ސްރީލަންކާގައި ހުންނަ ދިވެހި އެމްބަސީ ކައިރީގައި މާދަމާ ރައްޖޭގެ އިދިކޮޅު ފަރާތްތަކުން މުޒާހަރާއެއް ކުރަން ތައްޔާރުވެއްޖެ އެވެ. އަވަސް ކަށަވަރުވެފައިވާ ގޮތުގައި ސްރީލަންކާގައި އެ މުޒާހާ ރާވާ ފަރާތްތަކުން މިހާރު ވަނީ ސުލްހަވެރި އެއްވުމެއް ބޭއްވުމަށް ސްރީލަންކާ ސަރުކާރުން ނަގަން ޖެހޭ ހުރިހާ ހުއްދައެއް ވެސް ހޯދާފަ އެވެ.
ގާތްގަނޑަކަށް 15،000 އަށްވުރެ ގިނަ ދިވެހި ދިރިއުޅޭ ސްރީލަންކާގެ ކޮލަމްބޯގައި ހުންނަ ދިވެހި އެމްބަސީގެ އިމާރާތް ކައިރީގައި މާދަމާ އެއްވުމެއް ބާވާއިރު އެއެއްވުމުގައި ދާއި ދާދިފަހުން ޔޫރަޕިއަން ޔޫނިއަން ޕާލަމެންޓަށް ރާއްޖެއަށް ބެހޭ ގޮތުން ހުށަހެޅި ގަރާރުގައި ހިމެނޭ ކަންކަން އިސްލާހު ކުރުމަށް ގޮވާލާނެ އެވެ. -- އެ ގަރާރަކީ ރާއްޖޭގެ ވެރިންގެ މައްޗަށް ދަތިކުރުމުގެ ފިޔަވަޅު އެޅުމަށް ގޮވާލައި ޔޫރަޕިޔަން ޕާލަމަންޓަށް ހުށަހެޅި ގަރާރެކެވެ.
މީގެ އިތުރުން އަދި މިހާރު ސަރުކާރުން ސްރީލަންކާއަށް އައްޔަން ކުރައްވާފައިވާ އެމްބެސެޑަރު މުހައްމަދު ހުސައިން ޝަރީފު (މުންދު) އަކީ ޣައިރު ގާނޫނީ ގޮތެއްގައި ބޭއްވި މަޖިލީހުގެ ޖަލްސާއަކުން ފާސްކޮށްގެން ރުހުން ދީފައިވާ ބޭފުޅެއް ކަމަށް ގޮވާލުމުގެ އިތުރުން ރައްޔިތުން މަޖިލީހުގެ ރައީސް އަބްދުﷲ މަސީހާ ދެކޮޅަށް ވެސް ޝުއޫރުތައް ފާޅު ކުރާނެ އެވެ. މާދަމާ ލަންކާގައި ހުންނަވާ ސަފީރު މުންދުގެ ފަތްކޮޅު އަދި ރަަސްމީކޮށް ރައީސް މައިތިރިޕާލާ ސިރިސޭނާއަކަށް ނާރުވަ އެވެ.
މާދަމާ ބާއްވާ މުޒާހަރާގައި އިސްވެ ހަރަކާތްތެރި ވަޑައިގަންނަވަނީ ސްރީލަންކާގައި ހުންނަވަނިކޮށް ޕާސްޕޯޓް ހިފަހައްޓާފައިވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަހުމަދު މަހުލޫފާއި އެ މަޖިލީހުގެ ކުރީގެ މެންބަރު މުހައްމަދު ތޯރިގެވެ. މީގެ އިތުރުން އެމްޑީޕީގެ ސޯޝަލް މީޑއާ އެކްޓިވިސްޓެއް ކަމަށްވާ ލޫކަސް ޖަލީލާއި ސޯޝަލް މީޑިއާ އެކްޓިވިސްޓެއް ކަމަށްވާ ޝުމްބާ ގޮންގްގެ މަންމަފަދަ ފަރާތްތައް އުޅެ އެވެ.
މާދަމާގެ އެ މުޒާހަރާއާ ގުޅޭ ގޮތުން ބަހެއް ހޯދުމަށް ހައިކޮމިޝަނަރު މުންދު އަށާއި އެ އެމްބަސީގެ ބައެއް އެހެން އޮފިޝަލުންނަށް އަވަސް އިން ގުޅި ނަމަވެސް ޖަވާބެއް ނުދެއްވަ އެވެ. އަދި މުޒާހަރާއާ ގުޅިގެން މަހުލޫފަށް ގުޅުމުން ވިދާޅުވީ އެ މައުލޫމާތު ފަހުން ދެއްވާނެ ކަމަށެވެ.
ސްރީލަންކާގައި އެމްޑީޕީގެ ގޮތްޕެއް ދާދި ފަހުން އުފައްދާފައިވާއިރު އެ ޕާޓީއަށް ނިސްބަތްވާ ވަރަށް ގިނަ ބަޔަކުވެސް އެ ގައުމުގައި އުޅެ އެވެ.