މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕަސަންގެ ނައިބު އިދާރީ އަދި މާލީ މަގާމަށް މީހުން ހޮވުމަށް ބާއްވާ އިންތިހާބު މި މަހުގެ 20 ވަނަ ދުވަހު ބާއްވަން ނިންމައިފި އެވެ. ވޯޓުލުން ކުރިއަށްދާނީ އެ ދުވަހު މެންދުރުފަހު ތިނަކުން ހަޔަކަށެވެ. މާލޭގެ ވޯޓު ފޮށި ބަހައްޓަން ހަމަޖެހިފައިވަނީ އެމްޑީޕީގެ ހަރުގޭގަ އެވެ.
އެމްޑީޕީ އިން މިއަދު ބޭއްވި ނޫސް ކޮންފަރެންސެއްގައި ޕާޓީގެ ޗެއާޕާސަން ހަސަން ލަތީފް ވިދާޅުވީ އެ އިންތިހާބުގައި ވޯޓު ލެވޭނީ އެ ޕާޓީގެ ގޮފިތަކުގެ ތެރެއިން 30 މެންބަރުން ހަމަވާ ގޮފިތަކުގެ ތެރެއިން ހިންގާ ކޮމެޓީ ހޮވާފައި ތިބި ގޮފިތަކަށެވެ. އެގޮތުން 30 މެންބަރުން ހަމަވާ 624 ގޮފީގެ ތެރެއިން އިންތިހާބުގައި ވޯޓު ލެވޭނީ 537 ގޮތްޕަށް ކަމަށެވެ.
އޭގެ އިތުރުން އެ އިންތިހާބުގައި އެމްޑީޕީގެ ގައުމީ މަޖިލިސްގެ މެންބަރުންނަށާއި، އެމްޑީޕީއަށް ނިސްބަތްވާ ކައުންސިލް މެންބަރުންނަށާއި، ޕްރޮވިންސްތަކުގެ ނައިބު ރައީސުންނަށާއި، ދާއިރާތަކުގެ ނައިބު ރައީސުންނަށާއި، އަންހެނުންގެ ރޫހުގެ ހިންގާ ކޮމެޓީގެ މެންބަރުންނަށާއި، ޒުވާނުންގެ ހިތްވަރުގެ ކޮމެޓީގެ މެންބަރުންނަށާއި، މާލިއްޔަތާއި ޗަންދާ ކޮމެޓީގެ މެންބަރުންނަށާއި، މެމްބަޝިޕާއި ކެމްޕޭނު ކޮމެޓީގެ މެންބަރުންނަށް އަދި އިސްތިއުނާފް ފަނޑިޔާރު މަޖިލީހުގެ މެންބަރުންނަށް ވޯޓު ލެވޭނެ އެވެ.
އެމްޑީޕީގެ ޗެއާޕާސަންގެ ނައިބުގެ އިދާރީ މަގާމަށް ކުރިމަތިލާފައިވަނީ އެންމެ ފަރާތަކުންނެވެ. އަދި މާލީގެ މަގާމަށް ހަތަރު ފަރާތުން ކުރިމަތިލާފައިވެ އެވެ. އެ ދެ މަގާމަށް ކުރިމަތި ލުމުގެ ފުރުސަތު ހުޅުވާލާފައިވަނީ މި އަހަރުގެ ޖޫން މަހުގެ 13 އަދި 14 ވަނަ ދުވަހު އެވެ.
އިންތިހާބުގެ ފައިނަލް ވޯޓާސް ލިސްޓު މި މަހުގެ 12 ވަނަ ދުވަހު އިއުލާނު ކުރާނެ އެވެ.