ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހިމް ފަލާހު ކުރީގެ ހޯމް މިނިސްޓަރު އުމަރު ނަސީރުގެ އަބުރަށް އަރައިގަނެ ދެއްކެވި ވާހަކަ ޗެނަލް 13 އިން ދައްކާފައިވި ނަމަވެސް އެ ޗެނަލް ޖޫރިމަނާ ނުކުރަން ބްރޯޑްކާސްޓިން ކޮމިޝަނުން ނިންމައިފި އެވެ.
އެހެން ނަމަވެސް ހަމަ އެ ކޮންޓެންޓް ދެއްކި މައްސަލައިގަ ޕަބްލިކް ސާވިސް މީޑިއާ (ޕީއެސްއެމް) ވަނީ ދެ ލައްކަ ރުފިޔާއިން ޖޫރިމަނާކޮށްފަ އެވެ. ޕީއެސްއެމް އިން މިހާރު ވަނީ އެފައިސާ ދައްކާފަ އެވެ.
އެ މައްސަލަ ބަލައިނިންމާ ބްރޯޑްކޮމް އިން ނެރުނު ބަޔާނުގައި ބުނެފައިވަނީ ޗެނަލް 13 އިން ، ޗެނަލް 13 އިން ބްރޯޑްކާސްޓްކުރާ އެންމެހައި ކޮންޓެންޓަކީ އަބުރުގެ ގާނޫނުން ރައްކާތެރިކުރާ އެންމެހާ ކަންކަމަށް ފުރިހަމައަށް ރިއާޔަތްކުރުމަށްފަހު، ބްރޯޑްކާސްޓްކުރުމުގެ އުސޫލުތަކާއި ބްރޯޑްކާސްޓްކުރުމުގެ ގާނޫނުގެ ހުދޫދުގެ ތެރޭގައި ހިމެނޭ ކޮންޓެންޓްކަން ޔަގީންކޮށްދޭ ކަމަށެވެ. އަދި ޗެނަލް 13 ޖޫރިމަނާ ނުކޮށް ދެވަނަ ފަހަރަށް ދޫކޮށްލާފައި މިވަނީ އެޗެނަލުން އެމަންޒަރުތައް ރެކޯޑްކޮށްފައި ނުވާތީ ކަމަށެވެ.
އެ ކޮންޓެންޓް ޗެނަލް 13 ހިންގާ އިމާރާތް ބަދަލުވުމާ ގުޅިގެން ގެއްލިފައިވާ ކަމަށް ޗެނަލް 13 އިން ބުނެފައިވާ ކަމަށެވެ. އަދި މިއީ ޗެނަލް 13 ގެ ކޮންޓެންޓަށް ރައްކާތެރި ނުވި ދެވަނަ ފަހަރު ކަމަށާއި އެކަން ތަކުރާރު ނުކުރުމަށް ވަނީ އަންގާފަ އެވެ.
ބްރޯޑްކޮމް އިން ބުނީ އެކަމަކީ ލައިސަންސް ދިނުމުގެ އާންމު ޝަރުތުތަކުގެ ތެރެއިން ޝަރުތަކާ ހިލާފުވުން ކަމަށެެވެ. އަދި މީގެފަހުން އެ ޝަރުތާ ހިލާފުވެއްޖެނަމަ ޗެނަލް 13 ހިންގާ މީޑިއާ ރިންގް ޕްރައިވެޓް ލިމިޓެޑް ޖޫރިމަނާ ކުރާނެ ކަމަށެވެ.
މީގެކުރިން ރާއްޖެ ޓީވީ އިން ރައީސް އަބްދުﷲ ޔާމީންގެ އަބުރުފުޅަށް ހުތުރުވާ ފަދަ ކޮންޓެންޓެއް ދެއްކި މައްސަލައިގައި އެ ސްޓޭޝަން އެއް މިލިއަން ރުފިޔާއިން ޖޫރިމަނާކޮށްފައިވެ އެވެ.