ޓީޗަރުންނަކީ އަގުހުރި ހިދުމަތެއް ގައުމަށް ކޮށްދޭ ބައެއް ކަމަށާއި އެ ޓީޗަރުންނަށް ކިތަންމެ ވަރަކަށް ޝުކުރު އަދާކުރި ނަމަވެސް އަގު ވަޒަން ނުކުރެވޭނެ ކަމަށް އެޑިއުކޭޝަން މިނިސްޓަރު އައިޝަތު ޝިހާމް ވިދާޅުވެއްޖެ އެވެ.
މިއަދު ފާހަގަކުރާ ޓީޗަރުންގެ ދުވަހާ ގުޅިގެން މިނިސްޓަރު ފޮނުއްވި މެެސެޖްގައި ވިދާޅުވެފައިވަނީ އަހަރުގެ ވަކި ދުވަހެއް ޓީޗަރުންގެ ނަމަށް ހާއްސަކޮށް، އެފަދަ ދުވަހެއް ފާހަގަކުރުުގެ އެންމެ ބޮޑު ބޭނުމަކީ ޓީޗަރުން ކުރާ ބުރަ މަސައްކަތް ފާހަގަކޮށް ހިތްވަރުދީ ޝުކުރު އަދާކުރުން ކަމަށެވެ.
"މި ސަރުކާރުގެ ތައުލީމީ ސިޔާސަތާ އެއް ގޮތަށް އެބްމެ ކުއްޖަކު ވެސް ބާކީ ނުކޮށް ތައުލީމާއި ތަމްރީނާއި ތަރުބިއްތުގެ ފުރުސަތު ފަހިކޮށްދިނުމަށް އަޅުގަނޑުމެން ފަށާފައިވާ ދަތުރުގައި އެންމެ މުހިންމު އަދި އެންމެ ބުރަ މަސްއޫލިއްޔަތު އަދާ ކުރައްވަނީ މުދައްރިސުންނެވެ. މުޅި ގައުމުގެ އިގްތިސޯދީ ހަކަތައަށް ބޭނުންވާ ދަރިވަރުން ތަމްތީނު ކުރެވެނީ މުދައްރިސުންގެ އަގުހުރި އަދި ބުރަ މަސައްކަތުންނެވެ." މިނިސްޓަރުގެ މެސެޖްގައިވެ އެވެ.
މިނިސްޓަރު ޝިހާމް ވަނީ ހުރިހާ ޓީޗަރުންނަށާއި ޓީޗަރުން ތަމްރީނުކުރާ ފަރާތްތަކަށާއި ކުރިން ޓީޗަރުކަން ކޮށްފައިވާ ފަރާތްތަކަށް ވެސް ދުވަހުގެ ތަހުނިޔާ ފޮނުއްވާފަ އެވެ.