ޗެނަލް 13 އިން ކުރީގެ ރައީސް މައުމޫން އަބްދުލް ގައްޔޫމްގެ އަބުރަށް ހުތުުރުވާ ފަދަ ކޮންޓެންޓެއް ބްރޯޑްކާސްޓްކުރި ކަމުގެ ތުހުމަތުކޮށް މޯލްޑިވްސް ބްރޯޑްކާސްޓިން ކޮމިޝަނުން މައްސަލައެއް ބަލަން ފަށައިފި އެވެ.
ޗެނަލް 13 ބްރޯޑްކާސްޓިން ކޮމިޝަނަށް ހާޒިރުކޮށްފައިވަނީ ޖުލައި ނަވަ ވަނަ ދުވަހުގެ ރޭ ޗެނަލް 13 އިން ގެނެސްދިން 'ނަނާ ހުވަފެން' ކިޔާ ޕްރޮގްރާމްގައި ރައީސް މައުމޫނަށް ނިސްބަތްކޮށް އެމަނިކުފާނަށް ހަޖޫޖަހާފައިވާ ކާޓޫނުތަކެއް ދެއްކި ކަމުގެ ތުހުމަތުގަ އެވެ. އެ ކަމަށް ގުޅިގެން ގިނަ ބަޔަކު ޗެނަލް 13 އަށް ފާޑުކިޔާފައިވެސްވެ އެވެ.
ބްރޯޑްކާސްޓިން ކޮމިޝަނުން ވަނީ އެ މައްސަލަ ބަލައި ނިމުމުން ތަފްސީލް ހާމަކުރާނެ ކަމަށް ބުނެފަ އެވެ.
ބްރޯޑްކޮމުން ބުނީ އަބުރު ރައްކާތެރި ކޮށްދިނުމާއި ހިޔާލުފާޅުކުރުމުގެ މިނިވަންކަމުގެ ގާނޫނުގެ 36 ވަނަ މާއްދާގެ (ޅ) ގައިވާގޮތުން “ބްރޯޑްކާސްޓް ކުރުމަށް ރާއްޖޭގައި އުފެއްދޭ ޕްރޮގުރާމްތައް ހުންނަންވާނީ މި ގާނޫނުގައި ބަޔާންކޮށްފައިވާ ހަމަތަކަށް ފެތޭގޮތަށް ތައްޔާރުކުރެވިފައި” ކަމަށް ބަޔާންކޮށްފައި ވުމާއި ކޮންޓެންޓްގެ ލައިވް ފީޑް މެދުކަނޑާލުމަށް އެދި ޕީއެސްއެމަށް ޝަކުވާއެއް ހުށަހަޅާފައި ނުވުމަކީ އެ ކޮންޓެންޓެއްގެ މައްސަލަ ފަހުން ނުބެލޭނޭ ގާނޫނީ ހަމައެއް އޮތްކަމެއް ކަމަކަށް ނުދެކޭ ކަމަށެވެ.
އަދި ބްރޯޑްކާސްޓްކުރުމުގެ ގަވާއިދުގެ 27ވަނަ މާއްދާ “ބްރޯޑްކާސްޓްކުރާ ކޮންޓެންޓަށް ޒިންމާވުން” ގެ ދަށުން ޓީވީއެމް އިން ގެނެސްދިން ލައިވް އިވެންޓްގައިވާ އަބުރު ރައްކާތެރިކށްދިނުމާއި ހިޔާލު ފާޅުކުމުގެ މިނިވަންކަމުގެ ޤާނޫނުގެ މާއްދާތަކާއި ޚިލާފު ވެފައިވާ ކޮންޓެންޓަށް ޒިންމާވާން ޖެހޭނޭކަމަށް ބްރޯޑްކޮމުން ބުންޏެވެ. އެ ގާނޫނުގެ ދަށުން މީހެއްގެ ހައްގަށް، ނަމަށް، އަބުރަށް، ގަދަރަށް ނުވަތަ ކަރާމާތަށް އުނިކަމެއް ނޫނީ ގެއްލުން ލިބޭ އަދި ސާބިތު ނުހިފޭ ދޮގު ވާހަކައެއް އެއްވެސް ހަބަރު ފަތުރާ ވަސީލަތަކުން ދައްކައިފި ނަމަ 50،000 ރުފިޔާ އާއި ދެ މިލިއަން ރުފިޔާއާ ދެމެދުގެ އަދަދެއްގައި ޖޫރިމަނާ ކުރެވޭނެ އެވެ.