މިދިޔަ މަހު ރާއްޖޭގެ ޓޫރިޒަމަށް އަށް ޕަސެންޓުގެ ކުރިއެރުމެއް ލިބިއްޖެ އެވެ. ޓޫރިޒަމް މިނިސްޓްރީން މިއަދު އާއްމުކުރި ތަފާސް ހިސާބުތައް ދައްކާ ގޮތުން މިދިޔަ މަހު ރާއްޖެ އަށް 121،310 ޓޫރިސްޓުން އައިސްފައިވެ އެވެ. މިއީ ގާތްގަނޑަކަށް ފަސް ޕަސެންޓް ކުރިއެރުމެކެވެ.
ހިސާބުތައް ދައްކާ ގޮތުން މިދިޔަ މަހު ޗައިނާއިން އެކަނި 33،743 ޓޫރިސްޓުން ޒިޔާރަތްކުރި އެވެ. އަދި މި އަހަރުގެ މިހާތަނަށް އެ ގައުމުން 209،514 ޓޫރިސްޓުން ޒިޔާރަތް ކުރި އެވެ.
ޓޫރިޒަމް ހިސާބުތައް ދައްކާ ގޮތުގައި މިދިޔަ އެންމެ ގިނަ ޓޫރިސްޓުން އައިސްފައިވާ އޭޝިޔާ ޕެސިފިކު ސަރަހައްދުން 59،900 މީހުން އައިސްފައިވެ އެވެ.
މި ހިސާބުތައް ދައްކާ ގޮތުގައި މިދިޔަ މަހުގެ ނިޔަލަށް ރާއްޖޭގައި 129 ރިސޯޓާއި 428 ގެސްޓް ހައުސް އަދި 14 ހޮޓެލުގެ އިތުރުން 146 ސަފާރީގައި ހުރި އެނދުގެ އަދަދު ވަނީ 39،040 އަށް އަރާފަ އެވެ.
މިދިޔަ މަހު އައި ޓޫރިސްޓުންގެ އަދަދު އިތުރުވިއިރު، މި އަހަރު ނިމޭއިރު 1.3 މިލިއަން ޓޫރިސްޓުން އަންނާނެ ކަމަށް ސަރުކާރުން ވަނީ އަންދާޒާ ކޮށްފަ އެވެ.