި އޭޑީއެފްޑީގެ ފަރާތުން ސޮއިކުރެއްވީ ޑިރެކްޓަރު ޖެނެރަލް މުހައްމަދު ސައިފް އަލް ސުވައިދީ އެވެ. އަދި ދިވެހި ސަރުކާރުގެ ފަރާތުން ސޮއިކުރެއްވީ ރާޔޫއޭއީ އަށް ކަނޑައަޅުއްވާފައި ހުންނަވާ ދިވެހި ސަފީރު ޑރ. ހުސެއިން ނިޔާޒެވެ.
ބޭރު ގައުމުތަކުގައި ހިންގާ އިގްތިސާދީ އަދި އިޖްތިމާއީ ތަރައްގީގެ މަޝްރޫއުތަކަށް އެހީވުމުގެ ގޮތުން އަބޫދާބީ ސަރުކާރުން ގާއިމް ކޮށްފައިވާ ފަންޑުން އާއްމުކުރި ބަޔާނެއްގައި ބުނީ، ރާއްޖެ އަށް ދިން އެ އެހީ އަކީ ރާއްޖޭގެ އިގްތިސާދަށް އެހީވުމުގެ ގޮތުން ދިން އެހީއެއް ކަމަށެވެ.
އޭޑީއެފްޑީއިން ދަނީ 1976 ވަނަ އަހަރުން ފެށިގެން ރާއްޖޭގެ ތަރައްގީއާއި މުވާސަލާތު އަދި ދަތުރުފަތުރުގެ އިތުރުން އިމާރާތް ކުރުމާއި ހަކަތައިގެ މަޝްރޫއުތަކަށް 456 މިލިއަނަށް ވުރެ ގިނަ ރުފިޔާގެ އެހީދީފަ އެވެ.