ގެދޮރުވެރިކަމުގެ ޕްރޮގްރާމްގެ ދަށުން ދޫކުރާ ފްލެޓްތަކުގެ ކުލީގެ ގޮތުގައި ދައްކަން ޖެހޭނީ މަހަކު 6،000 ރުފިޔާ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ. މިއަދު ބޭއްވި ނޫސްވެރިންގެ ބައްދަލުވުމެއްގައި މުއިއްޒު ވިދާޅުވީ ސޯޝަލް ހައުސިންގެ ދަށުން މި ފަހަރު ދޫކުރާ ހުރިހާ ފްލެޓެއްގައި ވެސް ހުންނާނީ ތިން ކޮޓަރިއާއި ކޮންމެ ކޮޓަރިއެއްގައި ފާހަނާއެއް ހުންނާނެ ކަމަށެވެ.
އެގޮތުން ކޮންމެ ފްލެޓެއްގެ ކުއްޔަކީ 6000 ރުފިޔާ ކަމަށާއި ޑައުންޕޭޕަންޓުގެ ގޮތުގައި ދައްކަން ޖެހޭނީ 25،000 ރުފިޔާ ކަމަށެވެ.
މިނިސްޓަރު ވިދާޅުވީފައިސާ ދައްކަން ޖެހޭނީ ގިނަވެގެން 25 އަހަރުގެ ތެރޭގައި ކަމަށާއި ނަމަވެސް އެއަށް ވުރެ އަވަހަށް ފްލެޓު މިލްކު ކުރަން ބެނުންވާ ފަރާތްތަކަށް ވެސް އެ ފުރުސަތު އޮންނާނެ ކަމަށެވެ.
"މިއީ މާލެ ސަރަހައްދުގައި އެއްވެސް ތަނަކުން [ފްލެޓް] ލިބޭ ވަރަށް ވުރެ ބޮޑު އަގެއް ނޫން، ވަރަށް އޯގާތެރި ގޮތަކަށް ރައްޔިތުންނަށް ލުއިވާ ގޮތަކަށް ރައްޔިތުންނަށް ގެދޮރުވެރިކަމުގެ ފުރުސަތު ދީފައި ވަނީ، އެކަން ކޮންމެ ރައްޔިތަކު ވެސް ގަބޫލު ކުރައްވާނެ،" މުއިއްޒު ވިދާޅުވި އެވެ
މި ބުރުގައި ދޫކޮށްފައިވަނީ 704 ފްލެޓެވެ. އެއީ ހުޅުމާލޭގައި އިމާރާތް ކޮށްފައިވާ ފްލެޓްތަކެކެވެ. މިނިސްޓަރު ވިދާޅުވީ މީގެ ކުރިން ނުކުންނަ އެންމެ ބޮޑު މައްސަލައަކީ ފްލެޓުތައް ލިބޭ ފަރާތްތައް ނޫން އެހެން ބަޔަކު ފްލެޓުތަކުގައި އުޅޭ މައްސަލަ ކަމަށެވެ. ނަމަވެސް މި ފަހަރު އެގްރިމަންޓު ހަދާއިރު އެ މައްސަލައަށް ހައްލެއް ގެންނާނެ ކަމަށެވެ. އެގޮތުން އެންމެ ހައްގުވާ ފަރާތްތައް ނޫނީ އެހެން ބަޔަކު އެ ފްލެޓުތަކުގައި ނޫޅޭނެ ގޮތް ހަދާނެ ކަމަށެވެ.
ހައުސިން މިނިސްޓްރީން ފްލެޓު ލިބުނު މީހުންގެ ފޯމު ނަމްބަރުތަކާއެކު ދާއިމީ ލިސްޓު އަންމު ކުރި އިރު އެ އިއުލާނުގައި ބުނެފައި ވަނީ ފްލެޓްތައް ލިބޭ ފަރާތްތަކާއެކު އެގްރީމެންޓް ހެދުމުގެ ކުރިން، އެ ފަރާތެއްގެ އަދި އެފަރާތެއްގެ މައިންބަފައިންގެ އަދި އަނބިމީހާ ނުވަތަ ފިރިމީހާގެ ގޯތިގެދޮރާ ބެހޭ މަޢުލޫމާތު އިތުރަށް ބަލައި ޗެކްކުރާނެ ކަމަށެވެ. އަދި ދެމަފިރިން ފްލެޓަށް ހޮވިއްޖެނަމަ، ދެމަފިރިންނަށް ލިބޭނީ އެއް ފްލެޓް ކަމަށެވެ.
ފްލެޓު ލިބުނު މީހުންގެ ވަނަވަރު ހާމަނުކޮށް ލިސްޓު ނެރުން މައްސަލާގައި ހައުސިން މިނިސްޓްރީއަށާއި މިނިސްޓަރަށް ވަރަށް ބޮޑަށް ވަނީ ފާޑު ކިޔުން އަމާޒުވެފަ އެވެ. އެ މައްސަލައާ ގުޅޭ ގޮތުން މީގެ ކުރިން އެ މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ތަކުރާރުކޮށް އެ ސުވާލު ކުރުމުން ވެސް ޖަވާބެއް ނުދެއްވަ އެވެ. އަދި ފްލެޓު ލިބުނު ފަރާތްތަކަށް ލިބުނު މާކްސްތަކަކީ ކޮބައިކަން ސުވާލު ކުރުމުން އެކަން ވެސް ހާމަ ނުކުރާނެ ކަމަށް މިނިސްޓަރު މިއަދު ވިދާޅުވި އެވެ.
އެކަމާ ގުޅިގެން ގިނަ ބައެއްގެ ކަންބޮޑުތަކެއް ހުރުމާ ގުޅިގެން އެންޓި ކޮރޮޕްޝަން ކޮމިޝަން (އޭސީސީ) އާއި ރައްޔިތުން މަޖިލީހުން ވެސް އަންނަނީ އެ މައްސަލަ ބަލަމުންނެވެ. މިނިސްޓަރު މުއިއްޒު ވިދާޅުވީ މަޖިލީހަށާއި އޭސީސީއަށް ވެސް ފުރިހަމަޔަށް އެއްބާރުލުން ދީގެން އެ މަސައްކަތް ކުރަމުން އަންނަ ކަމަށެވެ.